काठमाडौं– जापानमा जारी २०औं एसियाली खेलकुदअन्तर्गत नेपालले आज सात खेलमा प्रतिस्पर्धा गर्दैछ। नेपालको मुख्य ध्यान महिला कबड्डी टोलीको चाइनिज ताइपेसँगको खेलमा केन्द्रित हुनेछ।
खेल नेपाली समयअनुसार साँझ ४:४५ बजे जापानको टोकाइ सिटिजन जिम्नेसियममा हुनेछ।
समूह ‘बी’ मा रहेको नेपालले पहिलो खेलमा थाइल्यान्डलाई ४६–४३ ले पराजित गर्दै प्रतियोगिताको सुखद् सुरुआत गरेको थियो। पहिलो हाफमा १५–२४ ले पछि परेको नेपालले दोस्रो हाफमा ३१–१९ को उत्कृष्ट पुनरागमन गर्दै तीन अंकको जित निकालेको थियो।
समूह ‘बी’ मा नेपालसँगै चाइनिज ताइपेई, थाइल्यान्ड र श्रीलंका छन्। अंकतालिकाअनुसार चाइनिज ताइपेई एक खेलबाट दुई अंकसहित शीर्ष स्थानमा छ भने नेपाल र थाइल्यान्ड पनि दुई–दुई अंकमा छन्। नेपालले एक खेल खेलेको छ भने थाइल्यान्डले दुई खेल खेलिसकेको छ।
समूह चरणमा चार टोलीमध्ये शीर्ष दुई टोली सेमिफाइनलमा पुग्नेछन्। त्यसैले चाइनिज ताइपेइसँगको खेल नेपालका लागि समूहको शीर्ष दुईमा रहँदै अन्तिम चारमा पुग्ने अभियानमा महत्त्वपूर्ण हुनेछ। नेपालले त्यसपछि बिहीबार श्रीलंकासँग समूह चरणको अन्तिम खेल खेल्नेछ।
नेपालले यसअघि हाङझाउ एसियाडमा महिला कबड्डीमा कांस्य पदक जितेको थियो। कबड्डीसँगै नेपालले आज पौडी, बक्सिङ, कराते, स्क्वास, टेबलटेनिस र उसुमा पनि प्रतिस्पर्धा गर्ने तालिका छ।
जारी एसियाली खेलकुदमा नेपालले अहिलेसम्म पदकको खाता खोल्न सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790138176.webp)
-1786602170.png)
-1789631269.jpg)
