विराटनगर– नेपाली कांग्रेसका नेता महेश आचार्य मोरङ क्षेत्र नम्बर ४ बाट प्रत्यक्षतर्फ प्रतिधिनिसभा सदस्यका लागि चुनावी मैदानमा छन्। निर्वाचनको मिति नजिकिँदै जाँदा उनी आफ्नो संसदीय क्षेत्रमा सक्रिय छन्। २०४८ सालको आमनिर्वाचनपछि नेपालको कान्छो अर्थमन्त्री बनेका आचार्य कांग्रेसमा प्रभावशाली नेता मानिन्छन्। निर्वाचन क्षेत्रको नयाँ संरचनाका कारण पुरानो क्षेत्र पनि आफ्नो संसदीय क्षेत्रमा गाभिएका कारण आचार्य निकै आशावादी देखिए। उनीसँग वाम गठबन्धनका अमनलाल मोदीले प्रतिस्पर्धा गर्दैछन्। निर्वाचनको सक्रियता, सम्भावनाबारे नेपाल लाइभका लागि नवीन अर्यालले गरेको कुराकानीः
नयाँ संरचना अन्तर्गत हुन लागेको निर्वाचनमा होमिनु भएको छ, कस्तो भइरहेको छ अभियान?
निकै उत्साहित छु। महत्वको बोध भइरहेको छ। आमनागरिक पनि नयाँ संरचना अन्तर्गत हुन लागेको निर्वाचनलाई लिएर निकै उत्साही छन्। ठूलो संख्यामा मान्छेहरू आमसभामा आइरहेका छन्। धेरै मानिस अब देश विकाश हुने कुरामा आशावादी छन्।
जनताको चाहना के देखिरहनु भएको छ?
मुख्य त केही विषयमा जनतामाझ संशय छ। राजनीतिक विवाद समाप्त भएर देश विकाशको पथमा जानुपर्ने अवस्थामा पुनः वाम गठबन्धन भएको छ र उहाँहरू कम्युनिस्ट शासन ल्याउने कुरा गरिरहनु भएको छ। यसले जनतामा अब देश फेरि राजनीतिक विवादमै अलमलिने हो कि भन्ने त्रास छ। जनताले अब राजनीतिक विवाद होइन विकास होस् भन्ने चाहना राखिरहेका छन्। पूर्वाधारको खोजी भइरहेको छ।
कति समयपछि आफ्नो क्षेत्र घुम्दै हुनुहुन्छ?
मोरङमा आफ्नो संसदीय क्षेत्र घुम्ने नेताहरुमा म पनि पर्छु। तर, अहिले क्षेत्र निर्धारण हुँदा केही नयाँ ठाउँ मिसिन आएका छन्। तर, उहाँहरु मेरो लागि त्यति नयाँ हुनुहुन्न। २०५६ सालमा मलाई भोट हाल्ने स्थानीयवासी बीचमा सीमा हेरफेर हुँदा मबाट केही टाढा हुनु भएको थियो। अहिले फेरि सीमानिर्धारण गर्दा २० वर्षपछि भेट भएको छ। उहाँहरु पुरानै निकटता देखाइरहनु भएको छ।
जनताले तपाईलाई नै किन मत हाल्ने?
म मुख्यतः ३ वटा कारणका लागि आफूलाई मत दिन आग्रह गरिरहेको छु।
पहिलो, लोकतन्त्रलाई समावेशी र संघीय मोडलमा ढालिसकेको अवस्थामा यसको सुध्रिढीकरणका लागि मलाई भोट हाल्न आग्रह गरेको छु। विपक्षीहरुले कम्युनिस्ट व्यवस्था स्थापना गर्छु भनिरहेका छन्। लोकतन्त्र समाप्त पार्ने उहाँहरुको योजना विफल तुल्याउन पनि म जनतालाई अपिल गरिरहेको छु।
दोस्रो, जहाँसम्म समाजिक एकता र राष्ट्रिय एकताको कुरा छ, हिमाल, पहाड र तराई–मधेश जोड्ने एजेन्डा कांग्रेससँग मात्र छ। थारु र मधेश आन्दोलनको निकास जसरी कांग्रेसले दियो, अब संविधानको पूर्ण कार्यान्वयनका लागि यही पार्टीले मात्र इमान्दारी पूर्वक काम गर्न सक्छ। तराई–मधेशको जल्दोबल्दो मुद्दालाई कांग्रेसले मात्र हेर्छ। कम्युनिस्टहरुले तराई–मधेशको मुद्दामा आफ्नो दृष्टिकोण स्पष्ट पारिसकेका छन्। उनीहरुले तराई–मधेशका जनतासँग संवाद पनि गर्न चाहेनन्।
तेस्रो, देशको विकास र समृद्धिको एजेन्डामा हामीले मात्र काम गर्न सक्छौं। कम्युनिस्ट शासनमा द्वन्द्व झन् बढेर जान्छ। लगानी प्रभावित हुने खतरा पनि छ। अब जनता देशमा विकास तीव्र गतिमा होस्, रोजगारीको अवसर सिर्जना होस् भनिरहेका छन्। कम्युनिस्ट शासनमा यो आर्थिक एजेन्डा ओझलमा पर्ने सम्भावना प्रवल छ।
यसपालिको निर्वाचन कतिको खर्चिलो भएको अनुभव गरिरहनु भएको छ?
खर्चिलो त भएको छ। अहिले मेरै क्षेत्रमा १ लाख ६० हजार मानिस बसोबास गर्छन्।सबैतिर पुग्नुपर्ने कारण भौगोलिक दृष्टिले पनि खर्च बढेको छ। समय, श्रम र सबै कुरालाई जोड्दा निर्वाचन खर्चिलो नै बनिरहेको छ।
निर्वाचन सम्मुखमा छ, तर बम विस्फोटका घटना बढिरहेको छ। निर्वाचन शान्तिपूर्ण होला?
निर्वाचन भयरहित हुनुपर्छ। मतदाताले त्रासमा भोट हाल्नु भनेको लोकतन्त्रकै लागि घाटा हो। सरकारले सुरक्षा व्यवस्थालाई अझ मजबुत बनाएर निर्वाचन भयरहित गराउन जरुरी छ।
समग्रमा निर्वाचनको परिणाम कस्तो आउने देख्नु भएको छ?
जनताले कांग्रेसको पक्षमा अत्याधिक मतदान गर्नेछन् भन्ने कुरामा म ढुक्क छु। कम्युनिस्ट शासनमा राजनीतिक तीक्तता बढ्ने खतरा छ। यो सबैले बुझेका छन्। नेपाली जनताले लोकतान्त्रिक व्यवस्थालाई नै सुध्रिढ गर्न कांग्रेसलाई भोट हाल्छन्। वाम गठबन्धनले भनेजस्तै ‘टु थर्ड’ मेजुरिटी ल्याउने सम्भावना छैन। हामी नै पहिलो दल बन्छौं।
आफ्नो जितप्रति कतिको आश्वस्त हुनुहुन्छ?
म ढुक्क छु। अन्तिमसम्म जनतासँग जाने हो। मलाई विश्वास छ, यहाँका जनताले मेरो विकासको मोडललाई जिताउनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
