त्रिशूली, नुवाकोट- किस्पाङ गाउँपालिकाको मनकामनामा एक अन्तर्राष्ट्रिय गैरसरकारी संस्थाको सहयोगमा बनेको भूकम्प प्रतिरोधी घर हस्तान्तरण गरिएको छ।
वर्ल्ड रिन्युको सहयोगमा नारी जागरण केन्द्र नेपालले साबिकको मनकामना गाविस–४, ६ र ७ मा रहेको ३२३ लाभग्राहीमध्ये २८२ घरको पुनः निर्माण गरी घरधनीलाई हस्तान्तरण गरेको हो।
भूकम्प पीडितलाई घर हस्तान्तरण गर्दै राष्ट्रिय पुनः निर्माण प्राधिकरणका सहसचिव एवं प्रवक्ता यमलाल भुसालले भूकम्पले क्षति भएका घरको पुनः निर्माण सन्तोषजनक नरहेको अवस्थामा गैरसरकारी संस्थाको सहयोगमा एउटा जिल्लामा २८२ घरको पुनः निर्माण हुनु अन्य जिल्लाका लागिसमेत प्रेरणा मिलेको बताए।
उनले भूकम्पपछिको पुनः निर्माणका लागि सहुलियत ऋणको व्यस्थापनका लागि कार्य अगाडि बढेकामा प्राधिकरणले तयार पारेको कार्यविधिअनुसार बैंकले ऋण दिन तयार रहे पनि ऋण तिर्ने मापदण्ड नबनेकाले ढिलाइ भएको उल्लेख गरे।
साबिकको मनकामना गाविसमा रु १८ करोडको लागतमा २८२ घर पुनः निर्माण गरिएको हो। कूल ३२३ भूकम्पपीडित भए पनि २८८ घरसँग मात्रै सम्झौता भएको बताइएको छ।
यसैबीच भूकम्पले क्षति पुर्याएका आवासमध्ये नुवाकोटमा ७ हजार १३९ घर पुनः निर्माण भएको जनाइएको छ। सहरी विकास तथा भवन डिभिजन कार्यालयअन्तर्गत आवास निर्माण जिल्ला आयोजना कार्यान्वयन इकाइका अनुसार लाभग्राही आफैंले अनुदान रकम प्राप्त गरी निर्माण गरेको घरको सङ्ख्या मंसिरको दोस्रो सातासम्ममा ७ हजार १३९ पुगेको छ। आवास पुनः निर्माण भएकामध्ये लाभग्राहीले निर्माण गरेका ५ हजार ३६४ घरको सरकारी अनुदान पाउन बाँकी रहेको छ। सरकारी तथा संस्थामार्फत अनुदान लिएर घर बनाउने प्रभावितको सङ्ख्या एक हजार ७७५ रहेको इकाइ निर्देशक विदुर खड्काले जानकारी दिए।
आवास निर्माणको अन्तिम चरणमा पुगेका २ हजार ४० लाभग्राहीले तेस्रो किस्ता अनुदानका लागि निवेदन दिएका छन् भने १२ घरधुरीको अनुदान रकम बैंक खातामा निकासाको प्रक्रियामा रहेका छन्। उनका अनुसार अनुदानमार्फत भन्दा प्रभावितले आफूखी निर्माण गरेको घरको सङ्ख्या तीन गुणाभन्दा बढी भएकाले तिनलाई अनुदान उपलब्ध गराउने प्रक्रियामा समावेश गर्न लागिएको छ।
बैसाख १२ को भूकम्पले नुवाकोटमा ६५ हजार ७५९ घरधुरी पूर्ण क्षति भएकामा आवास निर्माण गर्न ६२ हजार ३७४ धरधुरीले अनुदान सम्झौता गरेका छन्। सम्झौता भएकामध्ये ६२ हजार ८६ परिवारले पहिलो किस्ताबापत रु ५० हजार नगद लिए पनि घर बनाउनको सङ्ख्या निकै कम छ।
पहिलो किस्ता रकम लिएर आवास निर्माण सुरु गरी दोस्रो किस्ता रु एक लाख ५० हजार लिनेको सङ्ख्या १४ हजार ४८२ पुगेको छ। पहिलो किस्ता रकम पाएकामध्ये १५ हजार ९०० ले निर्माण कार्य सुरु गरेको पुनः निर्माण प्राधिकरण जिल्ला समन्वयन समितिको सचिवालयले जनाएको छ। पहिलो किस्ता रकम लिएर आवास निर्माण सुरु गरेकामध्ये १०९ घरको मापदण्डअनुसार नभएकाले अनुदान सिफारिसका लागि घर सुधार गर्न सुझाव दिएको सचिवालयका निमित्त प्रमुख वेदप्रसाद गौडेलले जानकारी दिए।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768395492.png)
-1768391713.png)
-1764146706.png)
