काठमाडौं– भारतको सहयोगमा ललितपुरमा कुमारी छेँ र नयाँ कुमारी निवासको पुनर्निर्माण सम्पन्न भएको छ।
भारतको भूकम्पपछिको पुनर्निर्माण अनुदान सहयोगअन्तर्गत करिब ५ करोड रुपैयाँमा पुनर्निर्माण गरिएको पाटनस्थित श्री कुमारी छेँ र नयाँ कुमारी निवासको सोमबार संयुक्तरुपमा उद्घाटन भएको हो।
निवासको उद्घाटन गर्दै नेपालका लागि भारतीय राजदूत नवीन श्रीवास्तवले भारत र नेपालबीचको गहिरो साँस्कृतिक सम्बन्धलाई प्रकाश पारे। नेपालका ऐतिहासिक धरोहरहरुको पुनर्स्थापनाका लागि भारतको निरन्तर सहयोग रहेको उल्लेख गर्दै उनले पुनर्निर्मित संरचनाहरु दुई देशबीचको साझा सम्पदा र मित्रताको चिरस्थायी प्रतीकको रुपमा उभिएको बताए।
कार्यक्रममा ललितपुर महानगर प्रमुख चिरीबाबु महर्जनले ललितपुर र अन्य जिल्लाहरूका साँस्कृतिक सम्पदास्थलहरुको पुनर्निर्माण र पुनर्स्थापनामा भारत सरकारले पुर्याएको योगदानको प्रशंसा गरे। उनले स्थानीय समुदायलाई समेत भारतको सहयोग र सहकार्यको लागि आभार प्रकट गरे।
केन्द्रीय आयोजना कार्यान्वयन इकाई (भवन तथा आवास) द्वारा कार्यान्वयन गरिएको उक्त पुनर्निर्माणको डिजाइन र परियोजना व्यवस्थापन परामर्श सेवा इन्डियन नेशनल ट्रष्ट फर आर्ट्स एण्ड कल्चरल हेरिटेजले उपलब्ध गराएको थियो।
भारत सरकारले भूकम्पपछिको पुनर्निर्माण सहायतामार्फत नेपालका ८ वटा जिल्लाका ३० वटा साँस्कृतिक सम्पदा स्थलहरुको संरक्षणमा सहयोग पुर्याएको भारतीय दूतावासले जनाएको छ। भारत सरकारले गोरखा र नुवाकोट जिल्लामा ५० हजार निजी आवासहरुको पुनर्निर्माण, ८ वटा जिल्लामा ८५ वटा शैक्षिक संस्थाहरुको पुनर्निर्माण तथा नेपालका ११ वटा जिल्लामा १३३ वटा स्वास्थ्य संस्थाहरुको पुनर्निर्माणमा समेत सहयोग गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790846254.jpg)
-1786602170.png)
