काठमाडौं– नेपाली कांग्रेसले विशेष महाधिवेशनअघि कायम रहेको केन्द्रीय कार्यसमितिका नेताहरूलाई १५औँ महाधिवेशन प्रक्रियामा पुनः सहभागी गराउने निर्णय गरेको छ।
सभापति गगनकुमार थापाको अध्यक्षतामा आइतबार बसेको केन्द्रीय कार्यसम्पादन समितिको बैठकले तत्कालीन केन्द्रीय कार्यसमितिमा रहेका तर विशेष महाधिवेशनपछि बनेको संरचनामा नसमेटिएका नेताहरूलाई विधानबमोजिम केन्द्रीय सदस्यको हैसियतमा सहभागी गराउने निर्णय गरेको हो।
कांग्रेसले पार्टीभित्र रहेका असहमति र विवादलाई महाधिवेशनमार्फत समाधान गर्ने वातावरण बनाउनुपर्ने निष्कर्षसमेत निकालेको छ। महाधिवेशन पार्टीको सर्वोच्च निकाय भएकाले आफ्ना मत, असहमति र चासो राख्ने उपयुक्त थलो पनि महाधिवेशन नै भएको कांग्रेसको भनाइ छ।
बैठकले पार्टीका कुनै पनि सदस्य महाधिवेशन प्रक्रियाबाट नछुटून् भन्ने नीति लिएको छ। विशेषगरी असोज ३ र ४ गते हुने वडा अधिवेशनदेखि नै सबै तहका सदस्यलाई उत्साहपूर्वक सहभागी हुन कांग्रेसले आह्वान गरेको छ।
असोज ३ देखि वडा अधिवेशन, १६ देखि महाधिवेशन
कांग्रेसले १५औँ महाधिवेशनको प्रक्रिया वडा तहबाट सुरु गर्ने भएको छ। असोज ३ र ४ गते वडा अधिवेशन गर्ने कार्यतालिका छ भने असोज १६ देखि १९ गतेसम्म काठमाडौंमा केन्द्रीय महाधिवेशन आयोजना हुँदैछ।
असोज १६ गते दिउँसो १ बजे खुलामञ्चमा महाधिवेशनको उद्घाटन गर्ने तयारी छ। कांग्रेसले महाधिवेशनलाई सांगठनिक प्रक्रिया मात्र नभई पार्टीको राजनीतिक जीवनको ‘महाउत्सव’का रूपमा अघि बढाउने बताएको छ।
बैठकले वडा तथा अन्य तहका अधिवेशन तोकिएको जिम्मेवारीअनुसार सम्पन्न गर्न सम्बन्धित कार्यसमितिलाई निर्देशन दिएको छ। जिम्मेवारी पूरा नगरे विधानअनुसार वैकल्पिक व्यवस्था गर्ने चेतावनीसमेत दिइएको छ।
छुटेका क्रियाशील सदस्यलाई पनि बाटो खुला
कांग्रेसले क्रियाशील सदस्यता अद्यावधिक प्रक्रियामा छुटेका सदस्यलाई समेत महाधिवेशनमा सहभागी गराउने नीति लिएको छ।
पुस २१ गतेसम्म सदस्यता व्यवस्थापन प्रणालीमा प्रविष्ट भएका तर विभिन्न कारणले अद्यावधिक हुन छुटेका क्रियाशील सदस्यलाई, पार्टी परित्याग गरेका, अनुशासनको कारबाहीबाट सदस्यता गुमाएका वा कानुनअनुसार पार्टी सदस्य बन्न नमिल्ने अवस्थाबाहेक, महाधिवेशन प्रक्रियाबाट वञ्चित नगरिने निर्णय कांग्रेसले यसअघि नै गरिसकेको थियो।
बैठकले महामन्त्री प्रदीप पौडेलको संयोजकत्वमा रहेको सदस्यता व्यवस्थापन केन्द्रीय समितिले तयार पारेको १५औँ महाधिवेशनमा सहभागी हुने क्रियाशील सदस्यको नामावलीसमेत अनुमोदन गरेको छ।
सबै पक्षलाई समेटेर महाधिवेशन गर्ने प्रयास
कांग्रेसले महाधिवेशनअघि पार्टीभित्र सहमति र सहकार्यको वातावरण बनाउन अधिकतम लचकता अपनाएको दाबी गरेको छ।
अधिवेशन संयोजनका लागि संयन्त्र निर्माणदेखि सदस्यता व्यवस्थापन समिति, केन्द्रीय निर्वाचन समिति र अधिवेशन व्यवस्थापन समितिमा सबै पक्षको सहभागिता सुनिश्चित गर्न प्रयास गरिएको बैठकको निष्कर्ष छ।
बैठकले महाधिवेशनमा सहभागी हुन स्वदेश तथा विदेशमा रहेका सम्पूर्ण पार्टी सदस्य, समर्थक र शुभेच्छुकलाई अपिलसमेत गरेको छ।
यसैबीच बैठकमा केन्द्रीय अनुशासन समितिका संयोजक तारामान गुरुङले पदबाट दिएको राजीनामाबारे सभापति थापाले जानकारी गराएका थिए। बैठकमा कांग्रेसका विभिन्न पदाधिकारी तथा केन्द्रीय सदस्यहरूले महाधिवेशन र पार्टीको समसामयिक अवस्थाबारे धारणा राखेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
