हेटौंडा- मंसिर २१ गते हुने प्रतिनिधिसभा सदस्य निर्वाचनका लागि मकवानपुरमा वाम गठबन्धन र लोकतान्त्रिक गठबन्धनका उम्मेदवार तेस्रो पटक प्रतिस्पर्धामा उत्रेका छन्।
०५१ र ०५६ सालको संसदीय निर्वाचनमा प्रतिस्पर्धा गरेका उम्मेदवारहरु पुनः यस पटक चुनावी मैदानमा उत्रिएका हुन्।
दुई वटा निर्वाचन क्षेत्र रहेको मकवानपुरको क्षेत्र नम्बर १ मा लोकतान्त्रिक गठबन्धनका उम्मेदवार राप्रपा नेपालका अध्यक्ष कमल थापा र वाम गठबन्धनका उम्मेदवार कृष्ण दाहाल यस पटक पनि निर्वाचन प्रतिस्पर्धामा सँगै छन्।
दुवै निर्वाचनमा दाहालले थापालाई पराजित गर्दै मकवानपुरबाट सांसद बनेको एमाले मकवानपुरले जनाएको छ। दाहालले मकवानपुरको विकासमा गरेको महत्वपूर्ण योगदानका कारण आफ्नो जित सुनिश्चित भएको दाबी गरेका छन्। यस पटक जितेर गएमा आफूले पक्की पुलदेखि द्रुतमार्गसम्मका योजना अगाडि बढाउने प्रतिबद्धता समेत जनाएका छन्।
नेता थापाले आफूले जितेर गएमा प्रधानमन्त्रीसम्म बन्ने हैसियत भएकाले आफूलाई मत दिन मतदातासँग आग्रह गरे। लोकतन्त्रको रक्षा कम्युनिस्टबाट नहुने बताउँदै थापाले लोकतन्त्र र हिन्दु धर्मरक्षाका लागि लोकतान्त्रिक गठबन्धनलाई मत दिन आह्वान गरेका छन्।
त्यस्तै, क्षेत्र नम्बर– २ मा लोकतान्त्रिक गठबन्धनबाट महालक्ष्मी उपाध्याय (डिना) र वाम गठबन्धनबाट विरोध खतिवडा उम्मेदवार बनेका छन्। यसअघिको संसदीय निर्वाचन ०५१ र ०५६ मा दुबै जना एक-अर्काको प्रतिस्पर्धी थिए। दुवै निर्वाचनमा खतिवडा विजयी भएका थिए।
उपाध्यायले दुई पटकसम्म खतिवडाले आफूलाई जिते पनि यसपटक भने जित्ने पालो आफ्नो रहेको बताए। कांग्रेस मकवानपुरमा आएको पार्टी प्रवेशको लहरले आफू जित्ने उनको दाबी छ।
उपाध्यायको प्रतिद्वन्द्वीका रुपमा रहेका खतिवडाले मकवानपुर जिल्ला कम्युनिस्टको लालकिल्ला रहेको र थाहा दर्शनका प्रतिपादक रुपचन्द्र विष्टको जन्मभूमि रहेकाले पनि यहाँ वाम गठबन्धनको हार नहुने बताए।
मकवानपुरमा संविधानसभाको पहिलो निर्वाचनमा चार वटै क्षेत्र माओवादीले जितेको थियो भने दोस्रो निर्वाचनमा तीन क्षेत्रमा एमाले र एउटामा नेपाली कांग्रेस विजयी भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
