समाजसेवाको आवरणमा यसरी हुन्छ धर्मप्रचार [फलोअप]

विनय बाह्रकोटी | २०७६ बैशाख १४ शनिबार | Saturday, April 27, 2019 २०:०८:०० मा प्रकाशित

इटहरी– सन् २००८ मा जम्मा ४ वटा चर्च रहेको सुनसरीको इटहरीमा हाल त्यो संख्या बढेर ७५ भन्दामाथि पुगेको छ। एउटा चर्चमा न्यूनतम २ सय विश्वासीहरूले प्रार्थना गर्ने गरेका छन्। 

इटहरीमा चर्चको संख्या बढिरहँदा कतिपय भने विवादमुक्त छैनन्। केही दिनदेखि विवादमा तानिएको ‘परमेश्वरको मण्डली विश्व सुसमाचार समाज’ (सियोन) इटहरीको सबैभन्दा धेरै विश्वासी भएको चर्च हो।

यहाँ नियमित आउने विश्वासी दुई हजारभन्दा बढी संख्यामा छन्। सियोनले कोरियन सामाजिक संस्था ‘इन्टरनेसनल वी लभ फाउन्डेसन’को लोगोमा विश्वासी बढाउने कामलाई तीव्रता दिँदै आएको छ। फाउन्डेसनले यहाँ विशाल चर्चको समेत स्थापना गरेको छ। 

सोही चर्चबाट विस्थापित युवा अभिषेक कार्कीले उक्त संस्थाको माध्यबाट क्रिस्चियन धर्म प्रचारको शृंखला व्यापक बढिरहेको जानकारी दिए।

फाउन्डेसनको आधिकारीक न्युज पोर्टल ‘एक्जामिन द वर्ड मिसन सोसाइटी चर्च अफ गड’मा विश्वभर मिसनको प्रचार व्यापक भइरहेको बताइएको छ। सन् १९९९ मा कोरियामा सुरु भएको यस फाउन्डेसनले २०१० बाट औपचारिक रुपमा अभियान चलाएको पाइन्छ। फाउन्डेसनको आधिकारिक वेबपेजका अनुसार ५१ वटा देशमा १ लाख ५५ हजार सदस्य आबद्ध भइसकेका छन्। 

कोरियन महिला ‘जाङ घिल जा’ अर्थात् ‘चर्च अफ गड’ (उनीहरुकै भाषामा ‘माता परमेश्वर’) संस्थापक रहेको उक्त संस्थाले विश्वव्यापी रुपमा आफ्नो प्रभाव विस्तार गर्दै गइरहेको छ। तिनै महिलालाई माता परमेश्वर मान्ने ‘वर्ल्ड मिसन सोसाइटी चर्च अफ गड’ भने सन् १९६४ मा कोरियाली नागरिक आन साङ होङ ले खोलेका हुन्। 

फाउन्डेसनको ब्लगमा उल्लेख भए अनुसार अपांग बालबालिका, महिला, वृद्धवृद्धा, अपांग, प्रकोपपीडित, शरणार्थी र गरिबको क्षेत्रमा काम गर्ने भनी देखाएको छ। जहाँ सन् २०१८ बाट संयुक्त राष्ट्रसंघको ‘विश्वव्यापी सूचना विभागमा’ मान्यता पाएको दाबी गरिएको छ। त्यही आधारमा यसले नेपालमा पनि आफ्नो प्रचारलाई व्यापक बनाइरहेको छ। 

सो फाउन्डेसनले नेपाल सरकारबाट अनुमतिसमेत लिएको छैन। सुनसरीका प्रमुख जिल्ला अधिकारी ओमप्रकाश अधिकारी आफूलाई यस विषयमा कुनै जानकारी नभएको बताउँछन्।

इटहरी-३ स्थित पुरानो युकी चाउचाउको फ्याक्ट्री भएको भवनमा चर्च स्थापना गरी पूर्वी नेपालका १६ जिल्लामा धर्म प्रचार गर्ने गरिएको छ। त्यति मात्रै होइन भारतको सिक्किम, दार्जिलिङ, बिहार लगायत खाडी मुलुकसम्म पनि इटहरीकै चर्चको नेतृत्वमा धर्म प्रचार भइरहेको छ।

उक्त फाउन्डेसन अन्तर्गत नेपालमा मात्रै ठूला १ सय ५३ चर्च छन्। तर, यीमध्ये काठमाडौंको बसुन्धरामा रहेको चर्चमात्र नेपाल सरकारको जानकारीमा छ। अरु चर्चबारे नेपाल सरकार र स्थानीय प्रशासनसमेत अनभिज्ञ छन्। सोही फाउन्डेनसको आधिकारिक अनलाइनमा वी लभ फाउन्डेसन डट ओआरजीका अनुसार ६७ देशमा यसले शाखा विस्तार गरिसकेको छ। जसमा २ लाख ९१ हजार ५ सय ५३ सदस्य आबद्ध रहेका छन्।

सो फाउन्डेसनले नेपाल सरकारबाट अनुमतिसमेत लिएको छैन। सुनसरीका प्रमुख जिल्ला अधिकारी ओमप्रकाश अधिकारी आफूलाई यस विषयमा कुनै जानकारी नभएको बताउँछन्। तर, सोही फाउन्डेसनको कार्यक्रममा सांसददेखि उच्च पदस्थ कर्मचारीसम्म सामेल भइरहेका छन्।  

इटहरीमा मुख्य कार्यालय रहेको ‘इन्टरनेसनल ट्रेनिङ एन्ड रिसर्च सेन्टर’ले मन्टेश्वरी पढाउने शिक्षिकालाई तालिम दिन्छ। त्यति मात्र होइन आफ्नै मन्टेश्वरी पनि सञ्चालनमा छ।

मन्टेश्वरीमार्फत विद्यार्थीलाई फाउन्डेनको कार्यप्रति आकर्षित गराउने गरिएको छ। हाल उक्त सेन्टरले इटहरीबाहेक पूर्वका ५ स्थानमा शाखा सञ्चालन गर्दै आएको छ। 

मन्टेश्वरी मात्र होइन समाजसेवा जस्तो देखिने गरी मिसनरी परिचालन गरी वृद्धाश्रममा पनि सेन्टरले आफ्नो उपस्थिति देखाउन थालेको छ। इटहरी उपमहानगरपालिका-१६ मा अवस्थित रामजानकी वृद्धाश्रममा मिसनले बारम्बार राहत सामग्री बाँड्दै आएको छ।

'एना सफ्टवेयर डेभलपमेन्ट कम्पनीसमेत दर्ता गराई त्यसमार्फत पनि धर्म प्रचार हुने गरेको छ,' सोही चर्चबाट भरखरै बाहिरिएका एक युवा भन्छन्, 'कम्पनीले सफ्टवेयर बेच्चे र सूचना संकलनको काम गर्छ। नेपालमा पनि सो कम्पनीमार्फत मिसनरी फैलाउने काम भइरहेको छ।'

नक्कली धर्मको संज्ञा 
इसाई धर्मभित्र मुख्यत: प्रोटेस्टेन्ट र क्याथोलिक गरी दुई सम्प्रदाय छन्। तर, पछिल्लो समय इसाई धर्म हो भन्दै प्रचार गर्ने सियोन यी सम्प्रदायभित्र पर्दैन। युनिफिकेसन, मोर्मोन, जेओबा विटनेस, विश्राम मण्डली, चर्च अफ क्राइस्ट लगायत अन्य धेरै समूहमा यो धर्म विभाजित भएको छ। हाल सबैभन्दा धेरै प्रचारको अभियानमा लागेको सियोनले आफू अरुभन्दा पृथक् र खास क्रिस्चियन भएको दाबी गर्दै आएको छ। 

केही दिनअगाडिको घटनाप्रति इंगित गर्दै इसाई समाज इटहरीले एक विज्ञप्ति नै जारी गर्‍यो। सो विज्ञप्तिमार्फत समाजले केही दिनदेखि क्रिस्चियन समाजलाई विवादित बनाउने काम भइरहेको प्रति आफ्नो ध्यानाकर्षण भएको बताएको छ। हाल विवादमा रहेको परमेश्वरको मण्डली विश्व सुसमाचार समाज क्रिस्चियन नभई अन्य कुनै मिसनरी भएको उसको दाबी छ। उनीहरु प्रभु यशुलाई नमान्ने भएकाले उनीहरु इसाई हुन नसक्ने तर्क समाजले गरेको छ।

यो पनि : धर्म परिवर्तनको खेल : श्रीमान्‌को परिवार नियोजन, श्रीमतीलाई 'एबोर्सन' [भिडियो]