झापा क्षेत्र नम्बर २ को प्रतिनिधिसभा प्रत्यक्षतर्फ नेकपा एमालेकी नेतृ पवित्रा खरेल चुनावी मैदानमा छिन्। ०७० सालको दोस्रो संविधानसभाको निर्वाचनमा पवित्रा थोरै मतले नेपाली कांग्रेसका सुधीरकुमार सिवाकोटीसँग पराजित भएकी थिइन्। यतिबेला उनी नेपाली कांग्रेसका जिल्ला सभापति उद्धव थापासँग प्रतिस्पर्धा गर्दैछिन्।
वाम गठबन्धनको संयुक्त उम्मेदवार भएका कारण उनी यसपालि आफ्नो जित सुनिश्चित भएको दाबी गर्छिन्। झापामा ५ वटा निर्वाचन क्षेत्र छन्। त्यसमध्ये प्रतिनिधिसभाको निर्वाचनमा प्रत्यक्षतर्फ प्रतिस्पर्धा गर्ने उनी एक्ली महिला हुन्। यो क्षेत्रमा कुल १ लाख १८ हजार मतदाता छन्। केही महिनाअघि सम्पन्न स्थानीय तहको निर्वाचनलाई आधार मान्ने हो भने यो क्षेत्रमा वाम गठबन्धनको मत ४० हजार ४ सय १६ छ। कांग्रेसको मत २२ हजार ८ सय ८२ मात्र छ। त्यसैले पनि पवित्रा आफ्नो जितमा ढुक्क जस्तै देखिन्छिन्। उनीसँग नेपाल लाइभका नवीन अर्यालले गरेको कुराकानीः
तपाईं झापाको एक्लो महिला उम्मेदवार, चुनाव कत्तिको लागिरहेको छ?
एकदमै लागेको छ। राज्यले कहिले धान रोप्ने बेला चुनावको घोषणा गर्छ, कहिले बाली भित्र्याउने बेला। त्यही पनि खेत–खेतमा पुगेर चुनावी अभियानलाई तीव्र पारेका छौं। बाली भित्र्याउने चटारोमा मतदाताले सभाहरूमा सक्रिय सहभागिता जनाउन सकिरहनु भएको छैन्। तर, हामी भोट हाल्न आउँछौ भन्ने आश्वासन दिनुभएको छ।
मतदाताहरू के चाहिरहेका छन्?
विकास निमार्णको काम नै उहाँहरूको मुख्य एजेन्डा छ। आफ्नो क्षेत्रमा विकास होस्, बाटो बनोस्, पुल, कलभर्ट बनोस्, चौबिसै घन्टा बिजुली होस् भन्ने चाहनुभएको छ। सुरक्षा पनि उहाँहरूको प्रमुख प्राथमिकतामा छ। महिला उम्मेदवार भएका कारण उहाँहरुले सुरक्षासम्बन्धी आफ्नो समस्या बताइरहनु भएको छ।
महिला मतदाताले तपाईंसँग कस्तो अपेक्षा राखेका छन्?
उहाँहरुले आफ्नो अधिकार सुनिश्चित होस् भन्ने चाहनुभएको छ। बेरोजगारीको समस्याले धेरै युवा विदेशमा छन्। घरमा महिलाहरु बढी देखिन्छन्। उहाँहरु आफ्नो बाल–बच्चाको गुणस्तरीय शिक्षा र स्वास्थ्य राज्यले सुनिश्चित गर्नुपर्यो भनिरहनु भएको छ। घरेलु हिंसा रोकियोस् भन्ने चाहना छ। म घरेलु हिंसाको समूल अन्त्यका लागि लड्नेछु। महिलाले घरभित्र गर्ने कामको मूल्यांकन नभएकोमा उहाँहरुको गुनासो छ। त्यसको अन्त्य होस् भन्ने चाहना छ। विदेशमा घरेलु कामदारको श्रमको मूल्य छ। तर, यहाँ दिनभरि महिला घरेलु काममा जोतिँदा पनि केही गरेनन् भन्ने आरोप लाग्ने गर्छ, यसको अन्त्य होस् भन्ने आग्रह छ।
आफ्नो क्षेत्रमा कत्तिको घुमिरहनु भएको छ?
म सदैव सक्रिय छु। २०७० को निर्वाचन परिणमपछि झनै सक्रिय छु। सीमा निर्धारण हुँदा केही नयाँ भू–भाग मेरो क्षेत्रमा गाभिएका छन्। त्यसैले नयाँ जोडिएका भू–भागमा पहिलो पल्ट पुगेजस्तो भइरहेको छ। तर, लामो समयदेखि राजनीतिमा आबद्ध भएको हुनाले सबैसँग परिचित छु। महिला उम्मेदवार पनि भएकाले दिदी–बहिनी, आमाहरूको माया र आशीर्वाद पाएकी छु। उहाँहरूलाई आफ्नै छोरी वा दिदी–बहिनी उठेको आभास भइरहेको छ।
तपाईंलाई नै मत दिनुपर्ने कारण के देख्नुहुन्छ?
पहिलो त म एक्लो महिला उम्मेदवार हुँ। महिला अधिकारको सुनिश्चितताका लागि पहिलेदेखि लडिरहेको हुनाले सबैले मलाई मत हाल्नु हुन्छ भन्ने लागेको छ। अर्को कुरा, राजनीतिक कुरा मिलेर संघीय ढाँचाको संविधान बनिसकेको हुनाले अबको हाम्रो दायित्व विकास निर्माण नै हो। यसमा दह्रोसँग काम गर्न सक्छु भन्ने मेरो दाबी हो।
निर्वाचन निकै खर्चिलो बन्दै गएको छ, कत्तिको अप्ठ्यारो परेको छ?
हो, खर्चिलो बन्दै छ। तर, म ‘मनी’ र ‘मसल्स’भन्दा पनि मस्तिष्क प्रयोग गर्ने उम्मेदवार हुँ। सुकुम्बासी क्षेत्र, शिक्षाको कमी र गरिबी भएको ठाउँमा पैसाको केही चलखेल होला। एकछाक मिठो ख्वाएर मत चोर्ने चलन छ। तर, म यो परम्पराको विरुद्धमा छु र यसलाई चिर्ने प्रयास गरिरहेकी छु।
निर्वाचनको सुरक्षा व्यवस्था कस्तो छ?
पछिल्लो केही समययता सुरक्षामा त्रृटि देखिएको छ। तर, म आत्तिएको छैन। झापामा मात्र हालै २–३ वटा घटना भए। हाम्रै पार्टी अध्यक्ष केपी कमरेडको घरको पर्खालमा बम हानियो। कृष्ण सिटौलाको घरमा पनि यस्तै घटना भयो। मेरै प्रतिस्पर्धी उद्धव थापाको गाडीमा पनि बम हानियो। उहाँको गाडीमा बम हानेपछि म आफैं उहाँको घर पुगेर यस्तो घटनाको निन्दा गरें। उहाँलाई नअत्तालिन अनुरोध गरें। राज्यले मतदातालाई भयरहित निर्वाचनमा भाग लिने वातावरण मिलाउनुपर्छ।
समग्रमा निर्वाचनको परिणाम कस्तो होला?
ढुक्क हुनुहोस्, वाम गठबन्धनको दुई तिहाई आउँछ। र, सरकार निर्माण हुन्छ। संविधान कार्यान्वयन गर्न जोड–कोणले मिलेर बनेको वाम एकता हो यो, कायम रहन्छ। एउटै पार्टी निर्माण हुन्छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
-1724654184.jpg)
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
