काठमाडौं– सोमबार दिउँसोदेखि सामाजिक सञ्जाल र सञ्चारमाध्यमहरुले गृहमन्त्री सुदन गुरुङले आफ्ना मतदातालाई ‘भोट फिर्ता’ लैजान भनेको विषयले स्थान पाएको छ । सोही विषयमा गृहमन्त्रीविरुद्ध र उनको पक्षमा विभिन्न टिप्पणीहरु भइरहेका छन् ।
आखिर गृहमन्त्रीलाई त्यस्तो के समस्या आइलाग्यो, जसकारण निर्वाचित भएको पाँच महिनामै भोट फिर्ता लैजान भन्नुपर्ने अवस्था आएको छ ।
घटना आइतबार बेलुकाको हो । गोरखाको शहीद लखन गाउँपालिका वडा नम्बर ९ का बासिन्दासँग भेटघाटका लागि गृहमन्त्री गुरुङ पुगेका थिए । गोरखा क्षेत्र नम्बर १ अन्तर्गत रहेको उक्त पालिकामा गुरुङ आफू निर्वाचित भएयता सुरु गरेको मतदातासँग अन्तरक्रिया कार्यक्रम गर्नेक्रममा शनिबार पुगेका थिए । शनिबार भीमसेन थापा गाउँपालिका र आइतबार शहिद लखन गाउँपालिकाका मतदातासँग मन्त्री गुरुङले भेटेका थिए ।
आइतबार बेलुका शहीद लखन गाउँपालिका वडा नम्बर ९ का बासिन्दा सँगै वडाध्यक्ष रामकुमार श्रेष्ठ, रास्वपाका वडा सचिव खोपेन्द्र लामिछाने लगायत थिए । छलफलका क्रममा लामिछानेले चुनावअघि ल्याबका लागि बजेट छुट्याउने वाचा गरेको तर अहिले बजेट किन नछुट्याएको भन्दै प्रश्न गरे ।
त्यसपछि गृहमन्त्री गुरुङले चार महिनामै सबै प्रतिफल खोजेर नहुने भन्दै बरु भोट फिर्ता लैजान जवाफ दिए । सोही कार्यक्रमको भिडियो जनआस्था अनलाइनले सामाजिक सञ्जालमा सार्वजनिक गरेको छ । सोमबार मध्यान्हतिर सार्वजनिक भिडियो अहिले सामाजिक सञ्जालहरुमा भाइरल भइरहेको छ ।
गृहमन्त्रीले एउटा सानो आयोजनाका लागि प्रदेश सरकार र स्थानीय सरकारले नै व्यवस्था गर्न सक्ने र केन्द्र सरकारले यस्ता देशैभरका आयोजनामा बजेट छ्ट्याउने हो भने बजेटको किताब पहाड बन्ने आशयका साथ उक्त जवाफ फर्काएका थिए । उनले भनेका थिए, ‘यति साना–साना बजेटहरू छ नि तपाईंको, यसरी किताबमा राख्ने हो भने त महाभारत र रामायण मिक्स गरेर पनि बन्दैन । त्यही भएर हामीले यहाँबाट लिस्ट मगाएका छौं । के राख्ने भन्ने कुरा त लिस्टमा चाहिन्छ होला नि ।’
गृहमन्त्रीसँगै भएका व्यक्तिलाई प्रश्नकर्ताले लिस्ट किन नपठाएको भन्दै प्रश्न गर्छ । छेउका व्यक्तिले लिस्ट पठाएको जवाफ दिन्छन् । त्यसपछि एक अर्का व्यक्ति हिजो मात्रै मन्त्रालयका सचिवसँग कुरा भइसकेको बताउँछन् । त्यसपछि लामिछाने गाउँका मानिसहरुले सोधेर हैरान पारेको भन्दै गृहमन्त्रीको जवाफ खोज्छन् ।
त्यसपछि गृहमन्त्री भन्छन्, ‘चार महिनामा अहिले बल्ल पहिलो बजेट हाम्रो आएको छ । …तपाईंलाई काम भए पुग्ने होइन त ? चार महिनामा त फेरि कायापलट गर्न म सक्दैन, भोट लिएर जानुस् ।’गृहमन्त्रीको यो जवाफपछि अन्तरक्रियामा बसेका बासिन्दाहरु हाँस्छन् । पछि गृहमन्त्रीले मतदातालाई अहिले सबै काम खोजेर नहुने भन्दै विस्तारै आफूले गरेका वाचाहरु पूरा गर्दै जाने प्रतिबद्धता जनाए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_XAsUsbrNQj-1786958464.jpg)
-1786602170.png)
-1786513116.png)
