डडेल्धुरा– पहिलो चरणमा निर्वाचन भएको बैतडीका उम्मेदवार दोस्रो चरणको चुनावका उम्मेदवारहरुको पक्षमा भोट माग्न डडेल्धुरा पुगेका छन्।
बैतडीका वाम गठबन्धनबाट प्रतिनिधिसभा सदस्य उम्मेदवार दामोदर भण्डारी, लोकतान्त्रिक गठबन्धनका उम्मेदवार नरबहादुर चन्द्र, वाम गठबन्धनका प्रदेशसभा सदस्य उम्मेदवार प्रेमप्रकाश भट्ट लगायतका नेता र कार्यकता भोट माग्न डडेल्धुरा आएका हुन्।
बैतडीबाट बसाइँ सरी डडेल्धुराको पोखरा, आलिताल, जोगबुडा, अजयमेरु र बगरकोटमा बसोबास गर्ने नागरिकसँग भोट माग्न बैतडीका उम्मेदवार डडेल्धुरा आएका हुन् ।
डडेल्धुराको अजयमेरु १ खतेडाको कार्यक्रमलाई सम्बोधन गर्दै पूर्व अर्थराज्य मन्त्री भण्डारीले डडेल्धुरा जिल्ला कम्युनिस्टहरुको लालकिल्ला बन्ने पक्का भएको दाबी गरे।
‘स्थानीय तहको मत हेर्ने हो भने करिब २ हजार मतले हामी कांग्रेसभन्दा अगाडि छौं, जित सुनिश्चित छ’, उनले भने।
भण्डारीेले वाम गठबन्धनलाई निर्वाचनमा हराउन लोकतन्त्रवादी शक्तिले अनेक चलखेल गरिरहेको आरोप समेत लगाए।
कांग्रेसका उम्मेदवार तथा वाणिज्य राज्यमन्त्री नरबहादुर चन्दले डडेल्धुरामा कांग्रेसको जित सुनिश्चत रहेको दाबी गरे।
बैतडीका प्रतिनिधिसभा सदस्यका दुवै उम्मेदवार शुक्रबार कञ्चनपुरको महेन्द्रनगरमा चुनावी अभियानमा सहभागी हुने कार्यक्रम छ।
डडेल्धुरामा प्रतिनिधिसभा सदस्यका लागि प्रधानमन्त्री तथा कांग्रेस सभापति शेरबहादुर देउवा र वाम गठबन्धनबाट माओवादी केन्द्रका सचिवालय सदस्य खगराज भट्ट चुनावी मैदानमा छन्।
यस्तै, प्रदेशसभाका 'क' मा वाम गठबन्धनबाट पठनसिंह बोहरा र लोकतान्त्रिक गठबन्धनबाट रघुबर भट्ट तथा 'ख' मा वाम गठबन्धका डा तारा जोशी र लोकतान्त्रिकतर्फ कर्णबहादुर मल्ल प्रतिष्प्रधामा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
