काठमाडौँ – नेपाली कम्युनिष्ट पार्टीका नेता तथा पूर्व प्रधानमन्त्री झलनाथ खनालले नेपाली कम्युनिष्ट पार्टीलाई पुनर्गठन र रूपान्तरण गर्न आवश्यक रहेको बताएका छन् ।
पार्टीको कोशी प्रदेश समितिले शनिवार आयोजना गरेको पार्टी एकता तथा प्रशिक्षण कार्यक्रममा उनले अब पार्टीको नेतृत्वमा युवा आउनुपर्ने बताएका हुन् । उनले देश संकटमा रहेकोले संकटबाट मुक्ति दिलाउन युवालाई अगाडी सार्नुपर्ने बताए ।
उनले देशका सबै प्रमुख राजनीतिक दलहरूभित्र गम्भीर आन्तरिक संकट देखिएको बताए । नेपाली काँग्रेस दुई चिरामा विभाजित रहेको उल्लेख गर्दै उनले काँग्रेस अहिले एकताबद्ध भएर प्रभावकारी ढङ्गले अघि बढ्न सक्ने अवस्थामा नरहेको टिप्पणी गरे ।
नेकपा एमालेभित्र पनि पुनर्गठनको माग बलियो बन्दै गएको उनको दाबी छ । एमालेभित्र पुनर्गठनको माग उठाउने नेताकार्यकर्तालाई अध्यक्ष केपी शर्मा ओलीले ‘क्यान्टिनमा बसेर चिया खाँदै पुनर्गठनको गफ गर्ने आवारा’का रूपमा टिप्पणी गरेको प्रसंगसमेत उनले उल्लेख गरे । उनले एमालेभित्र बहुसङ्ख्यक नेता तथा कार्यकर्ता पार्टीलाई रूपान्तरण र पुनर्गठन गर्नुपर्ने निष्कर्षमा पुगेको उनको भनाई छ । उनले यही आवश्यकता नेपाली कम्युनिष्ट पार्टीमा समेत रहेको बताए। नेकपालाई पुनर्गठन र रूपान्तरण नगरीकन अगाडी बढ्न नसकिने उनको भनाई छ ।
उनले भने, ‘देश ठूलो संकटबाट गुज्रिरहेको छ । एकातिर देशभित्रका प्रतिक्रियावादी शक्तिहरू विविध ढंगले यो क्रान्तिका विरुद्ध लागिरहेका छन् । अब पार्टीहरूमा भन्नुहुन्छ भने नेपाली काँग्रेस अहिले पनि दुई चिरामा छ । त्यो एकताबद्ध भएर केही गर्न सक्ने अवस्थामा छैन । एमाले भन्नुहुन्छ, एमालेभित्रै अब त्यो पुनर्गठनको कुरा उर्लिएर आइरहेको छ, त्यो पुनर्गठन गर्न सकिरहेको छैन । पुनर्गठन गर्नुपर्छ भन्नेहरूलाई केपी ओलीले इलाममा पुगेर समेत आवाराहरू क्यान्टिनमा बसेर यसो गर्छन् भनेर भन्न बाध्य भए । आवाराहरू पुनर्गठन गर्नुपर्छ भनेर क्यान्टिनमा चिया खाएर गफ गर्छन् भने । त्यो त्यहाँभित्रका धेरै नेताहरूलाई भनेको हो, कुनै एउटा–दुइटा आवारालाई भनेको होइन । त्यहाँभित्र बहुमत संख्या अहिले एमालेमा रूपान्तरण गर्नुपर्छ, पुनर्गठन गर्नुपर्छ भन्ने ठाउँमा पुगिसकेको छ, यो युगीन कुरा हो । हो, त्यही कुरा हामी नेकपामा पनि छ, हेर्नुस् । यो नेकपालाई पनि पुनर्गठन नगरेर हुँदैन, रूपान्तरण नगरेर हुँदैन । अब पुराना नेताहरूले तपाईँहरूलाई चाहिँ अह सल्लाह दिने हो, प्रशिक्षण गर्छौँ, हामी । अब तपाईँहरू अगाडि बढ्नुपर्यो, हामी नेतृत्व गर्छौँ’ भनेर उठ्न सक्नुपर्यो अनि मात्रै कार्यकर्ताको रूपमा विकास हुन सकिन्छ । हामी खाली अर्ती–उपदेश सुन्ने कार्यकर्ता मात्रै बन्नु हुँदैन । हामी आफैँ क्रान्ति गर्ने, हामी आफैँ बाँझो चौताराहरू फोर्ने, हामी आफैँ पहरा फोर्ने, हो, त्यो प्रकारको चाहिँ एउटा आँट, हिम्मत, सिर्जनशीलता हो, त्यो कुरा लिएर हामी अगाडि बढ्नुपर्छ, तब मात्रै पार्टी निर्माण गर्न सकिन्छ ।’
उनले पुराना नेताहरूले नयाँ पुस्तालाई निरन्तर अर्ती–उपदेश दिनेभन्दा उनीहरूलाई नेतृत्वमा अघि बढ्न अवसर दिनुपर्नेमा जोड दिए । पुराना नेताहरूले सल्लाह, प्रशिक्षण र मार्गदर्शन दिने तथा नयाँ पुस्ताले नेतृत्व सम्हाल्दै अघि बढ्ने वातावरण निर्माण गर्नुपर्ने उनको भनाई छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787397239.png)
-1786602170.png)
-1786513116.png)
