हेटौँडा– बागमती प्रदेशमा नयाँ सरकार गठनका लागि एमाले र नेकपालाई समर्थन गरेको राप्रपाले तीन मन्त्रालय पाउने सहमति भएको छ।
सहमतिअनुसार राप्रपाबाट राजु विष्ट, गिरबहादुर तामाङ र राजेन्द्र प्रजापति मन्त्री बन्ने भएका छन्।
विष्टलाई खानेपानी तथा ऊर्जा, तामाङलाई सामाजिक विकास र प्रजापतिलाई पर्यटन मन्त्रालयको जिम्मेवारी दिने तयारी गरिएको छ। प्रदेश सरकारमा एमालेले मुख्यमन्त्रीसहित दुई र नेकपाले दुई मन्त्रालय पाउने सहमति भएको बताइएको छ।
प्रदेश प्रमुखको कार्यालयले आज दिउँसो ४ बजे नयाँ मुख्यमन्त्री नियुक्त गर्ने र ४ः२० बजे शपथ ग्रहण गराउने कार्यतालिका सार्वजनिक गरिसकेको छ।
यसैबीच, पार्टीको निर्णयविपरीत एमालेका किरण थापालाई मुख्यमन्त्री बनाउन समर्थन गरेको भन्दै राप्रपाभित्र विवाद चर्किएको छ। राप्रपा संसदीय दलका नेता उद्धव थापाले हिजो मुख्यमन्त्रीमा किरण थापालाई समर्थन गरिएको पत्र प्रदेश प्रमुखसमक्ष पठाएका थिए।
राप्रपा अध्यक्ष राजेन्द्र लिङदेनले पार्टी निर्णयविपरीत सरकार गठन प्रक्रियामा सहभागी भएकामाथि कारबाही प्रक्रिया अघि बढाउने बताएका छन्। यस विषयमा आवश्यक निर्णय लिन आज अनुशासन समिति र कार्यसम्पादन समितिको बैठक बोलाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
