काठमाडौं– नेकपा संयोजक पुष्पकमल दाहाल ‘प्रचण्ड’ले भोटेकोशी बाढीपछि सरकारको उद्धार कार्य अपेक्षाअनुसार प्रभावकारी हुन नसकेको टिप्पणी गरेका छन् ।
बुधबार प्रतिनिधिसभाको बैठकमा बोल्दै प्रचण्डले प्रधानमन्त्री र मन्त्रीहरू सक्रिय देखिए पनि महाविपत्तिको सामना गर्न सेना परिचालनसँगै जनपरिचालन आवश्यक रहेको बताए । सबै तहका सरकार र नागरिकलाई एकीकृत रूपमा परिचालन नगरे समस्या समाधान गर्न कठिन हुने उनको भनाइ छ ।
उनले बाढीपछिको सात दिनमा सरकारको सुरुवाती तदारुकता र पछिल्लो कार्यशैलीबीच विरोधाभास देखिएको बताए । ‘सरकार उद्धार कार्यमा सफल होइन, असफल सिद्ध भयो,’ उनले भने, ‘घमन्ड गर्न हुँदैन । बरु यसबाट शिक्षा लिएर अघि बढ्नुपर्छ।’
प्रचण्डले अब राहत, पुनःस्थापना र दीर्घकालीन पुनर्निर्माणमा सरकारले दृढतापूर्वक काम गर्नुपर्ने बताए । टनेलमा फसेकाहरूको उद्धार प्रयास सफल हुन नसकेको प्रसंग उल्लेख गर्दै उनले यो अन्तर्राष्ट्रिय प्रकृतिको घटना भएकाले विदेशी विज्ञ तथा प्राविधिकहरूको अनुभवसमेत उपयोग गर्नुपर्नेमा जोड दिए ।
जलवायु परिवर्तनका कारण हिमाली क्षेत्रमा जोखिम बढिरहेको उल्लेख गर्दै प्रचण्डले नेपालले ‘क्लाइमेट जस्टिस’को विषयलाई थप सशक्त रूपमा उठाउनुपर्ने बताए । यस्ता विपद्मा विगतमा राजनीतिक दल, नागरिक समाज र राज्यका सबै तह एकजुट भएर सामना गरेको स्मरण गर्दै उनले अहिले पनि त्यही एकताको आवश्यकता रहेको बताए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
