फाइल तस्बिर
काठमाडौं– वर्षा, बाढी, पहिरो र सडक कटानका कारण देशका विभिन्न जिल्लाका मुख्य सडकखण्डमा यातायात प्रभावित भएको छ। केही सडकमा रातिको समयमा सवारी आवागमन रोक लगाइएको छ भने केही सडकखण्ड पूर्ण रूपमा अवरुद्ध भएका छन्।
नेपाल प्रहरीकाअनुसार काभ्रेपलाञ्चोक–सिन्धुली जोड्ने बीपी राजमार्गको खुर्कोट–नेपालथोक–कटुन्जेबेँसी सडकखण्डमा सम्भावित बाढीको जोखिमलाई ध्यानमा राखी राति ६ बजेदेखि बिहान ४ बजेसम्म सम्पूर्ण सवारीसाधनको आवागमन रोक लगाइएको छ। बिहान ४ बजेदेखि बेलुका ६ बजेसम्म भने सडकमा सवारी सञ्चालन हुने व्यवस्था गरिएको छ।
यस्तै, मकवानपुरको कान्ति लोकपथमा वर्षाका कारण बेलुका ५ बजेदेखि बिहान ५ बजेसम्म सबै प्रकारका सवारीसाधनको आवागमन रोक लगाइएको छ। नुवाकोटको टोखा–छहरे सडकखण्डमा पनि राति १० बजेदेखि बिहान ५ बजेसम्म अत्यावश्यक सेवाबाहेकका सार्वजनिक तथा निजी सवारीसाधन सञ्चालनमा रोक लगाइएको छ।
यसैगरी, इलामको मेची राजमार्ग इलाम नगरपालिका–९, राजदुवालीमा वर्षाका कारण सडक हिलाम्मे भएपछि पूर्ण रूपमा अवरुद्ध भएको छ। उक्त स्थानमा वैकल्पिक सडक रहेको प्रहरीले जनाएको छ।
सिन्धुपाल्चोकको अरनिको राजमार्ग अन्तर्गत भोटेकोशी गाउँपालिका–२, कोदारीमा पहिरोसहित लेदो खसेपछि तथा सोही वडाको लिपिङमा सडक भासिएपछि सडकखण्ड पूर्ण रूपमा अवरुद्ध भएको छ।
रसुवाको पासाङ ल्हामु सडकखण्ड पनि दुई स्थानमा अवरुद्ध भएको छ। उत्तरगया गाउँपालिका–५, खाल्टेमा त्रिशूली नदीले सडकको तल्लो भाग कटान गरेपछि सडक अवरुद्ध भएको हो। यस्तै, गोसाइँकुण्ड गाउँपालिका–२, स्याउ पार्किङ क्षेत्रमा सडक माथिबाट ढुंगासहित पहिरो खसेपछि पासाङ ल्हामु सडकखण्ड पूर्ण रूपमा अवरुद्ध भएको प्रहरीले जनाएको छ।
रुकुम पश्चिमको भेरी करिडोर अन्तर्गत आठबिसकोट नगरपालिका–६, रिजेगार्ड खोलामा सडक माथिबाट ढुंगा, माटो र लेदोसहित पहिरो खसेपछि जाजरकोट–डोल्पा सडकखण्ड अवरुद्ध भएको छ।
त्यस्तै, लमजुङको बेंसीसहर–मनाङ सडकखण्ड अन्तर्गत मर्स्याङ्दी गाउँपालिका–४, रामबजारमा अविरल वर्षाका कारण सडक माथिबाट पहिरो खसेपछि सडक पूर्ण रूपमा अवरुद्ध भएको छ।
वर्षा जारी रहेकाले पहाडी सडकखण्डमा थप बाढी, पहिरो तथा सडक कटानको जोखिम रहेको छ। प्रहरीले सडकको अवस्था बुझेर मात्र यात्रा गर्न तथा जोखिमयुक्त क्षेत्रमा आवश्यक सावधानी अपनाउन आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
