काठमाडौं– प्रधानमन्त्री वालेन्द्र शाहले मानव बेचबिखन तथा ओसारपसार नियन्त्रणका लागि सरकार, प्रदेश तथा स्थानीय तहसहित सबै सरोकारवालाको साझा पहल र संयुक्त प्रयास आवश्यक रहेको बताएका छन्।
मानव बेचबिखनविरुद्धको २०औं राष्ट्रिय दिवसका अवसरमा शनिबार शुभकामना सन्देश जारी गर्दै प्रधानमन्त्री शाहले प्रविधिको विकाससँगै मानव बेचबिखन तथा ओसारपसारको प्रवृत्ति, प्रकृति, स्वरूप र गन्तव्यमा परिवर्तन भइरहेको बताएका हुन्। दिवसको यस वर्षको नारा ‘प्रविधिको सही प्रयोग र सजगताः मानव बेचबिखन रहित राष्ट्र निर्माणमा ऐक्यबद्धता’ रहेको छ।
‘मानवसभ्यता कै कलङ्कको रुपमा रहेको मानव बेचबिखन संगठित अपराधको रुपमा विश्वभरी फैलिरहेको छ। प्रविधिको विकासक्रमसँगै मानव बेचबिखन तथा ओसारपसारको प्रवृत्ति, प्रकृति, स्वरुप र गन्तव्यमा परिवर्तन आइरहेको छ । मानव बेचबिखन तथा ओसारपसारको रोकथाम तथा नियन्त्रणका लागि नेपाल सरकारबाट राष्ट्रिय तथा अन्तराष्ट्रिय प्रतिबद्धता अनुरुप नीतिगत तथा संस्थागत सुधार गर्दै तहगत सरकार र सम्बन्धित सबै सरोकारवालाहरुको समन्वय र सहकार्यमा सार्थक पहलकदमीहरु लिइएका छन्,’ उनले भनेका छन्।
उनका अनुसार मानव बेचबिखन तथा ओसारपसार (नियन्त्रण) ऐन, २०६४ लाई पालेर्मो प्रोटोकलअनुकूल हुने गरी संशोधन गर्ने विधेयक संसदमा दर्ता गरिएको छ। यसबाट मानव बेचबिखन तथा ओसारपसारबाट पीडितको मानव अधिकार संरक्षणका लागि राज्यहरूबीच सहयोग र समन्वय बढाउन सहज हुने उनको भनाइ छ।
विद्यमान कानुनी तथा संस्थागत संयन्त्रलाई संघीय संरचनाअनुरूप बनाउने क्रममा मानव बेचबिखनविरुद्धको नीति जारी गरी कार्यान्वयनमा ल्याइएको पनि प्रधानमन्त्री शाहले उल्लेख गरेका छन्।
प्रधानमन्त्री शाहले मानव बेचबिखनमुक्त समाज निर्माणका लागि साझा पहल र संयुक्त प्रयास आवश्यक रहेको उल्लेख गर्दै नेपाल सरकारको प्रतिबद्धतामा सबैको साथ, सहयोग र ऐक्यबद्धताका लागि आग्रह गरेका छन्। दिवसका अवसरमा अभियानमा निरन्तर क्रियाशील सबैमा उत्साह र ऊर्जा प्राप्त होस् भन्ने शुभकामना पनि उनले व्यक्त गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
