काठमाडौं– राष्ट्रिय स्वतन्त्र पार्टी (रास्वपा)का सभापति रवि लामिछानेले बोलाएको संसदीय दलको बैठकमा सांसदहरूले सरकारको कामकारबाही र आफ्नै निर्वाचन क्षेत्रका समस्यालाई लिएर चर्को प्रश्न उठाएका छन्।
बुधबार सिंहदरबारस्थित रास्वपा संसदीय दलको कार्यालयमा बसेको बैठकमा सांसदहरूले जनताका गुनासा सम्बोधन हुन नसकेको, सरकारका काम प्रभावकारी रूपमा जनतामाझ पुर्याउन नसकिएको तथा सेवा प्रवाहमा देखिएका कमजोरीबारे प्रश्न गरेका थिए।
पराजुलीका अनुसार बैठकमा उठेका विषय हुन्, ‘ल्याब्सेस कहाँ छ ? ग्लिचेज कहाँ छ ? सरकारले काम गरिराखेको छ भन्ने कुरा आम जनतामा किन पुर्याउन सकिएन ?’
सांसदहरूले आफ्ना निर्वाचन क्षेत्रमा देखिएका समस्या र जनताले राखेका गुनासासमेत बैठकमा प्रस्तुत गरेका थिए।
ग्यास अभावको विषयले पनि बैठकमा स्थान पाएको थियो। वैशाखमा करिब २२ लाख सिलिन्डर मात्रै बजारमा पुगेकोमा साउनमा ४० लाख सिलिन्डर बजारमा पुग्दासमेत ग्यास अभावको गुनासो कायमै रहेको भन्दै सांसदहरूले यसको कारण खोज्नुपर्ने बताएका थिए।
सांसदहरूले उठाएका प्रश्नमा बैठकमै सम्बन्धित मन्त्रीहरूले जवाफ दिएका थिए। सरकारका कमजोरी, जनगुनासा र सेवा प्रवाहबारे सांसदहरूले खुलेर प्रश्न गरेपछि बैठकमा विषयवस्तु केही चर्को बनेको बताइएको छ।
यसैबीच, बैठकले रास्वपा संसदीय दलको विधान संशोधनका लागि मुख्य सचेतक कवीन्द्र बुर्लाकोटीको संयोजकत्वमा कार्यदल गठन गर्ने निर्णयसमेत गरेको छ। कार्यदललाई आवश्यकताअनुसार विधान संशोधनको प्रस्ताव तयार गर्न सात दिनको समय दिइएको छ।
विधान संशोधनमा सांसदको सदनमा उपस्थिति, सदनको मर्यादा कायम गर्ने, जनताप्रतिको जिम्मेवारी, विपक्षी आवाजको सम्मान तथा कानुन निर्माण प्रक्रियामा सांसदको भूमिकालाई थप प्रभावकारी बनाउने विषय समेटिने बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
