निर्माणाधीन नेपालगञ्ज रंगशाला।
राँझा- आठौँ राष्ट्रिय खेलकुद प्रतियोगितालाई लक्षित गरी बाँकेमा ४८ करोड रुपैयाँको लगानीमा अत्याधुनिक सुविधासम्पन्न खेलकुद पूर्वाधार निर्माण भएका छन्।
नेपालगञ्जमा अत्याधुनिक र सुविधासम्पन्न फुटबल मैदान, पौडीपोखरी, कभर्डहल, भारोत्तोलन एकेडेमी, सुटिङ रेन्ज, एथलेटिक्स ट्र्याक र जुडो हल निर्माण भएका छन् भने, बाँकेकै कोहलपुरमा अन्तर्राष्ट्रिय क्रिकेट मैदान र खजुरामा भलिबल रङ्गशाला निर्माण भएका छन्।
बाँकेमा सबैभन्दा ठूलो लगानीमा नेपालगञ्ज रङ्गशाला निर्माण भएको छ। रङ्गशालाका लागि मात्रै २४ करोड रुपैयाँ बजेट उपलब्ध भएको छ। ६ करोड रुपैयाँ लागतमा फुटबल मैदान र १८ करोड रुपैयाँमा भीआइपी प्याराफिट निर्माण भइरहेको मध्यपश्चिम क्षेत्रीय खेलकुद विकास समिति प्रदेश ५ का अध्यक्ष भीम वलीले बताए।
उनका अनुसार नेपालगञ्ज रङ्गशालामा खेल्नयोग्य मैदानका लागि ३६ लाख रुपैयाँको बरमुडा दुबो रोपिएको छ। यसले फुटबल मैदान अन्तर्राष्ट्रिय मापदण्डको बनेको छ। रङ्गशाला परिसरमा फुटबल मैदानबाहेक करोडाैंको लगानीमा पौडीपोखरी, सुटिङ रेञ्ज, भारोत्तोलन एकेडेमी निर्माणकार्य भएको छ। १४ करोड २८ लाख रुपैयाँ बजेटमा रङ्गशाला छेउमा पौडी पोखरी निर्माण भएको छ। त्यसैगरी १ करोड ५० लाख रुपैयाँको लगानीमा सुटिङ रेञ्ज तयारी अवस्थामा पुगेको अध्यक्ष वलीले जानकारी दिए।
नेपालगञ्जकै कारकाँदोमा २ करोड रुपैयाँमा जुडो एकेडेमी निर्माण भएको छ। आठौँ राष्ट्रिय खेलकुद प्रतियोगितालाई लक्षित गरी बाँकेको खजुरा सीतापुरमा २ करोड ५० लाख रुपैयाँको लगानीमा भलिबल रङ्गशाला निर्माण भएको छ।
यसैगरी कोहलपुरमा १ करोड ५० लाख रुपैयाँको लगानीमा क्रिकेट मैदान तयार भएको छ। यही मैदानमा बुधबारदेखि आठौँ राष्ट्रिय खेलकुद प्रतियोगिताअन्तर्गत क्रिकेट खेल सुरु भएको छ।
राष्ट्रिय खेलकुद परिषद् (राखेप) का सदस्य सचिव केशवकुमार विष्टले आठौँ राष्ट्रिय खेलकुद प्रतियोगितालाई लक्षित गरेर निर्माणाधीन खेलकुद पूर्वाधारमा नेपालको खेलकुद इतिहासमै सबैभन्दा धेरै लगानी भएको बताउँछन्।
सदस्यसचिव विष्टले नेपालगञ्जको इतिहासमै यति ठूलो लगानीमा पहिलोपटक प्रतियोगिता हुन लागेको प्रतिक्रिया दिए। उनले निर्माणाधीन भौतिक पूर्वाधारको निर्माणकार्य अधिकांश सकिएको बताए।
'भिआइपी प्यारापिटको निर्माणकार्य पूरा हुँदैछ', सदस्यसचिव विष्टले भने, 'पछिल्लो प्रगति देखेर हामी निकै हौसिएका छौँ, प्रतियोगिता गर्न अब पूर्वाधार बाधक छैन, यसमा सबैले साथ दिन जरुरी छ।' उनले प्रतियोगिता आयोजना हुने स्थानको शतप्रतिशत पूर्वाधार निर्माण भइसकेको बताए।
रङ्गशाला बेलझुण्डीमा, खेल घोराहीमा
आठौँ राष्ट्रिय खेलकुदका लागि दाङको बेलझुण्डीमा रङ्गशाला निर्माण भएको भए पनि खेल भने घोराहीमा हुने भएको छ। समयमै निर्माणकार्य पूरा नभएपछि राष्ट्रिय खेलअन्तर्गत महिला फुटबल प्रतियोगिता घोराहीको भरतपुर मैदानमा हुने भएको हो। राखेपले बेलझुण्डी रङ्गशालामा महिला फुटबल प्रतियोगिताको अन्तिम खेल खेलाउने भनी संरचना निर्माण गरे पनि निर्धारित समयसम्म काम पूरा नभएपछि महिला फुटबलका केही खेल घोराहीमा हुनेछन् भने केही बेलझुण्डीमा हुने भएका छन्।
बुधबारदेखि राष्ट्रिय खेलकुदअन्तर्गत महिला फुटबल प्रतियोगिता दाङमा सुरु भएको छ। लिगका खेल घोराही र कपिलवस्तुमा हुने भए पनि सेमिफाइनल र फाइनलका खेल भने बेलझुण्डी रङ्गशालामै हुने दाङ जिल्ला खेलकुद विकास समितिका अध्यक्ष डिल्ली डाँगीले बताए। अर्कोतर्फ बेलझुण्डी रङ्गशालामा एथलेटिक्सका खेल हुने भएकाले पनि एकैपटक दुई खेल खेलाउन नमिल्ने भएकाले घोराहीमा फुटबल खेल खेलाउन लागिएको उनले प्रष्ट्याए।
'बेलझुण्डी रङ्गशालामा एथलेटिक्स खेल पनि हुन्छ, त्यसैले हामीले बेलझुण्डीमा एथलेटिक्स खेल खेलाउने छौँ', उनले भने, 'फाइनल र सेमिफाइनलको खेल भने बेलझुण्डीमै हुनेछन्।'
उनका अनुसार यही बैसाख ७ देखि ११ गतेसम्म हुने सेमीफाइनल र फाइनलका खेल उक्त रङ्गशालामै हुनेछन्। साथै बिहान घोराहीमा खेल हुने र साँझ बेलझुण्डीमै हुने गरी खेल तालिका बनाइएको समेत उनले बताए। बेलझुण्डी रङ्गशाला निर्माणको काम अझै पूरा हुनसकेको छैन।
फुटबल र एथलेटिक्स खेलका लागि मात्रै संचरना निर्माण भएको भए पनि अन्य संरचना निर्माणको काम भने खेलपछि मात्रै पूरा गर्ने योजना रहेको निर्माण कम्पनीका प्रतिनिधिले बताए।
बुधबार राष्ट्रिय खेलअन्तर्गत तीन खेल भएका छन्। यसअघि दाङको घोराहीमा भएको टेबलटेनिस खेल पूरा भइसकेको छ भने बास्केटबल चलिरहेको छ। त्यस्तै आजदेखि कराँते, एथलेटिक्सका खेल सुरु हुनेछन्। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
