काठमाडौं– बाढीपहिरोका कारण देशका विभिन्न स्थानका मुख्य राजमार्ग तथा सडकखण्डमा यातायात प्रभावित भएको नेपाल प्रहरीले जनाएको छ।
प्रहरीका अनुसार इलाममा मेची राजमार्ग, काभ्रेमा बीपी राजमार्ग, मकवानपुरमा कान्तिलोकपथ, सिन्धुपाल्चोकमा अरनिको राजमार्ग, रसुवामा त्रिशूली–मैलुङ सडक, नुवाकोटमा टोखा–छहरे सडक, लमजुङमा बेँसीसहर–मनाङ सडक र रुकुम पश्चिममा जाजरकोट–डोल्पा सडक पूर्णरूपमा अवरुद्ध छन्।
इलाममा मेची राजमार्ग अवरुद्ध रहे पनि वैकल्पिक सडक प्रयोग गरी आवतजावत भइरहेको प्रहरीले जनाएको छ। यस्तै, काभ्रेको बीपी राजमार्ग रातको समयमा बन्द रहे पनि दिउँसो यातायात सञ्चालनमा रहेको छ।
यसैगरी, बागलुङको कालीगण्डकी करिडोर तथा मुस्ताङको बेनी–जोमसोम र जोमसोम–कोरला सडक खण्डमा एकतर्फी मात्रै यातायात सञ्चालन भइरहेको प्रहरीले जनाएको छ।
लगातारको वर्षाका कारण बाढीपहिरोको जोखिम कायमै रहेकाले सडकको अवस्था बुझेर मात्र यात्रा गर्न प्रहरीले सर्वसाधारणलाई आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
