काठमाडौं । नेपाली कांग्रेसका पूर्वसभापति शेरबहादुर देउवा पक्षले १५औँ महाधिवेशन रोक्न माग गर्दै सर्वोच्च अदालतमा रिट दायर गर्ने तयारी गरेको छ।
कांग्रेसको आधिकारिकता विवादसम्बन्धी मुद्दा सर्वोच्च अदालतमा विचाराधीन रहेकै अवस्थामा संस्थापन पक्ष (गगनकुमार थापा पक्ष) ले महाधिवेशनको कार्यतालिका अघि बढाएपछि त्यसलाई रोक्न अन्तरिम आदेश माग गर्दै देउवा पक्ष अदालत जान लागेको हो।
थापा पक्षले तयार गरेको महाधिवेशन कार्यतालिका स्थगन गर्न माग गर्दै अन्तरिम आदेशका लागि सर्वोच्च अदालत जाने निर्णय देउवा पक्षले बिहीबार गरेको हो। देउवा पक्षीय नेताहरूको बैठक शशांक कोइरालाको महाराजगन्जस्थित निवासमा बसेको थियो। बैठकले अदालत जाने निर्णय गरेको एक नेताले जानकारी दिए।
सम्भव भए बिहीबार नै, नभए शुक्रबारसम्म रिट दायर गरिने ती नेताले बताए।
यसअघि संस्थापन पक्षले केन्द्रीय कार्यसमिति बैठकमार्फत निर्धारित मितिमै केन्द्रीय महाधिवेशन सम्पन्न गर्ने निर्णय गरिसकेको छ। देउवा पक्षसँग सहमतिका लागि तल्ला तहका अधिवेशनको तालिकामा भने केही संशोधन गरिएको छ।
संशोधित तालिकाअनुसार वडा अधिवेशन भदौ २६ गतेदेखि सुरु हुनेछ भने केन्द्रीय महाधिवेशन १६ देखि १९ गतेसम्म गर्ने कार्यतालिका तय गरिएको छ। महाधिवेशनका अन्य प्रक्रिया भने अघि बढिसकेका छन्।
सर्वोच्च अदालतले कांग्रेस विवादसम्बन्धी यसअघिको आफ्नै फैसलाको पुनरावलोकनका लागि गत २१ साउनमा आदेश दिएपछि देउवा पक्षले अन्तिम फैसला नआएसम्म महाधिवेशन रोक्नुपर्ने माग गर्दै आएको छ।
अदालतको अन्तिम फैसला आउनुअघि नै महाधिवेशन सम्पन्न गर्ने हो भने देउवा पक्षको नेतृत्व स्वीकार गर्नुपर्ने धारणा देउवा पक्षीय नेताहरूले राख्दै आएका छन्।
गत २९ देखि ३१ साउनसम्म बसेको देउवा पक्षीय भेलाले पनि पूर्वसभापति देउवाकै नेतृत्वमा १५औँ महाधिवेशन सम्पन्न गर्ने निर्णय गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
