काठमाडौं– पूर्वप्रधानन्यायाधीश चोलेन्द्रशम्शेर जबरालाई प्रहरीले सोधपुछपछि परिवारको जिम्मा लगाएको छ। अब उनको निवासमै सुरक्षा दिने प्रहरीको भनाइ छ।
जबरालाई शनिबार राति/आइतबार बिहान करिब ३ बजे काठमाडौंको महाराजगञ्जस्थित निवासबाट प्रहरीले नियन्त्रणमा लिएको थियो। सुरुमा उनलाई पक्राउ गरिएको खबर सार्वजनिक भएपछि घटनालाई लिएर प्रश्न उठेको थियो। तर प्रहरीले पछि जबरालाई सुरक्षा चुनौती देखिएपछि सुरक्षित स्थानमा राख्न कार्यालयमा ल्याइएको बताएको थियो।
उपत्यका अपराध अनुसन्धान कार्यालयका एसपी रामेश्वर कार्कीले जबरालाई आफन्तको जिम्मा लगाएर पठाइएको र अब घरमै सुरक्षा दिने बताएका छन्। प्रहरीका अनुसार कार्यालयमा राखेर उनीसँग आवश्यक सोधपुछ गरिएको थियो।
तर उनलाई किन रातको समयमा घरबाटै प्रहरी कार्यालय ल्याउनुपर्यो भन्ने प्रश्न भने सुरुदेखि नै उठेको थियो। प्रहरीले सुरक्षा चुनौती रहेको बताए पनि त्यस्तो खतरा के थियो, कसबाट थियो र घरमै सुरक्षा थपेर किन समाधान गर्न सकिएन भन्ने स्पष्ट विवरण सार्वजनिक गरेको छैन। जबराले समेत आफूलाई सुरक्षा खतरा भए निवासमै थप सुरक्षाकर्मी खटाउन आग्रह गरेको परिवारको भनाइ छ।
जबरालाई नियन्त्रणमा लिइएको विषयमा पूर्वप्रधानन्यायाधीश तथा पूर्वप्रहरी अधिकारीहरूले समेत प्रश्न उठाएका थिए। पूर्वप्रधानन्यायाधीश ओमप्रकाश मिश्रले सुरक्षा चुनौती भए निवासमै सुरक्षाकर्मी थप्न सकिने बताएका छन्। अर्का पूर्वप्रधानन्यायाधीश बलराम केसीले पनि रातको समयमा नियन्त्रणमा लिनुको औचित्यमाथि प्रश्न गरेका थिए। पूर्वसीआईबी प्रमुख हेमन्त मल्ल ठकुरीले सुरक्षा चुनौतीका आधारमा प्रहरी कार्यालयमा लैजाने अभ्यासबारे प्रश्न उठाउँदै नियन्त्रणमा लिँदा कानुनी प्रक्रिया स्पष्ट हुनुपर्ने बताएका थिए।
यसैबीच नेकपा एमालेका महासचिव शंकर पोखरेलले पनि जबरालाई नियन्त्रणमा लिइएको घटनाप्रति आपत्ति जनाएका छन्। उनले यसलाई विधिको शासनसँग जोडेर प्रश्न उठाएका छन्।
जबराको नियन्त्रणको कारणबारे भने विभिन्न विवरण सार्वजनिक भएका छन्। केही प्रहरी स्रोतले उनीविरुद्ध उजुरी परेको बताएका छन् भने अर्को विवरणमा शान्ति–सुरक्षासम्बन्धी विश्लेषणका आधारमा नियन्त्रणमा लिइएको र केही गतिविधिबारे अनुसन्धान गर्न खोजिएको उल्लेख छ। तर प्रहरीले आधिकारिक रूपमा कुनै निश्चित कसुर वा उजुरीको विस्तृत विवरण सार्वजनिक गरेको छैन।
यसअघि जबराविरुद्ध दर्ता भएको महाअभियोगको औचित्य समाप्त भएको सर्वोच्च अदालतको संवैधानिक इजलासले ठहर गरिसकेको छ। त्यसपछि पूर्वप्रधानन्यायाधीशलाई मध्यरातमा प्रहरी कार्यालय लगिएपछि घटना थप चर्चामा आएको हो।
अब जबरालाई पक्राउ गरिएको हो वा सुरक्षाका लागि मात्रै नियन्त्रणमा लिइएको हो भन्ने प्रश्नभन्दा पनि उनीमाथि के आधारमा कारबाही गरिएको थियो र सुरक्षा खतरा देखिएको भए घरमै सुरक्षा किन दिन सकिएन भन्ने विषयमा प्रहरीले स्पष्ट पार्नुपर्ने अवस्था देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
