काठमाडौं– जनता समाजवादी पार्टी, नेपालले लुम्बिनी प्रदेश सरकारको पक्षमा मतदान गरेका आफ्ना तीन प्रदेशसभा सदस्यलाई २४ घण्टाभित्र स्पष्टीकरण पेस गर्न निर्देशन दिएको छ।
जसपाको केन्द्रीय कार्यालय बालकुमारी, ललितपुरले मंगलबार पत्र पठाउँदै रुपन्देही निर्वाचन क्षेत्र नम्बर ३(१) का प्रदेशसभा सदस्य सन्तोषकुमार पाण्डेय, लुम्बिनी प्रदेशकी प्रदेशसभा सदस्य हेमा बेलबासे र बाँके निर्वाचन क्षेत्र नम्बर २(१) का प्रदेशसभा सदस्य भण्डारीलाल अहिरलाई स्पष्टीकरण सोधेको हो।
पार्टीका महासचिव डा. सुरेन्द्रकुमार झाले हस्ताक्षर गरेको पत्रमा लुम्बिनी प्रदेशको वर्तमान सरकारलाई समर्थन नगर्ने तथा सरकारको विपक्षमा मतदान गर्ने सम्बन्धमा पार्टीले यसअघि नै स्पष्ट निर्देशन जारी गरेको उल्लेख छ।
तर, उक्त निर्देशनविपरीत लुम्बिनी प्रदेश सरकारको पक्षमा मतदान गरेको देखिएको भन्दै पार्टीले त्यसबारे सात दिनभित्र स्पष्टीकरण पेस गर्न यसअघि नै जानकारी गराएको जनाएको छ।
प्राप्त स्पष्टीकरण अध्ययन गर्दा पार्टीको नीति, निर्णय तथा निर्देशनको भावनासँग मेल नखाने तथा उठाइएका प्रश्नमा चित्तबुझ्दो र सन्तोषजनक जवाफ प्राप्त नभएको भन्दै जसपाले पुनः स्पष्टीकरण मागेको हो।
पार्टीले तीन सांसदसँग मुख्यतः तीन प्रश्नको जवाफ मागेको छ। पार्टीको स्पष्ट निर्देशनविपरीत लुम्बिनी प्रदेश सरकारको पक्षमा मतदान गरी पार्टी निर्णयको अवज्ञा गरेको विषयमा अनुशासनात्मक कारबाही किन नगर्ने, पार्टीको नीति, निर्णय तथा निर्देशन प्रतिकूल हुने गरी कार्य गर्न मिल्ने वा नमिल्नेबारे धारणा के हो र पार्टी निर्देशनको अवज्ञा गरी गरिएको कार्यलाई पार्टी विधान तथा प्रचलित निर्णयअनुसार कसरी लिने भन्नेबारे स्पष्ट धारणा पेस गर्न भनिएको छ।
जसपाले २४ घण्टाभित्र पार्टी केन्द्रीय कार्यालयमा अनिवार्य रूपमा पुनः स्पष्टीकरण पेस गर्न निर्देशन दिएको छ।
तोकिएको समयभित्र स्पष्टीकरण पेस नगरेमा वा पेस गरिएको स्पष्टीकरण चित्तबुझ्दो र सन्तोषजनक नभए पार्टी विधान तथा प्रचलित निर्णयबमोजिम आवश्यक अनुशासनात्मक कारबाहीको प्रक्रिया अघि बढाउने चेतावनीसमेत पत्रमा दिइएको छ।
पार्टीले आफ्ना नीति, निर्णय तथा निर्देशनको पालना गर्नु प्रत्येक पार्टी सदस्यको अनिवार्य दायित्व रहेको स्मरण गराएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
