काठमाडौं– प्रधानमन्त्री बालेन शाह नेतृत्वको सरकार गठनपछि सरकारी कार्यालयमा अनुशासन कायम गर्न अनुगमन र जनगुनासो सुनुवाइलाई तीव्रता दिइएको छ।
प्रधानमन्त्री तथा मन्त्रिपरिषद्को कार्यालय मातहतको राष्ट्रिय सतर्कता केन्द्रका अनुसार गत चैतदेखि साउनसम्म दर्ता भएका १ हजार २९८ उजुरीमध्ये १ हजार ११४ वटा अर्थात् ८५.८२ प्रतिशत उजुरी फछ्र्यौट भएका छन्। यो अघिल्लो वर्षको सोही अवधिको तुलनामा ११.७२ प्रतिशत विन्दुले बढी हो।
यस अवधिमा सरकारी कार्यालयको अनुगमनसमेत उल्लेख्य रूपमा बढाइएको छ। गत वर्ष चैतदेखि साउनसम्म ३१८ कार्यालयको अनुगमन गरिएकोमा यस वर्ष ९२४ वटा कार्यालयमा अनुगमन गरिएको केन्द्रले जनाएको छ।
अनुगमनका क्रममा यस वर्ष ११ हजार ४ जना कर्मचारीले अनुशासन उल्लंघन गरेको पाइएको छ। जसमध्ये १० हजार २६८ जना आचारसंहिता तथा समय पालना नगर्ने, ६४५ जना तोकिएको पोशाक नलगाउने र ९१ जना कार्यकक्षमा नभेटिएका कर्मचारी रहेका छन्।
गत वर्षको सोही अवधिमा भने २ हजार ७७५ जना कर्मचारी अनुशासन उल्लंघनमा परेको पाइएको थियो। यसरी हेर्दा यस वर्ष अनुगमनको दायरा विस्तारसँगै अनुशासन उल्लंघन गर्ने कर्मचारीको संख्या पनि उल्लेख्य बढेको देखिएको छ।
सतर्कता केन्द्रले नियम उल्लंघन गर्ने कर्मचारीमाथि प्रचलित कानुनअनुसार कारबाही गर्न सम्बन्धित निकायलाई निर्देशन दिएको जनाएको छ। सरकारी सेवा प्रवाहलाई नागरिकमैत्री, अनुशासित र प्रभावकारी बनाउन उजुरी फछ्र्यौट तथा कार्यालय अनुगमनलाई प्राथमिकतामा राखिएको केन्द्रको भनाइ छ।
सरकारी कार्यालयमा भ्रष्टाचार, कर्मचारीको अनुशासनहीनता वा शंकास्पद सम्पत्तिसम्बन्धी सूचना राष्ट्रिय सतर्कता केन्द्रको हटलाइन ०१४२००३४५ मा फोन गरेर दिन सकिने जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790071578.png)
-1786602170.png)
-1789631269.jpg)
