भैरहवा- प्रदेशसभा गठन भएकाे एक वर्ष बित्दासमेत प्रदेश ५ को नाम र राजधानीको विषयले पूर्णता पाउनसकेकाे छैन। नेपालकाे संविधानमा प्रदेशकाे नामाकरण र राजधानी ताेक्ने अधिकार सम्बन्धित प्रदेशसभामा नै रहने उल्लेख छ।
लामाे समयपछि यतिबेला भने साे कार्यलाई पूर्णता दिन प्रदेशसभा सदस्य सुझाव संकलनमा जिल्ला-जिल्लामा खटिएका छन्। यसै क्रममा प्रदेशसभाको विशेष समितिले रुपन्देहीमा सुझाव संकलन गरेको छ।
प्रदेशसभाले पहिलो वार्षिकोत्सव मनाउँदासमेत नाम र राजधानीको टुंगो नलागेको कारण यसलाई अन्तिम रुप दिनको लागि प्रदेशसभाअन्तर्गतको विशेष समितिले विभिन्न जिल्लामा सुझाव संकलन गरिरहेको छ।
सुझाव संकलनको लागि खटिएको टोलीका सदस्य एवम् प्रदेशसभा सदस्य सरस्वती गौतमले प्रदेशको नाम र राजधानीको काम अगाडि बढ्न नसकेका गुनासोहरु आइरहेको अवस्थामा अहिले सो विषयमा आफूहरु लागी परेकाे बताइन्। उनले प्रदेश सरकार अहिलेसम्म विभिन्न कानुनहरु निर्माणमा व्यस्त भएकाेले नामाकरण र राजधानी ताेक्न बिलम्ब हुन गएको प्रष्ट पारिन्।
सुझाव संकलनका लागि ४ पानाको प्रश्नावली तयार गरी सोहीमार्फत सर्वसाधारणको सुझाव संकलन गरिएको हो। प्रश्नावलीमा राजधानीको विषयमा भौगोलिक सहजतादेखि सुरक्षा समयका विषयवस्तु समेटिएका छन्। सुझाव संकलन कार्य सकिए लगत्तै समितिले प्रदेशसभामा यसलाई पेस गरी प्रदेशको नाम र राजधानीको विषयलाई अगाडि बढाइने बताइएकाे छ।
उनीहरुले भैरहवामा आयोजित मुख्यमन्त्री ग्रामिण विकास कार्यक्रममा गएका मुख्यमन्त्री पोखरेल सुझाव संकलन कार्यक्रममा नआउनुले राजधानी रुपन्देहीमा नराख्ने मनसाय रहेको आराेप लगाए।
सुझाव संकलनकै लागि प्रदेशसभा सदस्यहरुको विभिन्न टोली बनाई अलग-अलग जिल्लामा खटाइएको प्रदेश संसद सचिवालयले जनाएकाे छ। साेही क्रममा आइतबार नेपालगञ्जको बाँकेमा सुझाव संकलन गरेको थियो।
रुपन्देहीमा साेमबार सुझाव संकलनको लागि प्रदेशसभा सदस्य सन्तोष कुमार पाण्डे, फकरुद्दिन खानलगायत रुपन्देहीबाट निर्वाचित तथा मनोनित प्रदेशसभा सदस्यहरुको उपस्थिति रहेको थियो।
मुख्यमन्त्री आएनन्
रुपन्देहीको भैरहवामा भएको सुझाव संकलन कार्यक्रममा मुख्यमन्त्री शंकर पोखरेल आउने कार्यक्रम थियो।
मुख्यमन्त्री आउने आशमा सुझाव संकलन स्थल आएका स्थानीय एवम् रुपन्देहीका स्थानीय तहका जनप्रतिनिधिहरु मुख्यमन्त्री नआएपछि निरास देखिएका थिए।
मुख्यमन्त्री तथा मन्त्रिपरिषद्को कायालयले आयोजना गरेको 'मुख्यमन्त्री ग्रामिण विकास कार्यक्रम'मा ४ घण्टा बढी समय बिताएका मुख्यमन्त्री पोखरेलले सुझाव संकलनको एक घण्टाको कार्यक्रममा उपस्थिति जनाएनन्।
प्रदेशको नाम र राजधानीको विषयमा सुझाव संकलन गरिएको प्रश्नावली कठिन भएपछि कतिपयले पुरा प्रश्नको उत्तर नै नदिई बुझाएका थिए।
कायक्रममा सहभागीहरुले मुख्यमन्त्री पोखरेलले सुझाव संकलन कार्यलाई हल्का रुपमा लिएर कार्यक्रममा नआएको टिप्पणी गरेका थिए। उनीहरुले भैरहवामा आयोजित मुख्यमन्त्री ग्रामिण विकास कार्यक्रममा गएका मुख्यमन्त्री पोखरेल सुझाव संकलन कार्यक्रममा नआउनुले राजधानी रुपन्देहीमा नराख्ने मनसाय रहेको आराेप लगाए।
प्रश्नावली अप्ठ्यारा
प्रदेशसभाको विशेष समितिले सुझाव संकलनका लागि तयार पारेको प्रश्नपत्र निकै कठिन भएको प्रतिक्रिया स्थानीयले दिएका छन्। सुझाव संकलनमा सहभागि स्थानीय माधव ढुङगानाले सर्वसाधरणले सहजै बुझ्नै नसकिने तथा अनावश्यक प्रश्नावली तयार पारिएको टिप्पणी गरे।
प्रदेशको नाम र राजधानीको विषयमा सुझाव संकलन गरिएको प्रश्नावली कठिन भएपछि कतिपयले पुरा प्रश्नको उत्तर नै नदिई बुझाएका थिए। विशेष समितिले तयार पारेको प्रश्नावली ग्रामिण भेगका जनताले कुनै पनि हालतमा बुझ्न नसक्ने खालको भएको दाबी गर्दै ढुङगानाले यी प्रश्नको जवाफ कतिपय सांसदले समेत दिन नसक्ने ठाेकुवा गरे।
'जुन किसिमका प्रश्न आउनुपर्दथ्यो, ती आएनन्। यसले सर्वसाधरणलाई सहजै आफ्नाे मत जाहेर गर्नबाट समेत वञ्चित गर्छ', उनले भने।
सुझाव संकलनमा अधिकांश सहभागिहरुले प्रदेश ५ को राजधानी रुपन्देही र नाम लुम्बिनी राख्नुपर्ने सुझाव दिएका बताइएकाे छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
