काठमाडौं– राष्ट्रिय प्रजातन्त्र पार्टी (राप्रपा) का महामन्त्री शरदराज पाठकले पार्टीको महामन्त्रीसहित सबै जिम्मेवारी र पार्टी सदस्यसमेत परित्याग गर्दै राप्रपाबाट अलग हुने घोषणा गरेका छन्।
पाठकले आजकै मितिदेखि राप्रपाबाट अलग हुने निर्णय गरेको सामाजिक सञ्जालमार्फत जानकारी दिएका हुन्। करिब चार वर्षअघि पार्टीलाई समयानुकूल पुनर्संरचना गर्दै सुशासनप्रति प्रतिबद्ध र सबै वर्ग, समुदाय तथा भूगोलका नागरिकले भरोसा गर्न सक्ने दलका रूपमा रूपान्तरण गर्ने सहमतिसहित आफू एक समूहसँगै राप्रपामा आबद्ध भएको उनले उल्लेख गरेका छन्।
तर उक्त सहमतिअनुसार पार्टीमा ठोस र परिणाममुखी काम हुन नसकेको पाठकको आरोप छ। उनले पार्टीको विचारधारा र व्यवहारबीच ठूलो विरोधाभास रहेको भन्दै आन्तरिक गुटबन्दी र नेतृत्व तहको बेमेल झन् बढ्दै गएको बताएका छन्।
‘भ्रष्टाचार गरेर खानु आमाको रगत खाएसरह हो’ भन्ने नारालाई पार्टीले मूलमन्त्र माने पनि त्यसअनुसारको व्यावहारिक प्रतिबद्धता र पारदर्शितामा ठूलो अभाव रहेको उनको भनाइ छ।
पार्टीभित्रको गुटगत संघर्षका कारण नयाँ पुस्ताका इमानदार, शिक्षित र सचेत युवालाई आकर्षित गर्न नसक्ने अवस्था बनेको भन्दै आफूहरूबाट समेत त्यसमा परिवर्तन ल्याउन सक्ने सम्भावना नदेखिएको पाठकले बताएका छन्।
यद्यपि, राप्रपाका तल्ला तहमा रहेका नेता तथा कार्यकर्ताको निष्ठा र प्रतिबद्धता अतुलनीय रहेको उल्लेख गर्दै उनले उनीहरूप्रति सम्मान व्यक्त गरेका छन्।
सक्रिय सञ्चारकर्म हुँदै एक दशकदेखि राजनीतिमा सक्रिय रहेको उल्लेख गर्दै पाठकले आगामी दिनमा राष्ट्र, राष्ट्रियता, सुशासन र नागरिक हितमा आफूले आर्जन गरेको अनुभवलाई थप परिष्कृत रूपमा समर्पित गर्ने बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788697119.jpg)
-1788691747.jpg)
-1786602170.png)
-1786513116.png)
-1788425345.png)
