काठमाडौं। वर्षा, बाढी तथा पहिरोका कारण देशका विभिन्न जिल्लाका मुख्य सडकखण्डमा सवारी आवागमन प्रभावित भएको छ। शनिबार बिहान ५ बजेसम्मको विवरणअनुसार केही सडक पूर्ण रूपमा अवरुद्ध छन् भने केहीमा रातिको समयमा सवारी सञ्चालनमा रोक लगाइएको छ।
काभ्रेपलाञ्चोक–सिन्धुली जोड्ने बीपी राजमार्गअन्तर्गत खुर्कोट–नेपालथोक–कटुन्जेबेँसी सडकखण्डमा सम्भावित बाढीको जोखिमलाई मध्यनजर गर्दै राति ६ बजेदेखि बिहान ४ बजेसम्म सम्पूर्ण सवारीसाधनको आवागमन रोकिएको छ। बिहान ४ बजेदेखि साँझ ६ बजेसम्म भने सवारी सञ्चालन गर्न दिइने व्यवस्था गरिएको छ।
त्यस्तै, मकवानपुरको कान्ति लोकपथमा वर्षाका कारण साँझ ५ बजेदेखि बिहान ५ बजेसम्म सबै प्रकारका सवारीसाधनको आवागमन रोक लगाइएको प्रहरीले जनाएको छ। नुवाकोटको टोखा–छहरे सडकखण्डमा पनि राति १० बजेदेखि बिहान ५ बजेसम्म अत्यावश्यक सेवाबाहेक सार्वजनिक तथा निजी सवारीसाधन सञ्चालनमा पूर्ण रोक लगाइएको छ।
इलामको मेची राजमार्ग इलाम नगरपालिका–९ राजदुवालीमा वर्षाका कारण सडक हिलो भएपछि पूर्ण रूपमा अवरुद्ध भएको छ। उक्त स्थानमा वैकल्पिक सडक रहेको प्रहरीले जनाएको छ।
सिन्धुपाल्चोकको अरनिको राजमार्ग भोटेकोशी गाउँपालिका–२ कोदारीस्थित इर्कु र लिपिङ बजार क्षेत्रमा पहिरो तथा लेदोका कारण पूर्ण रूपमा अवरुद्ध छ। लिपिङ बजारमा खहरे खोलाबाट आएको लेदो र ढुंगासहितको पहिरोका कारण शुक्रबार बिहानदेखि सडक अवरुद्ध भएको हो।
रसुवाको पासाङ ल्हामु सडकखण्ड पनि दुई स्थानमा अवरुद्ध भएको छ। उत्तरगया गाउँपालिका–५ खाल्टेमा त्रिशूली नदीले सडकमुनिबाट कटान गरेपछि सडक पूर्ण रूपमा अवरुद्ध भएको छ। यस्तै, गोसाइँकुण्ड गाउँपालिका–२ स्याउ पार्किङ क्षेत्रमा सडक माथिबाट ढुंगासहितको पहिरो खसेपछि सडकखण्ड अवरुद्ध भएको प्रहरीले जनाएको छ।
रुकुम पश्चिमको भेरी करिडोर पनि अवरुद्ध छ। आठबिसकोट नगरपालिका–६ रिजेगार्ड खोलामा सडक माथिबाट ढुंगा, माटो र लेदोसहितको पहिरो आएपछि सडक अवरुद्ध भएको हो। आठबिसकोट–११ चिसापानीमा चिसापानी खोलाको पानीको बहाव बढेपछि भेरी करिडोरसमेत अवरुद्ध भएको छ।
त्यसैगरी लमजुङको बेँसीसहर–मनाङ सडकखण्ड मर्स्याङ्दी गाउँपालिका–४ रामबजारमा पहिरो खसेपछि पूर्ण रूपमा अवरुद्ध भएको छ।
रोल्पाको सहिदमार्ग पनि माडी गाउँपालिका–६ झकलीमा सडक माथिबाट लेदो, ढुंगा, माटो र रुखसहितको पहिरो खसेपछि पूर्ण रूपमा अवरुद्ध भएको छ।
पछिल्लो विवरणअनुसार पाल्पाको सिद्धार्थ राजमार्ग समेत अवरुद्ध भएको छ। तिनाउ गाउँपालिका–३ सिद्धबाबा सुरुङमार्गको पाल्पातर्फ प्रवेश गर्ने बिन्दुभन्दा करिब १०० मिटर उत्तरतर्फ शनिबार बिहान पहिरो खसेपछि राजमार्ग पूर्ण रूपमा अवरुद्ध भएको प्रहरीले जनाएको छ।
वर्षाका कारण सडकमा पहिरो, बाढी तथा लेदोको जोखिम रहेकाले सम्बन्धित सडकखण्डमा यात्रा गर्दा आवश्यक सावधानी अपनाउन तथा सडकको पछिल्लो अवस्थाबारे जानकारी लिएर मात्र यात्रा गर्न प्रहरीले आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
