पेरिस– विश्वकप फुटबलको फाइनलमा स्पेनसँग पराजित भएपछि भएको विवादमा अर्जेन्टिनाका खेलाडीहरुलाई फिफाले कारबाही गरेको छ ।
फिफाका अनुसार स्पेनविरुद्धको फाइनलपछि भएको झडपमा संलग्न मिडफिल्डर लिएन्द्रो पारेडेजसहित केही खेलाडीमाथि फिफाले कडा कारबाही गरेको छ। पारेडेजलाई १० अन्तर्राष्ट्रिय खेलमा निलम्बन गरिएको छ। उनीमाथि ९० हजार अमेरिकी डलर जरिवानासमेत तोकिएको छ।
जुलाई १९ मा न्यु जर्सीमा भएको फाइनलमा स्पेनसँग अर्जेन्टिना १–० ले पराजित भएपछि पारेडेजले स्पेनका इरिक गार्सियाको घाँटी समातेका थिए। त्यसपछि उनको स्पेनका गाभीसँग पनि घम्साघम्सी भएको थियो। पारेडेजको व्यवहारपछि दुवै टोलीका खेलाडीबीच तनाव बढ्दै झडपको अवस्था सिर्जना भएको थियो।
घटनामा संलग्न अर्जेन्टिनाका नाहुइल मोलिनालाई पनि फिफाले ७ अन्तर्राष्ट्रिय खेलमा निलम्बन गरेको छ। उनलाई ९० हजार डलर जरिवाना गरिएको छ।
त्यस्तै, थिएगो अलमाडा र पाब्लो मार्टिन पाइज गाभिरामाथि समान एक–एक खेलको निलम्बन गरिएको छ। दुवैलाई ३० हजार डलर जरिवानासमेत तोकिएको फिफाले जनाएको छ।
फिफाले अर्जेन्टिनाको राष्ट्रिय टोलीलाई पनि कारबाही गरेको छ। अनुशासन उल्लंघनका कारण अर्जेन्टिनाले आगामी दुई घरेलु अन्तर्राष्ट्रिय खेल बन्द रंगशालामा खेल्नुपर्ने भएको छ। टोलीमाथि ३ लाख २१ हजार अमेरिकी डलर जरिवाना पनि तोकिएको छ।
यसअघि सेमिफाइनलमा इंग्ल्यान्डलाई २–१ ले पराजित गरेपछि अर्जेन्टिनाका केही खेलाडीले ‘फोकल्यान्ड हाम्रो हो’ भन्ने सन्देशसहितको ब्यानर प्रदर्शन गरेका थिए। सो घटनालाई समेत फिफाले अनुशासन उल्लंघनका रूपमा लिँदै अर्जेन्टिनामाथि कारबाही गरेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
