काठमाडौं– नेपाली कांग्रेसले क्रियाशील सदस्यता अद्यावधिक गर्न अन्तिम पटक पाँच दिनको समय दिएको छ।
सर्वोच्च अदालतको आदेशपछि पार्टीको १५औं महाधिवेशन सुनिश्चित भएसँगै नेतृत्व तहदेखि तल्लो तहसम्म सबै पक्षलाई समेट्ने उद्देश्यले भदौ १५ देखि १९ गतेसम्म समय थप गरिएको हो।
कांग्रेस महामन्त्री एवं सदस्यता व्यवस्थापन समितिका संयोजक प्रदीप पौडेलले कसैलाई समय नपाएर महाधिवेशनबाट वञ्चित हुनुपरेको गुनासो नरहोस् भनेर अन्तिम अवसर दिइएको बताए।
‘यो पाँच दिन अब अन्तिम पटक हो। अझै पनि अद्यावधिक गर्न छुटेका साथीहरूलाई अद्यावधिक गरेर महाधिवेशनमा जोडिने ढोका खोलौं भन्ने मनसायका साथ यो निर्णय गरेका हौं,’ उनले भने।
पार्टीका अनुसार सर्वोच्च अदालतको निर्णयको प्रतीक्षामा रहेका वरिष्ठ नेताहरू, विशेष परिस्थितिका कारण सदस्यता अद्यावधिक गर्न छुटेका तथा अरूको लहैलहै र भ्रममा परेर अद्यावधिक नगरेका कार्यकर्तालाई समान अवसर दिन समय थप गरिएको हो।
सर्वोच्चको पूर्ण इजलासले महाधिवेशन रोक्न अन्तरिम आदेश दिन अस्वीकार गरेपछि अब कानुनी अड्चन नरहेको कांग्रेसको भनाइ छ। सबैलाई पार्टीको मूलधारमा समेट्दै महाधिवेशनमा सहभागी गराउने उद्देश्यले सदस्यता अद्यावधिकको समय थप गरिएको पार्टीले जनाएको छ।
कांग्रेसले भदौ १९ गतेसम्म आफ्नो क्रियाशील सदस्यता अनिवार्य रूपमा अद्यावधिक गरी एकताबद्ध भएर १५औं महाधिवेशनमा सहभागी हुन सम्पूर्ण सदस्यलाई अपिल गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
