काठमाडौं – नेपाली कांग्रेसका पूर्वमहामन्त्री शशांक कोइरालाले पार्टीको १५औँ महाधिवेशन प्रक्रियामा सहभागी नहुन नेता–कार्यकर्तालाई अपिल गरेका छन्।
‘१५ औँ केन्द्रीय महाधिवेशन तयारी समिति’का नाममा विज्ञप्ति जारी गर्दै कोइरालाले विशेष महाधिवेशनबाट बनेको कार्यसमितिले महाधिवेशन गराउँदा पार्टीका सबै तहका संरचनामा विभाजनको प्रक्रिया सुरु हुने दाबी गरेका छन्। त्यसैले असोज १६ देखि १९ गतेसम्म तय गरिएको महाधिवेशनमा सहभागी नहुन उनले आग्रह गरेका हुन्।
‘तथाकथित विशेष महाधिवेशन पक्षका यस्ता अवैधानिक र विभाजनकारी अधिवेशन र महाधिवेशन आयोजना नगर्न–नगराउन तथा यस्ता क्रियाकलापमा सहभागी नहुन पार्टीका सबै तहका समिति, पदाधिकारी र सदस्यहरू तथा क्रियाशील सदस्यहरूमा हार्दिक अपिल गर्दछौँ,’ विज्ञप्तिमा भनिएको छ ।
कोइराला निवर्तमान सभापति शेरबहादुर देउवासहित संस्थापनइतर पक्षको नेतृत्व गर्दै आएका छन्। साउन २९ देखि ३१ गतेसम्म उनकै अध्यक्षतामा राष्ट्रिय भेला तथा सम्मेलनसमेत आयोजना भएको थियो। उक्त भेलाले देउवाकै नेतृत्वमा १५औँ महाधिवेशन गर्नुपर्ने अडान लिएको थियो।
यसैबीच, महाधिवेशन प्रक्रिया रोक्न माग गर्दै निवर्तमान सभापति देउवा र निवर्तमान कार्यवाहक सभापति पूर्णबहादुर खड्काले शुक्रबार सर्वोच्च अदालतमा रिट पेस गरेका छन्। तर, सर्वोच्च प्रशासनले रिट दर्ता गरेको छैन। अध्ययन पूरा नभएको भन्दै प्रशासनले सोमबार आउन भनेको छ।
पार्टीको आधिकारिकता विवादमा सर्वोच्च अदालतले पुनरवलोकनको अनुमति दिएको अवस्थामा महाधिवेशन अघि बढाउन नमिल्ने देउवा पक्षको जिकिर छ। यही विषयलाई लिएर देउवा पक्ष सर्वोच्च पुगेको हो।
सर्वोच्चमा रिट पेस गर्नुअघि देउवा र नेता शेखर कोइरालाबीच भेटवार्ता भएको थियो। त्यसपछि शशांक कोइरालाको निवासमा पनि कांग्रेस नेताहरूबीच छलफल भएको थियो।
गत पुसमा सम्पन्न विशेष महाधिवेशनमा भने देउवा पक्ष सहभागी भएको थिएन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
