इटहरी- ‘भएभरको सम्पत्ति सबै सकियो। म आफैं पनि रोगी थिएँ। उपचार हुन्छ भनेर क्रस्चियन (सियोन) मा लागेँ। मेरो रोग जाती हुनु त कता हो कता, उल्टै श्रीमती पनि मानसिक रोगी भएर सियोनबाट फर्किइन्। रोगी श्रीमतीको हेरचाह गर्नैमा मेरो दैनिकी बितिरहेको छ। सम्पत्ति जति 'स्वाहा' पारेर सुकुम्बासी भइएको छ,’ राजेन्द्र सिटौलाले धारावाहिक रूपमा व्यथा सुनाए।
सन् २००८ देखि 'विश्व सुसमाचार समाज-सियोन' को सदस्य बनेका हुन् राजेन्द्र। तर अहिले त्यसबाट छुटकारा पाउन सकस छ उनलाई। एक साताअघि विवादित बनेको सियोन चर्च प्रकरणको भिडियो नेपाल लाइभमा सार्वजनिक भएपछि उनको मन उकुसमुकुस भएको छ। ‘कहिले भेटौं र कहाँ भेटौं भयो,’ उनी भन्छन्, 'पीडा बुझ्ने कोही नभएर इटहरी आएँ।'
नेपाल लाइभले प्रकाशित गरेको भिडियोसहितको रिपोर्ट हेरेपछि इटहरी आउने इच्छा उत्कर्षमा पुगेको बताउँछन् उनी। ‘भिडियोमा देखिएका अभिषेक र आयुसाले खेपेको पीडाभन्दा पनि ठूलो पीडामा बाँच्नुपरेको छ। यही कुरा सुनाउनकै लागि इटहरीसम्म आएको हुँ,’ उनले भने।
झापाको बिर्तामोड नगरपालिका पुर्ख्यौली घर भएका सिटौलाले क्रिस्चियन धर्ममै लागेर सम्पूर्ण सम्पत्ति गुमाउनु परेको खुलाएका छन्। यति मात्रै होइन, त्यही तनावको श्रीमतीको मानसिक सन्तुलनसमेत गुमेको उनको दाबी छ। 'श्रीमतीको मानसिक सन्तुलन र सम्पूर्ण सम्पति गुमाउनुपरेको पीडा बोकेर यहाँसम्म आएँ,' उनले भने।
सिटौला सन् २००८ मा परमेश्वरको मण्डली विश्व सु-समाचार समाज (सियोन) को सदस्य बने। यसपछि झापामा बस्दा धेरै दुःखको सामना गर्नुपरेको महसुस उनले गरे। 'सधैं दुःख खेपेर हुँदैन, केही गर्नुपर्यो, कसैले नदेख्ने ठाँउमा केही गरौं भन्ने लागेर काठमाडौं हानिएँ,' सिटौलाले थपे, 'त्यसबेला मलाई कसैको साथ र सहयोगको ठूलो महत्व हुने अवस्था थियो। सानो सहयोग पनि ठूलो वरदान हुने अवस्था थियो।'
भिडियो
त्यतिकैमा काठमाडौंको नयाँबजारको एक गार्मेन्ट उद्योगमा सेक्युरेटी गार्डको जागिर सुरु गरे उनले। केही दिनपछि एक महिलासँग उनको भेट हुन पुग्यो। तिनै महिलाले सिटौलाजस्ता दुःखी गरिबको सेवा गर्ने र समस्याबाट मुक्ति दिलाइदिने बताईन्। उनलाई पनि ढुङ्गा खोज्दा देउता मिलेजस्तै भयो।
त्यसपछी दैनिकीमा परिवर्तन आयो उनको। समस्या उस्तै भएपनि कामको बोझ थपियो। हरेक शनिबार चर्च धाउनुपर्ने भयो। धुम्बाराहीमा रहेको सियोनको कार्यलयमा धाउन थाले उनी। त्यति मात्र होइन, उनी र उनको परिवार चर्चले भनेको 'मुक्ति'को लोभमा सियोनको विश्वासी बने। त्यहीँ उनले 'बत्तिस्मा' लिए (कसम खाए)।
केही महिना काठमाडौंको बसाइपछि उनी पुनः बिर्तामोड नै फर्किए। धुम्बाराही सियोनमा हुने उनको उपस्थिति बिर्तामोड सियोनमा सर्यो। उनको भन्दा पनि श्रीमती धनमायाको दैनीकीको बढीजसो समय सियोनमा नै बित्न थाल्यो। सम्पूर्ण जीवन नै सियोन हो भन्ने गरी उनी लागिन्।
सियोनप्रतिको लगाब बुझेर बिर्तामोड सियोनका प्रमुख पर्शुराम तिम्सिनाले भेटीको प्रस्ताव ल्याउन थाले। राजेन्द्र र धनमायाले मासिक हजार रुपैयाँ दशांशका रुपमा बुझाउनुपर्ने भयो। त्योभन्दा बाहेक भेटी रकम बुझाउनुपर्ने प्रस्ताव आउन थाल्यो तिम्सिना लगायत चर्च परिवारबाट। उनीहरुले पनि नाइँ भन्न सकेनन्।
त्यहीबेला सन् २०१२ मा विश्व प्रलय हुन्छ भन्ने हल्ला फैलियो। त्यसपछि तिनै तिम्सीनाले विश्व प्रलयबाट बच्न भन्दै थप पैसा माग्न थाले। विश्व प्रलय भए पनि सियोन चर्चहरुमा केही असर नपर्ने तिम्सिनाले दाबी गरेको राजेन्द्रले बताए। विश्व प्रलयपछि बस्न र खान सुरुदेखि नै भेटी जम्मा गर्नुपर्ने दबाब सुरु भयो।
सिटौलासँग भेटी दिन पर्याप्त पैसा थिएन। दिन सक्दिनँ भन्दा पनि धर नपाउने अवस्थामा पुगे उनी। उनीसँग एउटै विकल्प बाँकी रह्यो। भएभरको सबै जग्गा बिक्री गर्ने। त्यसपछि उनले आफ्नो नाममा भएको जग्गा बिक्री गर्ने निर्णय गरे। धुलाबारीको १ कठ्ठासहित ११ कठ्ठा जग्गा ७ लाखमा बिक्री गरे। त्यसपछि उनको नाममा एक धुर पनि जग्गा बाँकी रहेन।
‘जग्गा बिक्री भएपछि सुरुमै ६० हजार रुपैयाँ 'क्यास' भेटी चडायौँ,’ उनले भने, ‘त्यसपछि जग्गा बेचेको दशांश र बाँकी भेटी बुझाउँदा बुझाउँदै ७ लाख सकियो। अनी सुकुम्बासी भइयो।’
भेटी बुझाउन नसक्दा सियोनबाट निष्कासन
सन् २०१२ मा विश्व प्रलय नभएपछि माता परमेश्वरले विश्व बचाएको भन्दै आश्वासन दिने गरेको उनी बताउँछन्। उनकी श्रीमती धनमाया सोही चर्चमा काम गर्थिन्। पछि तिनै तिम्सीनाले उनलाई टिम लिडर बनाउने र कोरिया लैजाने आश्वासन दिए। उनी पनि टिम लिडर बन्न राजी भइन्। धनमाया त्यसैप्रति एकोहोरो भइसकेकी थिइन्। आफ्नो सम्पूर्ण जीवन नै सियोन हो भन्ने लाग्न थालेको थियो उनलाई। त्यो कुरा चर्चका तिम्सीनाले राम्ररी बुझिसकेका थिए।
टिम लिडरले २ लाख रुपैयाँ भेटी बुझाउनुपर्ने भयो। उनले भेटी बुझाउन सकिनन्। त्यसपछि उनलाई सियोनबाट निष्काशन गरियो। उनलाई सियोनविरोधी, अगमवक्ताको विरोधी भएको आरोप लागाएर उनलाई निकालिएको थियो।
धनमायामा मानसिक रोग देखापर्नुको मुख्य कारण त्यही रहेको बताउँछन् राजेन्द्र। ‘उनीलाई बिस्तारै डिप्रेसनले सिकार बनाउँदै लग्यो। उपचारका लागि पाटन अस्पतालसम्म पुर्याइयो। तर नियमित औषधि सेवन नगरेको कारण झनै समस्या बढेर गएको छ,’ उनी भन्छन् ,‘उनको अवस्था अहिले निकै नाजुक बनिसकेको छ। कहिले हिडिरहने, कहिले चिच्याउने त कहिले हाँसिरहने लगायतका मानसिक समस्या देखा परेका छन्। मुक्ति मिल्छ भन्नेहरूले पैसा भइन्जेल चुसे, अहिले हेला गर्न थाले।’
एक छोरा र एक छोरीका बाबु राजेन्द्र आफू फसे पनि अरु नफसुन् भन्ने चाहन्छन्। श्रीमतीको हेरचाह गर्नुलाई नै उनको दैनिकी बनेको छ। दुःखसुख साटासाट गर्ने बेला दुखैदुःख मात्र खेपिरहेको बताउछन् उनी। भन्छन्, ‘म धेरै अभागी रहेछु।’
आफ्नो जस्तै पीडा सयौं जनाको भएपनि कसैले बोल्ने आँट गर्न नसकेको उनी बताउँछन्। प्रलोभनमा परेर सियोनमा लाग्नेहरुलाई आफूजस्तै नफस्न सल्लाह दिन्छन् उनी। भन्छन्, ‘अब कोही पनि यस्तो भ्रममा नपर्नुहोला। मैले जस्तो दुःख पाएर नपछुताउनुहोला।’
यो पनि :
धर्म परिवर्तन गराउँदै हिँड्ने अमेरिकनलाई अध्यागमनको 'ग्रिन सिग्नल', कारबाहीबिनै छुटिन् क्वान्टा
धर्म परिवर्तनको खेल : श्रीमान्को परिवार नियोजन, श्रीमतीलाई 'एबोर्सन' [भिडियो]
समाजसेवाको आवरणमा यसरी हुन्छ धर्मप्रचार [फलोअप]
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
