०५१ सालमा एमालेको सदस्यता लिएका नेपालगञ्जका चर्चित व्यापारी विजय गुप्ता अहिले एमाले उद्योग व्यवसाय विभागका केन्द्रीय सदस्य छन्। गुप्तालाई वाम गठबन्धनले बाँके क्षेत्र नम्बर २ प्रदेशसभा ‘ख’ का उम्मेदवार बनाएको छ।
धेरै व्यवसायीले पार्टीलाई आर्थिक सहयोग गरेर विगतमा समानुपातिक सभासद बने पनि गुप्ता भने यसमा अपवाद देखिएका छन्। उनले पार्टीकै कार्यकर्ता भएर कार्यकर्ताहरुबीचमै प्रतिस्पर्धा गरी प्रदेशसभाको टिकट पाएका हुन्। ०५१/५२ सालताका माडबारी भएर पनि कम्युनिस्ट पार्टीमा लागेको भनेर गुप्ताबारे टीका–टिप्पणी गर्नेहरु नै अहिले उनलाई जिताउने अभियानमा लागेका छन्। आफूले जिते पारिश्रमिक सामाजिक विकासमा खर्च गर्ने उनले घोषणा गरेका छन्।
व्यवसाय र राजनीतिका साथै सामाजिक सेवामा समेत सक्रिय गुप्तासँग नेपाल लाइभका लागि कृष्ण अधिकारीले गरेको कुराकानीः
तपाईं मधेसी समुदायको व्यक्ति, ‘मधेस र मधेसी विरोधी’ भन्ने आरोप लागेको पार्टी एमालेको राजनीतिमा लाग्दै उम्मेदवार बन्नुभएको छ, मधेसी जनताबाट कस्तो प्रतिक्रिया पाइरहनुुभएको छ?
घरदैलो अभियानमा जाँदा सबै समुदायका मानिसले उत्साहपूर्वक साथ दिएका छन्। एमालेलाई मधेस विरोधीको आरोप लागिरहेका बेला बाँकेमा मधेसी समुदायबाट मलाई उम्मेदवार बनाएर एमालेले त्यो भ्रमलाई चिर्ने काम गरेको छ। यसले समाजमा भ्रम छर्नेहरु निरुत्साहित भएका छन्। अहिले मेरो प्रचारप्रसारमा एमाले र माओवादी केन्द्रका कार्यकर्ताले मात्रै नभई विगतमा राजनीतिमा कतै नजोडिएका ठूला व्यापारी–व्यवसायीहरुले समेत साथ दिएका छन्। जनताले स्थायी सरकार, विकास र समृद्धिको अपेक्षा गरेका छन्। वाम गठबन्धनले स्थायी सरकार निर्माण गरेर विकास र समृद्धिका बाटाहरु खोल्छ भन्नेमा सबै जनता विश्वस्त छन्।
तपाईंका चुनावी एजेन्डाहरु केके छन्?
हाम्रो मुख्य एजेन्डा भनेको विकास र समृद्धि हो। नेपालगञ्ज विमानस्थललाई स्तरोन्नति गरी अन्तर्राष्ट्रिय स्तरको विमानस्थल बनाउने, नेपालगञ्जलाई औद्योगिक शहरको रुपमा विकास गर्ने, नेपालगञ्जमा चक्रपथ निर्माण गर्ने, भेरी अञ्चल अस्पताललाई स्तरोन्नति गरी सरकारी मेडिकल कलेज बनाउने, राप्ती नदीमा स्थायी तटबन्ध गर्ने र बाढीपीडितलाई सुरक्षित बासको व्यवस्था गर्ने, नेपालगञ्जलाई विशेष आर्थिक क्षेत्र बनाउने, सुख्खा बन्दरगाह निर्माण लगायत हाम्रा मुख्य एजेन्डा हुन्। यी सबै एजेन्डाको सम्बोधन गरी कार्यान्वयनका लागि मेरो उम्मेदवारी हो।
जनताले तपाईंलाई भोट किन दिने ?
मैले पाउने पारिश्रमिक सामाजिक काममा खर्च गर्छु भनेर प्रतिबद्धता जनाइसकेको छु। मैले राजनीति पैसा कमाउन गर्ने होइन, सामाजिक सेवाका लागि गर्ने हो। म लामो समयदेखि सामाजिक सेवाका क्षेत्रमा क्रियाशील छु। मैले उद्योगी–व्यवसायीको मर्का बुझेको छु। यस हिसाबले करदाता र रोजगारदाताको सम्मानका लागि पनि मेरो उम्मेदवारी हो। जडिबुटीका कारखानाहरु खोलेर भारतमा कच्चा पदार्थ होइन, प्रशोधित पदार्थ निकासी गरिनेछ। कामका लागि विदेश जानुपर्ने बाध्यता हटाउँदै यहीँ रोजगारीको सिर्जना गरिनेछ।
तपाईंका क्षेत्रका खास समस्या के–के छन्, त्यसलाई कसरी समाधान गर्नुहुन्छ?
मेरो क्षेत्रमा ढल निकास र डुबानको समस्या छ। अव्यवस्थित घरहरु बनेका छन्। सबै ठाउँमा ढल, बिजुली र पक्की सडकको व्यवस्था गर्न स्थानीय सरकारसँग हातेमालो गरेर अघि बढ्नेछु। तरकारी र कृषि उपजलाई बजारीकरण गरी उत्पादित वस्तुको उचित मूल्य पाउने व्यवस्था गरिनेछ। अहिले पनि नेपालगन्जमा लोडसेडिङको समस्या छ, यसको अन्त्यका लागि विशेष पहल गर्नेछु। नेपालगञ्जको फोहोर व्यवस्थापनलाई उच्च प्राथमिकतामा राखेको छु।
अन्तमा केही भन्न चाहनुहुन्छ?
अति पिछडिएका चिडिमार, लोनिया, घसियारा, बेहना, वाल्मिकी लगायतका समुदायलाई आवश्यक सेवा प्रवाह गरी राज्यको मूलधारमा ल्याउन विशेष पहल गर्नेछु। जीर्ण रहेका धार्मिक स्थलहरुको मर्मत सम्भार गर्नुका साथै धार्मिक सद्भाव बढाउन पहल गर्नेछु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
