काठमाडौं- प्रधानमन्त्री शेरबहादुर देउवाले राष्ट्रपतिले सरकारले पठाएको अध्यादेश रोक्न नमिल्ने बताएका छन्।
डा गोविन्द केसी सहितको टोलीसँग बिहीबार बालुवाटारमा भएको भेटमा प्रधानमन्त्री देउवाले चिकित्सा शिक्षा अध्यादेश राष्ट्रपतिले रोक्न नपाउने बताएका हुन्।
‘सरकारले पठाएको अध्यादेश राष्ट्रपतिले रोक्न पाउनु हुन्न,’ भेटका क्रममा प्रधानमन्त्री देउवाले भनेको कुरा उदृत गर्दै डा अभिषेकराज सिंहले भने, ‘अध्यादेश आउँछ । मेरो कुराकानी भइरहेको छ।’
प्रधानमन्त्री निवास बालुवाटारमा डा केसीसहित डा सिंह, डा वाइपी सिंह, अधिवक्ता ओमप्रकाश अर्याल र डा तोषिमा कार्कीले भेट गरेका थिए। भेटका क्रममा प्रधानमन्त्री देउवाले चिकित्सा शिक्षाका क्षेत्रमा भएका अन्य विषयमा पनि जानकारी लिएका थिए।
डा गोविन्द केसीको माग अनुसार मन्त्रिपरिषद्ले पठाएको चिकित्सा शिक्षा अध्यादेश राष्ट्रपति कार्यालयमा अड्किएको छ । मन्त्रिपरिषद्ले कात्तिक ६ गते पारित गरेको अध्यादेश सोही दिन राष्ट्रपति कार्यालयमा पठाइएको थियो।
सरकारले विधेयक प्रमाणीकरणका लागि राष्ट्रपति कार्यालयमा पठाएको दुई सातासम्म पनि उक्त विषयमा केही निर्णय हुन सकेको छैन । संविधानको धारा ११४ ले संसद् नचलेको अवस्थामा तत्काल केही गर्न आवश्यक परेमा मन्त्रिपरिषद्को सिफारिसमा राष्ट्रपतिले अध्यादेश जारी गर्ने व्यवस्था गरेको छ।
मन्त्रिपरिषदबाट पारित भएको विधेयक पारित वा फिर्ता सम्बन्धनमा कुनै पनि जानकारी प्राप्त नभएपछि डा केसीसहित अधिवक्ता अर्याल, डा कार्की, डा सिंह र कलाकार रविन्द्रसिंह बानियाँले सूचनाको निवेदन दर्ता गराएका छन्।
सूचनाको हक सम्बन्धी ऐन २०६४ अनुसार उक्त विधेयक जारी नहुनुका कारण लिखित रुपमा माग गरिएको छ। राष्ट्रपतिलाई सम्बोधन गर्दै लेखिएको निवेदनमा विधेयक रोकिएको मौकाको फाइदा उठाई मेडिकल माफियालाई सहयोग पुगेकाले सूचना दिनुपर्ने माग गरिएको छ।
प्रधानमन्त्री देउवाले टोलीसँगकै छलफलका क्रममा शिक्षामन्त्री गोपालमान श्रेष्ठलाई फोन गर्दै काठमाडौं नेसनल मेडिकल कलेजलाई सिट निर्धारण गर्न मेडिकल काउन्सिलमा पठाएको पत्र फिर्ता लिन निर्देशन दिएका थिए। ‘मेडिकल काउन्सिलमा पठाएको पत्र तुरुन्त फिर्ता लिनुहोस्,’ प्रधानमन्त्री देउवाले शिक्षा मन्त्रीलाई टेलिफोनमा भनेको कुरा उदृत गर्दै डा सिंहले भने।
प्रधानमन्त्री देउवाले काठमाडौं नेसनलको सम्बन्धन खारेजीका लागि अदालतमा 'भ्याकेट' दर्ता गर्न त्रिभुवन विश्वविद्यालयका उपकुलपति तीर्थ खनियाँलाई निर्देशन दिने पनि बताएका छन्। खनियाँ हाल विदेशमा छन्। उनी शनिबार नेपाल आउने बताइएको छ। प्रधानमन्त्रीले आइतबार नै उपकुलपति खनियाँलाई अदालतमा भ्याकेट दर्ता गर्न र चिकित्सा शास्त्र अध्ययन संस्थानको अधिकार फिर्ता गर्न निर्देशन दिने आश्वासन दिएको डा सिंहले जनाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
