काठमाडाैं- पूर्व प्रधानमन्त्री एवं सत्तारुढ दल नेकपाका अध्यक्ष पुष्पकमल दाहाल 'प्रचण्ड'ले प्रदेशलाई दिएको अधिकार र कर्मचारीको कार्यशैलीप्रति चिन्ता व्यक्त गरेका छन्।
प्रदेश ३ सरकार र प्रदेश नीति तथा योजना आयोगले शुक्रबार भरतपुरमा आयोजना गरेको निजी क्षेत्रसँगकाे अन्तरक्रिया कार्यक्रममा नेकपा अध्यक्ष दाहालले संविधानअनुसार प्रदेश सरकारलाई दिएको अधिकार र कर्मचारीको पुरानै कार्यशैलीप्रति चिन्ता व्यक्त गरेका हुन्।
अधिकारको प्रत्यायोजनमा पर्याप्त ध्यान नदिँदा प्रदेशका आर्थिक अधिकार कमजोर हुँदै जाने र राज्य सञ्चालनको व्यवस्थाप्रति नै वितृष्णा उत्पन्न हुनसक्ने भन्दै उनले यसबारे प्रतिपक्षी दलहरुसँग पनि गम्भीर विमर्श गरेर अघि बढ्नुपर्नेमा उनले जोड दिए।
उनले भने, 'प्रदेश कमजोर हुँदै जाने हुन् कि! प्रदेश लावारिश हुँदै जाने, निरीह हुँदै जाने, प्रदेशको हातमा राज्यको अधिकार या विकासको अधिकार या बजेटको अधिकार, आर्थिक अधिधकारहरु संकूचित हुँदै जाने र केही वर्षपछि यो बेकारको परिवर्तन रहेछ भनेर फेरि अर्को खालको अराजकता, अर्को खालको निरंकुशता तिर जाने हो कि भन्ने मलाई चिन्ता अल्लि बढी लाएको छ।'
अध्यक्ष दाहालले कर्मचारीलाई आफ्नो राजनीतिक अभिष्टअनुसार चलाउन नसकेकोमा पनि असन्तुष्टि जनाए। कर्मचारीतन्त्रको शैलीमा परिर्वतन नआउनुमा कर्मचारीको नभई राजनीतिक नेतृत्वको कमजोरी भएको उनको भनाइ थियो।
कार्यक्रममा निजी क्षेत्रका प्रतिनिधिहरुले प्रदेशस्तरमा निजी क्षेत्रको सहभागीता सुनिश्चितताको साथै लगानीको वातावरण बनाउन आग्रह गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
