काठमाडौं– जनआस्था मिडियाका सञ्चालकसमेत रहेका पत्रकार किशोर श्रेष्ठलाई फेरि पक्राउ गर्ने प्रयास निरर्थक भएको छ। पाटन उच्च अदालतले बुधबार उनलाई पक्राउ गर्ने, धरपकड गर्ने वा त्यस्तो कुनै काम नगर्न सरकारका नाममा निषेधाज्ञा जारी गरेको छ।
उपसभामुख रुवि कुमारीले जनआस्था साप्ताहिकमा प्रकाशित समाचारले आफ्नो प्रतिष्ठामा आँच पुग्नुका साथै चरित्र हत्या भएको भन्दै श्रेष्ठविरुद्ध यही भदौ १ गते ललितपुर प्रहरीमा जाहेरी दिएकी थिइन्।
उनको जाहेरीपछि प्रहरीले श्रेष्ठलाई पक्राउ गर्न ललितपुर जिल्ला अदालतसँग अनुमति माग गरेकोमा अदालतले अनुमति नदिएको अवस्था थियो। यहीबीच श्रेष्ठ पक्राउबाट बच्न यही भदौ २ गते नै निषेधाज्ञाको माग गर्दै उच्च अदालत पुगेका थिए। अदालतले रिटका सम्बन्धमा आज आदेश दिएपछि उपसभामुखको जाहेरी व्यर्थ भएको छ भने श्रेष्ठ यो जाहेरीका आधारमा पक्राउ पर्ने सम्भावना टरेको छ।
उच्च अदालतका न्यायाधीश अच्युत कुईंकेलको एकल इजलासले निवेदनको अन्तिम टुंगो नलागेसम्म कुनै पनि खालको धरपकड नगर्न आदेश दिएको छ।
विपक्षीहरूको नाममा भएको अदालतको आदेशमा लेखिएको छ, ‘निवेदनको अन्तिम टुंगो नलागेसम्म निवेदकलाई धरपकड गर्ने, पक्राउ गर्ने, थुनामा राख्नेलगायतका कार्य नगर्नू, नगराउनू।’
श्रेष्ठको तर्फबाट १७ जना कानुन व्यवसायीले बहस गरेका थिए।
यसअघि उनलाई एक सांसदसँग चुम्बन गरेकी महिलाले आफ्नै फेसबुक वालमा प्रकाशित गरेको फोटो जनआस्था अनलाइनमा प्रकाशित गरेको भन्दै दिएको उजुरीका आधारमा पक्राउ गरिएको थियो। जनआस्थाको कार्यालयका सञ्चार उपकरण प्रहरीले जफत गरेको थियो।
सर्वोच्चको आदेशपछि उनी यही भदौ १ गते रिहा भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
