काठमाडौं– नेपालका दुई ई स्पोट्र्सका टिम पब्जी मोबाइलको ग्लोबल ओपन च्याम्पियनसिपमा छनोट भएका छन्।
शनिबार काठमाडौंमा सम्पन्न पब्जी मोबाइलको ग्लोबल ओपन साउथ एसिया फाइनलमा दोस्रो र तेस्रो स्थानमा रहँदै ट्रेन टु किल (टीटूके) र होरा ई स्पोट्र्स ग्लोबल ओपन च्याम्पियनसिपमा छनोट भएका हुन्।
ई स्पोट्र्स संघ नेपाल (ईशान) र पब्जी मोबाईलले काठमाडौंमा आयोजना गरेको चार दिने क्षेत्रीय छनोटमा १६ टिम मध्य उत्कृष्ट प्रदर्शन गर्दै नेपालका दुई टिमले ग्लोबल ओपनमा स्थान बनाएका हुन्।
टीटूके १८८ अंक सहित समग्रमा दोस्रो स्थानमा रह्यो, होरा ई स्पोट्र्स १७५ अंक सहित तेस्रो स्थानमा रह्यो। नेपालकै अर्को टिम एचएलएक्स चौथों स्थानमा रहे पनि ग्लोबल ओपनमा स्थान बनाउन सकेन। पाकिस्तानको फोर थ्रिभ्स पहिलो स्थानमा रहँदै ग्लोबल च्याम्पियनसिपमा छनोट भएको छ।
पहिलो बनेको फोर थ्रिभ्सले ९ हजार अमेरिकी डलर, दोस्रो टी टु केले ५ हजार ५ सय अमेरिकी डलर, तेस्रो होरा ई स्पोट्र्सले ४ हजार ५ सय अमेरिकी डलर प्राप्त गरेका छन्। विजेता खेलाडीलाई शिक्षा तथा खेलकुद मन्त्री सस्मित पोखरेल र ईशानका कार्यवाहक अध्यक्ष हिमविक्रम केसीले पुरस्कृत गरेका थिए।
चार दिनसम्म काठमाडौंमा सञ्चालन भएको प्रतियोगिताको टिकटबाट जम्मा भएको ५० प्रतिशत रकम प्रधानमन्त्री राहत कोषमा हस्तान्तरण गरिएको थियो।
राष्ट्रिय खेलकुद परिषद्बाट स्वीकृत कार्यक्रमलाई निजी तथा विभिन्न संघ संस्थाले सहयोग गरेका थिए। काठमाडौंमा सम्पन्न भएको पीएमजीओ साउथ एसिया कार्यक्रम दक्षिण एसियाकै उत्कृष्ट ल्यान इभेन्ट मध्य एक भएको ईशानका सचिव आशिष दाहालले बताए।
कार्यक्रमको समापन समारोहमा सचिव दाहालले अझ ठुला ई स्पोट्र्सका अन्तर्राष्ट्रिय कार्यक्रम नेपालमा ल्याउन संघले पहल गरिरहेको बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
