लामो समयदेखि शिक्षा तथा खेलकुद क्षेत्रमा सक्रिय गीता राणा तीन पटक एन-प्याबसनको अध्यक्ष, नेपाल ओलम्पिक कमिटीको सदस्य, नेपाल स्वीमिङ एसोसिएसन र नेपाल जिमनास्टिक संघको केन्द्रीय उपाध्यक्ष रहिसकेकी छिन्।
२०६४ सालको संविधानसभा निर्वाचनमा लोकतान्त्रिक फोरमबाट समानुपातिक सभासद बनेकी राणा अहिले कैलाली निर्वाचन क्षेत्र नम्बर ४ बाट प्रतिनिधिसभा सदस्यका लागि स्वतन्त्र रुपमा उठेकी छिन्। सो क्षेत्रबाट वाम गठबन्धनका लेखराज भट्ट र लोकतान्त्रिक गठबन्धबाट सुनिलकुमार भण्डारी चुनावी प्रतिस्पर्धामा छन्।
उम्मेदवार राणासँग नेपाल लाइभका संवाददाता शेरबहादुर ऐरले गरेको कुराकानी:
चुनाव आउनै लागिसकेको छ। प्रचारप्रसारलाई कतिको तीव्रता दिइरहनुभएको छ?
राजनीतिक दलहरुले भोट पाउनका लागि थुप्रै आश्वासन दिने तर जितेर गएपछि फर्केर पनि नहेर्ने गरेको गुनासो मतदाताहरुले गरिरहेका छन्। म घरदैलो अभियानमा जाँदा यो प्रत्यक्ष अनुभव गरेको छु। आफूहरुलाई आश्वासन दिनेभन्दा पनि काम गर्ने उम्मेदवारलाई मत दिने सोचमा छन् उनीहरु।
अहिले म जनताको अगाडि गएर आफ्नो परिचय दिँदैछु र मैले गरेका कामबारे जानकारी गराइरहेकी छु। मैले यो क्षेत्रका लागि अझै के गर्नुपर्छ भनेर उनीहरुबाटै सुझाव पनि लिइरहेकी छु। यस क्षेत्रको विकास, महिला सशक्तीकरण लगायतका विषयमा उनीहरुसँग कुरा गरिरहेकी छु।
क्षेत्र नम्बर ४ बाटै स्वतन्त्र उम्मेदवारी किन नि?
स्वतन्त्र उम्मेदवारी दिनुको कारण पार्टीको आस्था, विचार, सिद्धान्तको संरक्षण गर्न हो। हाम्रो पार्टी मधेसी जनअधिकार फोरम लोकतान्त्रिक देशको ठूलो पार्टी नेपाली कांग्रेसमा गएर एकीकरण भयो। ठूलो पार्टीको एजेन्डा भनेको विकास मात्र हो, तर हाम्रो पार्टीको एजेन्डा वर्ग, समुदायलाई सशक्तीकरण गर्ने, खोलानालाको संरक्षण गर्ने लगायत हो। हाम्रो सिद्धान्त, विधि, तरिका फरक छ।
हरेक ठाउँमा विकल्प चाहिन्छ, प्रतिस्पर्धा चाहिन्छ। जबसम्म विकल्प हुँदैन तबसम्म देश विकासको बाटोमा अघि बढ्दैन। जनताले विकल्प चाहिरहेका छन्। मेरो स्वतन्त्र उम्मेदवारी उनीहरुका लागि चाहिने विकल्प हो।
क्षेत्र नम्बरमा ४ मा ससाना समस्या धेरै छन्। अन्य दलले विकासका ठूलाठूला आशा देखाउँदै उम्मेदवारी दिएका छन्। मैले साना–साना समस्याको समाधान गर्नका लागि उम्मेदवारी दिएको हुँ।
यस क्षेत्रको समस्या केके हुन् त?
विकाससँगै मानिससँग जोडिएका थुप्रै समस्या छन् यहाँ। वर्ग अनुसारको समस्या फरक छ। किसानको समस्या भनेको समयमा मल नपाउने, बिउबिजन नहुने, सिँचाइको व्यवस्था नहुने हो। महिलाहरुका लागि तालिम नभएपछि आर्थिक समृद्धि कसरी गर्ने भन्ने छ। युवाहरुमा बेरोजगारको समस्या छ। व्यावसायीहरुका लागि आवश्यक नीति, कार्यक्रम, योजनाहरु छैनन्। बालबालिकाहरुलाई राम्रो, गुणस्तरीय शिक्षाको व्यवस्था छैन। अल्पसंख्यक जातजातिहरुको जीवनस्तर धेरै तल रहेको छ। पुलहरु नहुँदा एक बस्तीदेखि अर्को बस्ती पुग्न गाह्रो छ। पानी निकासको समस्या यहाँ पनि उस्तै छ।
यी त स्थानीय समस्या भए। मतदातासामु तपाईंले लिएर जाने मुख्य एजेन्डा केके छन्?
मैले विकास सँगसँगै मानिसको सशक्तीकरणमा जोड दिएकी छु। विकासका एजेन्डा त सबै राजनीतिक दलका हुन्। विकासका नाममा धेरै बाटो र पुलहरु बनाउँछौ तर, खोलानाला, रुख, हिमालहरुको संरक्षणमा ध्यान दिएका छैनौं। मैले विकासका नाममा विनाश नभई हिमाल, पहाड, बोटविरुवा, जंगली जनावरको संरक्षणमा पनि ध्यान दिनुपर्ने बताउँदै आएकी छु।
अहिले कैलालीमा कटानीको समस्या धेरै छ। म त्यो रोक्न पहल गर्छु। सहरभित्रैका बस्तीमा बाटो नहुनाले दुर्गम भइरहेका छन्। ती दुर्गम गाउँलाई सुगम बनाउन पहल गर्छु। यहाँ विभिन्न जातजातिका व्यक्तिहरुको बसोबास छ; उनीहरुको संस्कृति, संस्कार, धर्मको संरक्षण गर्न पहल गर्छु र अल्पसंख्यक जातिको जीवनस्तर सुधार्न पहल गर्नेछु।
गठबन्धनका उम्मेदवारहरुसँग प्रतिस्पर्धा गरिरहनुभएको छ। जित हासिल गर्छु भन्ने लाग्छ?
जनताले सरल, सक्षम र केही काम गरेर देखाउने उम्मेदवार रोज्छन्। मैले यस क्षेत्रको विकासका लागि सांसद हुँदा र नहुँदा पनि धेरै काम गरेको छु। यस क्षेत्रका महिलाको सशक्तीकरणका लागि काम गरेकी छु। सडक ग्राभेल, दुई बस्ती जोड्न कल्भर्ट निर्माण लगायतका काम गरेकी छु। मेरो कामको मूल्यांकन गरेर नै जनताले मत दिने अपेक्षा गरेकी छु। मैले गरेका कामहरु नै जित्ने आधार हुन्।
मैले सांसद विकास कोषको रकम यसै क्षेत्रमा खर्च गरेको छु। बाटोघाटो ग्राभेलिङ गर्ने, मन्दिर निर्माण गर्न, विद्यालयको भवन निर्माण, शुद्ध खानेपानीको व्यवस्था गर्ने लगायत धेरै काम गरेको छु।
मैले स्थानीय जनताका लागि गरेको कामले नै उनीहरुक मत मेरा लागि आउँछ भन्ने विश्वास छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
