‘बिग्रिए म बिग्रन्छु, बने देश बनाउँछु, तर म राजनीति गर्छु’ भन्दै राजनीतिमा छिरेका मिलन पाण्डे विवेकशील साझा पार्टीबाट प्रतिनिधिसभा सदस्यका उम्मेद्वार हुन्। काठमाडौं क्षेत्र नम्बर ९ बाट प्रतिनिधिसभा सदस्यमा उम्मेदवारी दिएका पाण्डे इन्जिनियरिङका विद्यार्थी हुन्। विभिन्न सामाजिक कार्यमा संलग्न हुँदै आएका पाण्डे देश बदल्ने अठोटसहित राजनीतिमा छिरेको दाबी गर्छन्। मंसिर २१ को निर्वाचन नजिकिँदै गर्दा चुनावी एजेन्डा र समसामयिक विषयमा पाण्डेसँग नेपाल लाइभका लागि हिमविक्रम केसीले गरेको कुराकानीः
प्रतिनिधिसभा निर्वाचनमा आफ्नो उम्मेदवारीको औचित्य कसरी पुष्टि गर्नुहुन्छ?
मेरो उम्मेदवारीको औचित्य ३ प्रकारले पुष्टि हुन्छ। पहिलो, अहिले हामी सबैले चाहेको विकास अनि समृद्वि हो। म सिभिल इन्जिनियरिङको विद्यार्थी भएकाले मैले विकास बुझेको छु भन्ने लाग्छ। म प्राविधिक रुपमा मात्र होइन राजनीतिक रुपमा पनि सक्षम छु भन्ने लाग्छ। दोस्रो, म नयाँ पुस्तालाई प्रतिनिधित्व गर्छु, त्यसैले आमयुवाले चाहेको कुरा बुझ्न सक्छु र त्यसका लागि आवाज उठाउन सक्छु। तेस्रो, म काठमाडौं क्षेत्र नम्बर ९ मै जन्मिएँ, हुर्किएँ, बढें, पढें। त्यसैले यो क्षेत्रसँग म अनि मसँग यो क्षेत्रको भावनात्मक सम्बन्ध छ।
प्रतिनिधिसभा निर्वाचनमा उम्मेदवारका तर्फबाट तपाईंका चुनावी एजेन्डा के–के छन्?
हाम्रो प्रतिबद्धता र चुनावी एजेन्डा बुँदागत रुपमा यस्ता छन्ः
१. हामी तपाईंले तपाईंका सन्तानको स्वास्थ्य अनि शिक्षाका लागि पीर गर्नु नपर्ने नीतिको पक्षमा सशक्त ढंलले वकालत गर्नेछौं।
२. हामी युवाको उत्थानका लागि उद्यमशीलताका कार्यक्रमहरुमा नेतृत्वदायी पहल गर्नेछौं। युवालाई रोजगार बन्न प्रेरित गर्ने नीतिको वकालत गर्नेछौं।
३. स्थानीय सरकारको भूमिकामा रहेका महानगरपालिका, नगरपालिका, गाउँपालिका र आमनागरिकसँग मिलेर बाटो, खानेपानी, ढल, पार्क निर्माण आदिमा सशक्त भूमिका खेल्नेछौं।
४. हामी स्थानीय संस्कृति र सम्पदाको संरक्षणमा नेतृत्वदायी भूमिका निर्वाह गर्नेछौं।
५. हामी राज्यको अनुभूति हुनेगरी जनतालाई सेवा दिन प्रतिबद्ध छौं।
६. हामी सांसदको हैसियतमा आफ्नो क्षेत्रको विकासका लागि पाउने र ल्याउन सक्ने बजेट काठमाडौं क्षेत्र नम्बर ९ का प्रवुद्ध र प्रतिष्ठित व्यक्तिको समूह बनाएर उनीहरूको सल्लाह सुझावमा मात्र खर्च गर्नेछौं।
मुलुक वाम गठबन्धन र लोकतान्त्रिक गठबन्धमा ध्रुवीकृत भइरहँदा विवेकशील साझा पार्टी कहाँनेर छ?
विवेकशील साझा पार्टी जनतासँग छ। जनताको आम चासोको मुद्दाका लागि लड्दै छ। हेर्नुस, यी गठबन्धन निर्वाचनपछि ३ महिना पनि टिक्दैनन्। हुनतः ३ दिनमै बाबुराम भट्टराई हिँडेपछि वाम गठबन्धन टुटिसकेको छ। ६०/४० को हिसाब–किताब जुन दिन तलमाथि हुन्छ, त्यो दिन फेरि राजनीति सम्भावनाको खेल बन्छ।
चर्चाका हिसाबमा तपाईंको पार्टीले समाजिक सञ्जालमा राम्रै स्थान पाएको छ। जनमतलाई भोटमा बदल्न सक्ने योजना र सामर्थ्य के हो?
अहिले सामाजिक सञ्जालकै जमाना छ। तपाईंले लिएको यो अन्तर्वार्ता पनि सामाजिक सञ्जालमै आउने हो, अनि मतदाताले पनि त्यहीँ नै पढ्ने त हो नि, होइन र? त्यसैले यो अस्वाभाभिक चाहिँ होइन। पाइरहेको माया भोटमै बदल्न चाहिँ, दिनरात एक गरेर घरदैलो गर्दै छौं। आफ्नो कुरा कोणसभाहरु मार्फत राख्दै छौं। मतदातासँग व्यक्तिगत भेटघाटमा पनि ब्यस्त छौं।
अहिलेको चुनावको नतिजालाई पनि धेरैले स्थानीय तह निर्वाचनको मतपरिणामसँग तुलना गरेका छन्। काठमाडौं क्षेत्र नम्बर ९ मा तपाईंले चुनाव जित्ने आधार के–के हुन्?
म काठमाडौं–९ को उम्मेदवारसँगै मतदाता पनि हुँ। यो क्षेत्रमा हामीले २६ वर्षदेखि नयाँ अनुहार पाएका छैनौं। जित्नेले केही गरेको छैन। हार्ने (दोस्रो हुने) पनि टुलुटुलु हेरेर बसेका छन्। अब यहाँका मतदाता वैकल्पिक पार्टी अनि वैकल्पिक सक्षम नेतृत्व चाहन्छन्। जसको प्रतिनिधित्व हामीले गर्दै छौं। अब यो क्षेत्रको भविस्य हामी हौं।
चुनावी नतिजा र पार्टी विस्तारका लागि संगठनलाई महत्वपूर्ण मानिन्छ। भर्खरै खुलेको विवेकशील साझाले वर्षौंदेखिको राजनीतिक विरासत बोकेका पार्टीलाई कसरी पराजित गर्न सकिएला?
हामीले ठूला पार्टीलाई पराजित गरिसक्यौं। ४ महिनामा ७० वर्षअघि खुलेका पार्टीलाई एउटै धरातलमा उभिएर टक्कर दिँदै छौं। अस्ति स्थानीय तह निर्वाचनमा हामीले काठमाडौंमा (किशोर थापा र रन्जु दर्शना) २३ गते चुनाव चिह्न पाएर २८ गतेसम्म ६ दिनको प्रचारप्रसारले तेत्रो भोट ल्याएका थियौं। यो हामीले उहाँहरुले पराजित गरेको होइन र?
तपाईसँग चुनावी प्रतिस्पर्धामा रहेका नेपाली कांग्रेस र नेकपा एमालेका उम्मेदवार लामो राजनीतिक यात्रा तय गरेर आउनु भएको छ। पार्टी संगठन, राजनीतिक अनुभव र उमेरका हिसावले तपाईंले कत्तिको दबाब महसुस गर्नुभएको छ?
उहाँहरुको योगदानले देश यहाँसम्म आएकै हो। त्यसका लागि मेरो पुस्ता उहाँहरुलाई धन्यवाद दिन्छ। तर, अब उहाँहरुले घरमै बसेर नातिनातिना खेलाउने बेला भएको छ। अब ड्राइभिङ सिटमा हामी बस्छौं। हामी विकास अनि समृद्विको बाटोमा देशलाई डोहोर्याउन आएका हौं। हामी दबाबमा भन्दा पनि देश बनाउने हतारमा छौं।
स्थानीय तह निर्वाचनमा मतदाताले पार्टीगत हिसाबले नै मतदान गरे, सोही अनुसारको नतिजा आयो। अबको निर्वाचनले कसरी फरक नतिजा दिन सक्ला?
त्यति बेला र अहिलेको माहौलमा ३ प्रकारका फरक छन्। पहिलो, त्यति बेला विवेकशील र साझा फरक पार्टी थिए, अहिले एउटै पार्टी बनेको छ। दोस्रो, त्यतिबेला हामीले चुनाव चिह्न ६ दिन अगाडि मात्र पाएका थियौं, अहिले हामीले पहिलेदेखि नै पाइसकेका छौं। तेस्रो, त्यतिबेला भोट हालेर पनि काम छैन, जित्दैन कि भन्ने मतदाताको मानसिकता अहिले भोट हाले जित्न सक्ने रहेछ भन्नेमा पुगेको पाएका छौं।
अबको निर्वाचनपछि विवेकशील साझा पार्टीको हैसियत के रहला?
हामी राष्ट्रिय पार्टी बन्छौं। अनि सशक्त प्रतिपक्ष बन्नेछौं।
विवेकशील साझा पार्टीले प्रतिनिधिसभातर्फ प्रत्यक्षतर्फ चुनाव जित्न सक्ने सम्भावित उम्मेदवारको सूचीमा कसकसलाई राखेको छ?
सबैको उतिकै सम्भावन छ। मेरो हकमा भन्नुपर्दा, विवेकशील साझा पार्टीले काठमाडौं क्षेत्र नम्बर ९ जित्दै छ।
मतदातालाई के भन्न चाहनुहुन्छ?
तपाईं एक पाउ गोलभेंडा किन्न सोच्ने, ओल्टाइपल्टाई गरेर छान्ने तर देशको नेता चुन्न, आफ्नो प्रतिनिधि चुन्न किन नसोच्ने? अब हामीले सोच्ने बेला आएको छ। कुनै बेला, कुनै नेताले लगाएको गुन पुस्तौंसम्म तिरिरहँदा वा बाबुबाजेको पार्टी भनेर आफ्नो पार्टीप्रति धेरै इमान्दार बन्दा देशले यो हालत बेहोर्नु परेको छ। अब आफ्नो पार्टीप्रति अलिकति बेइमानी अनि देशप्रति अलिकति इमान्दारिता देखाउन सके देशले काँचुली फेर्न सक्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
