राष्ट्रिय जनता पार्टी (राजपा) का महासचिव मनिष सुमन मंसिर २१ गते हुने दोस्रो चरणको निर्वाचनमा सप्तरी क्षेत्र नम्बर २ (ख) मा प्रदेशसभा सदस्यका उम्मेदवार हुन्। सप्तरीमा राजपा–संघीय समाजवादी फोरम गठबन्धनका संयुक्त उम्मेदवार रहेका सुमनसँग निर्वाचनको सन्दर्भमा नेपाल लाइभका किशोर दहालले राजविराजमा गरेको कुराकानीः
प्रतिनिधिसभाभन्दा प्रदेशसभामा के त्यस्तो बढी आकर्षण छ, जसले गर्दा प्रदेशसभाको उम्मेदवार बन्नुभयो?
म योभन्दा अघि चुनाव लडेको थिइनँ, त्यसकारण यो मेरो पहिलो चुनावी प्रतिस्पर्धा हो। पहिलो कारण त यही नै हो। त्यस्तै, मधेसकै एक जना शीर्ष नेता उपेन्द्र यादवले यही क्षेत्रबाट प्रतिनिधिसभाको लागि उम्मेदवार हुने इच्छा व्यक्त गर्नुभयो। उहाँ यहीँ जन्मे–हुर्केको, पढेको व्यक्ति हो। हिजोसम्म उहाँको कर्मक्षेत्र अन्यत्र रह्यो। तर, यसपटक जन्मभूमिबाटै चुनाव लड्ने भनेर इच्छा गरेपछि मैले उहाँलाई सहयोग गर्नु आवश्यक देखेँ। मेरो पहिलो निर्वाचन प्रदेशसभाकै लागि लडूँ, जनतालाई सेवा गर्ने जुन अभिप्राय छ, त्यो प्रदेशसभाबाटै सुरु गरुँ भनेर त्यसकै उम्मेदवार बनेको हुँ।
यहाँबाट नभए पनि अन्य क्षेत्रबाट चुनाव लडेर पनि जित्न सक्नुहुन्थ्यो होला नि?
जो जहाँको स्थानीय हो, उसले त्यहाँ बढी महत्त्व पाउँछ। मैले मेरो जन्मभूमि र कर्मभूमि, जहाँबाट मैले राजनीति सिकेँ र जहाँका जनतासँग, मतदातासँग मेरो प्रत्यक्ष नै सम्बन्ध छ, मैले त्यही ठाउँ रोजेँ। त्यसैले मैले अन्यत्र पनि मेरो लोकप्रियता छ भन्ने दम्भ राखिनँ। जनताले पनि यहीँबाट चुनाव लड्न आग्रह गरेकाले मैले यही ठाउँ रोजेँ।
तपाईंजस्तो मधेसको मुद्दालाई सैद्धान्तिक रुपमै बहस गर्न सक्ने मानिस प्रतिनिधिसभामा हुँदा मधेसको माग पूरा गराउन झन् बढी सघाउ पुग्थ्यो भन्ने लागेन?
जनताको सेवा गर्नु छ भने जुनै पदमा भएर पनि जनताको सेवा गर्न सक्छ। हिजोसम्म म कुनै सभाको सांसद थिइनँ। तर, म जनताकै बीचमा बसेर काम गरिरहेको थिएँ। मैले मधेसका लागि गर्न सक्ने कामहरु गरिरहेको थिएँ। त्यसको उचित मूल्यांकनको अवसर आएको छ। त्यसैले मैले आफ्नै क्षेत्र रोजेँ। अर्कोपटक हेरौं के हुन्छ!
मुख्यमन्त्री हुने रहर पनि हो कि?
राजनीति गरिसकेपछि इच्छा त हुने नै भयो। हाम्रो सर्वेक्षण र मिडियाको सर्वेक्षणमा २ नम्बर प्रदेशमा हाम्रै पार्टीकै बहुमतको सरकार बन्दैछ भन्ने देखिन्छ। त्यस्तो अवस्था आयो भने मधेस गठबन्धनको संसदीय दलको बैठकले मुख्यमन्त्रीको नाम तोक्ला। अवसरै आयो भने त पछि किन हट्नु र? स्वीकार गर्छु।
तपाईं चुनाव प्रचारप्रसारमा घुमिरहनुभएको छ। जनताको अपेक्षा के पाउनुभएको छ?
हिजो हामीले गरेको आन्दोलनप्रति जनताको ठूलो सम्मान छ। ठूला दलले एकतर्फी रुपमा जारी गरेको संविधानमा संशोधन खोजेका छन्। विकासतिर पनि जनताको बढी इच्छा छ। मैले निर्वाचन लडिरहेको सप्तरी २ (ख) मा राजविराज पर्छ, यो सबैभन्दा पहिलो ‘प्लान सिटी’ हो। यो शहरको कल्पना गरिरहँदा देशकै अर्को शहर त्यति कल्पित थिएन। काठमाडौंभन्दा पहिलेको हाम्रो शहर हो। तर, यसको अवस्था खराब छ। यसको कारण सच्चा प्रतिनिधि नपाउनु नै हो।
यो जिल्ला कुनै बेला देशकै शिक्षित जिल्लामध्येमा थियो। अहिले यहाँको शिक्षाको अवस्था खस्किँदै गएको छ। यहाँ स्वास्थ्यको ग्यारेन्टी छैन। बिरामी भएपछि अन्यत्र जानुपर्ने बाध्यता छ। हामीसँग गजेन्द्रनारायण सिंह औद्योगिक क्षेत्र छ। त्यहाँ १८/२० वटा उद्योग खोल्न सकिन्छ। तर, त्यहाँ उद्योग खोल्ने कामको सुरुवात नै हुन सकेको छैन। उद्योगपतिहरु यता आकर्षित भएका छैनन्। त्यहाँ पूर्णरुपमा उद्योग खोलिए सप्तरी जिल्लाको शत प्रतिसत नै बेराजगारी समस्या समाधान हुन्छ। जिल्लाले ठूलै कोल्टे फेर्न सक्छ। जनताको अपेक्षा यस्तै छ। हामीले पनि यिनै मुद्दा लिएर जनताको माझमा गइरहेका छौं। यो अपेक्षालाई निर्वाचित भएपछि हामी पूरा गर्नेछौं।
जित्नेमा कत्तिको आशावादी हुनुहुन्छ?
म ढुक्क छु। यहाँका जनताले मलाई एकदमै माया गरिहरेका छन्। अहिलेको चुनाव प्रचारप्रसारमा जनताले देखाइरहेको सद्भावले पनि मलाई विश्वस्त बनाएको छ। विपक्षीले पैसाकै चलखेल गरेछन् भने पनि मेरो जितलाई रोक्न सक्दैनन्। अर्कोतिर मेरा प्रतिस्पर्धी पनि म जत्तिको योग्य छैनन्। मेरा प्रतिस्पर्धीहरु हिजो रमेश महतोको लाश चोर्नेहरु हुन्। उनीहरु हिजोसम्म समाजिक परिचय र पहिचान नभएकाहरु हुन्। तसर्थ पनि मेरो जित सहज छ।
वाम गठबन्धन र लोकतान्त्रिक गठबन्धनको कुरा आइरहेको छ। त्यसले कत्तिको चुनौती दिइरहेको छ?
वाम गठबन्धनले हिजो मधेसी भनेरै, मधेसी भएरै हामीसँग मत मागेर गएका थिए। तर, उनीहरुले मतदाताको इच्छा विपरीत संविधानमा हस्ताक्षर गरे। त्यसैले ती पार्टीहरुलाई अहिले जनताले हेर्न पनि चाहेका छैनन्। ती पार्टीका यहाँका उम्मेदवारहरुले म पनि तिम्रै समुदायको हुँ, म पनि तिम्रै भाषा बोल्छु भनेर ढिपी कसे पनि जनताले पत्याएका छैनन्। ती चल्ने भनेको केपी ओलीको आदेशले हो, शेरबहादुर देउवाको आदेशले हो, प्रचण्डको आदेशले हो। त्यसैले वाम गठबन्धन र नेपाली कांग्रेसका उम्मेदवारहरुलाई जनताले ठूलै जवाफ दिनुपरेको छ। उनीहरुका विगतका कर्तुतलाई हेर्ने हो भने मधेसी गठबन्धनको जित सहजै हुने वातावरण निर्माण भइरहेको छ।
प्रदेश २ मा प्रदेशसभाका लागि कति जति सिट जित्ने अनुमान छ?
यति–उति भनेर ढिपी नकसौं। तर यहाँ मधेस गठबन्धनको दुई तिहाइ बहुमतको नजिक–नजिक पुग्छौं।
प्रदेशसभामा तपाईंहरुले गर्ने नीतिगत कामहरु केके हुन्छन्?
संविधानमा भएका खोट र त्यसलाई सुधार गर्नुपर्ने दबाब हाम्रो तर्फबाट पनि हुन्छ। संघीयतालाई संस्थागत गर्न प्रदेशसभाका सांसदहरुले पनि सक्छन्। काठमाडौं मात्रै देश हो, काठमाडौंका जनता मात्रै जनता हुन्, काठमाडौंको विकास मात्रै गर्नुपर्छ भन्ने राज्यसत्ताको मानसिकता छ। त्यहाँबाट बाहिर निस्कनेबित्तिकै यो मुलुकमा देहात, गाउँ, कुनाकन्दरा, साना-ठूला शहर पनि छन्, तिनी पनि नेपाली नै हुन्, नेपालकै भूभाग हो भन्ने अनुभूति गर्न पाइन्न। त्यसैले संविधानलाई स्थापित गर्दा हामी प्रदेशसभावालाहरुले काठमाडौं मात्रै मुलुक हो भन्ने ठम्याइबाट मान्छेलाई उकास्छौं। यहाँ पनि विकास गर्छौं।
पाँच वर्षपछि तपाईंको क्षेत्र कस्तो हुनेछ?
त्यतिबेला तपाईं मेरो निर्वाचन क्षेत्रमा आउनुभयो भने सफा र सुन्दर पाउनुहुनेछ। सडकहरु गुणस्तरयुक्त हुनेछ। बेरोजगारीको समस्या अधिकतम रुपमा समाधान भएको पाउनुहुनेछ। अस्पतालहरुको विकास देख्न पाउनुहुनेछ। ठूला कलकारखाना खोलिएका हुनेछन्। मेरो क्षेत्रले कायापलट गरेको देख्न सक्नुहुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
