फाइल तस्बिर
काठमाडौं– लगातारको वर्षाका कारण देशका विभिन्न जिल्लामा सडक यातायात प्रभावित भएको छ। बाढी, पहिरो, लेदो तथा नदी कटानका कारण केही सडकखण्ड पूर्ण रूपमा अवरुद्ध भएका छन् भने जोखिमयुक्त केही सडकमा रातिको समयमा सवारी आवागमन रोक लगाइएको छ।
नेपाल प्रहरीका अनुसार काभ्रेपलाञ्चोक र सिन्धुली जोड्ने बीपी राजमार्गअन्तर्गत खुर्कोट–नेपालथोक–कटुन्जेबेँसी सडकखण्डमा सम्भावित बाढीको जोखिमलाई मध्यनजर गर्दै रातिको समयमा सबै प्रकारका सवारी साधन सञ्चालनमा रोक लगाइएको छ।
उक्त सडकखण्डमा बेलुका ६ बजेदेखि बिहान ४ बजेसम्म यातायात सञ्चालन गर्न नपाइने व्यवस्था गरिएको छ। बिहान ४ बजेदेखि बेलुका ६ बजेसम्म भने सवारी साधन सञ्चालन गर्न दिइनेछ।
त्यस्तै, मकवानपुरको कान्ति लोकपथमा पनि वर्षाका कारण रातिको समयमा यातायात सञ्चालनमा रोक लगाइएको छ। यहाँ बेलुका ५ बजेदेखि बिहान ५ बजेसम्म सबै प्रकारका सवारी साधन सञ्चालन नगर्न भनिएको प्रहरीले जनाएको छ।
नुवाकोटको टोखा–छहरे सडकखण्डमा समेत रातिको समयमा अत्यावश्यक सेवाबाहेक अन्य सार्वजनिक तथा निजी सवारी साधन सञ्चालनमा पूर्ण रोक लगाइएको छ। उक्त सडकमा राति १० बजेदेखि बिहान ५ बजेसम्म अत्यावश्यक सेवाका सवारीबाहेक अन्य सवारी साधन चलाउन नपाइने व्यवस्था गरिएको छ।
यसैबीच, इलामको मेची राजमार्ग पूर्ण रूपमा अवरुद्ध भएको छ। इलाम नगरपालिका–९ स्थित राजदुवालीमा वर्षाका कारण सडक हिलाम्मे भएपछि सवारी साधन आवतजावत गर्न नसक्ने अवस्था आएको हो। उक्त सडकखण्ड अवरुद्ध भए पनि यात्राका लागि वैकल्पिक मार्ग रहेको प्रहरीले जनाएको छ।
रसुवाको त्रिशूली–मैलुङ–स्याफ्रुबेंसी सडकखण्ड पनि पूर्ण रूपमा अवरुद्ध भएको छ। उत्तरगया गाउँपालिका–५ खाल्टेमा त्रिशूली नदीले सडकमुनिबाट कटान गरेपछि सडकमा यातायात सञ्चालन पूर्ण रूपमा बन्द भएको हो।
त्यस्तै, रुकुम पश्चिमको भेरी करिडोरअन्तर्गत जाजरकोट–डोल्पा सडकखण्ड पनि अवरुद्ध भएको छ। आठबिसकोट नगरपालिका–६, रिजेगार्ड खोलामा माथिबाट ढुंगा, माटो र लेदोसहितको पहिरो खसेपछि सडक पूर्ण रूपमा बन्द भएको प्रहरीले जनाएको छ।
लगातारको वर्षाका कारण थप सडकखण्डमा समेत बाढी, पहिरो तथा कटानको जोखिम बढेको छ। सडक अवरुद्ध हुने क्रम जारी रहेकाले प्रहरीले यात्रुलाई सडकको पछिल्लो अवस्था बुझेर मात्र यात्रा गर्न र जोखिमयुक्त सडकखण्डमा विशेष सावधानी अपनाउन आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
