काठमाडौं– राष्ट्रिय स्वतन्त्र पार्टीका सांसद सोम शर्माले जेनजी आन्दोलनका क्रममा पक्राउ परेका व्यक्तिहरूलाई तत्काल रिहा गर्न सरकारसँग माग गरेका छन्।
जेनजी सहिद दिवसका अवसरमा जेनजी सहिद कल्याणकारी समाजले आयोजना गरेको कार्यक्रममा बोल्दै उनले आन्दोलनमा सहभागीहरू अझै पनि जेलमा रहेकाले उनीहरूको रिहाइको माग गरेका हुन्।
पक्राउ परेकाहरूलाई अपराधीका रूपमा व्यवहार नगर्न उनले सरकारलाई आग्रह गरे।
सांसद शर्माले जेनजी आन्दोलन देश जलाउन नभई देश बनाउनका लागि भएको दाबी गरे। आफूहरूमाथि देश जलाउनेहरूको ट्याग लाग्ने गरेकोमा गुनासो गर्दै उनले भ्रष्टाचार र कुशासनको अन्त्यका लागि आन्दोलनमा उत्रिएको स्पष्ट पारे।
आन्दोलनका सहभागीमाथि लागेको आरोपबारे बोल्दै सांसद शर्माले भने, ‘देश जलाउन कोही पनि आएको थिएन। आज विभिन्न ट्याग लाग्छ, दुःख लाग्छ। आज यहीँबाट हामीले एउटा संकल्प सबैजना भएर गर्नुपर्छ, हामी देश जलाउन होइन देश बनाउन आएका हौँ।’
प्रहरी नियन्त्रणमा रहेका आन्दोलनकारीको रिहाइबारे बोल्दै उनले थपे, ‘कयौँ दाजुभाइहरू हिरासतमा बसेका छन्। गृहमन्त्रीज्यू हुनुहुन्छ, कानुनमन्त्रीज्यू हुनुहुन्छ, आजैबाट अहिल्यैबाट तपाईंहरू लाग्नुस्, ती अपराधी होइनन्। ती वीरताका गाथा गाउन लायक व्यक्तिहरू हुन्, तिनलाई पुज्नुपर्छ, सम्मान गर्नुपर्छ, तत्कालभन्दा तत्काल उनीहरूको रिहाइ गरिनुपर्छ।’
आन्दोलनका क्रममा घाइते भएकाहरूको उपचारका लागि सरकारले तत्काल कदम चाल्नुपर्नेमा उनले जोड दिए। घाइतेहरूको स्वदेशमा उपचार सम्भव नभए विदेश लगेर भए पनि उपचार गराउन उनले सरकारसँग माग गरे।
आगामी दिनमा भदौ २३ जस्तो दुःखद घटना दोहोरिन नदिन राज्य, सरकार र नागरिकबिचको सम्बन्ध सुमधुर बनाउनुपर्ने उनले बताए।
उनले भने, ‘भदौ २३ त्यस्तो दिन अबको जीवनमा नेपालले कहिल्यै देख्न नपरोस्। नागरिकहरू मर्ने गरीको अवस्था कहिल्यै पनि नआओस्। एउटा नागरिकले म मरेर देश बनाउनुपर्छ भन्ने त्यो चेतना कहिल्यै पनि जागृत नहोस्, त्यसका निमित्त राज्य र सरकार, अनि जनताबिचको सम्बन्ध सुमधुर हुनुपर्छ।’
नागरिकले देश बनाउन आफू मर्नुपर्ने अवस्था सिर्जना हुन नदिन राज्यले नागरिकका अपेक्षा र गुनासोलाई गम्भीर रूपमा सम्बोधन गर्नुपर्ने उनको भनाइ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1788425345.png)
