फाइल तस्बिर
काठमाडौं– लगातारको वर्षा, पहिरो, सडक भासिने तथा नदी कटानका कारण देशका विभिन्न स्थानका मुख्य सडकखण्डमा यातायात प्रभावित भएको छ।
नेपाल प्रहरीका अनुसार काभ्रे, मकवानपुर, इलाम, सिन्धुपाल्चोक, रसुवा, रुकुम पश्चिम, संखुवासभा, लमजुङ र म्याग्दीका विभिन्न सडकखण्डमा यातायात पूर्ण रूपमा अवरुद्ध भएको हो।
काभ्रेपलाञ्चोकको खुर्कोट–नेपालथोक–कटुन्जेबेँसी–सिन्धुली सडकखण्डमा सम्भावित बाढीको जोखिमलाई मध्यनजर गर्दै रातिको समयमा सम्पूर्ण सवारीसाधनको आवागमन रोक लगाइएको छ। उक्त सडकखण्डमा साँझ ६ बजेदेखि बिहान ४ बजेसम्म सवारीसाधन सञ्चालनमा रोक लगाइएको छ भने बिहान ४ बजेदेखि साँझ ६ बजेसम्म यातायात सञ्चालन हुने व्यवस्था गरिएको छ।
मकवानपुरको कान्ति लोकपथमा पनि वर्षाका कारण रातिको समयमा सबै प्रकारका सवारीसाधनको आवागमन रोकिएको छ। साँझ ५ बजेदेखि बिहान ५ बजेसम्म उक्त सडकमा सवारी सञ्चालनमा रोक लगाइएको प्रहरीले जनाएको छ।
इलाम नगरपालिका–९ राजदुवालीस्थित मेची राजमार्ग वर्षाका कारण सडक हिलाम्मे भएपछि पूर्ण रूपमा अवरुद्ध भएको छ। सडकमा सवारीसाधन सञ्चालन गर्न नसक्ने अवस्था रहे पनि उक्त स्थानमा वैकल्पिक बाटो रहेको प्रहरीले जनाएको छ।
सिन्धुपाल्चोकको भोटेकोशी गाउँपालिका–२ कोदारीस्थित अरनिको राजमार्गमा इर्कु पहिरोबाट ढुंगा, माटो र लेदोसहितको पहिरो खसेपछि सडक पूर्ण रूपमा अवरुद्ध भएको छ। सोही गाउँपालिकाको लिपिङमा सडक भासिएपछि पनि अरनिको राजमार्ग पूर्ण रूपमा बन्द भएको छ।
रसुवाको उत्तरगया गाउँपालिका–५ खाल्टेस्थित त्रिशूली–मैलुङ–स्याफ्रुबेंसी जाने कच्ची सडक त्रिशूली नदीले सडकमुनिबाट कटान गरेपछि पूर्ण रूपमा अवरुद्ध भएको छ। रुकुम पश्चिमको आठबिसकोट नगरपालिका–६ रिजेगार्ड खोलास्थित भेरी करिडोरअन्तर्गत जाजरकोट–डोल्पा सडकखण्डमा सडक माथिबाट ढुंगा, माटो र लेदोसहितको पहिरो खसेपछि यातायात पूर्ण रूपमा रोकिएको छ।
संखुवासभाको भोटखोला गाउँपालिका–३ सिरेक डाँडास्थित कोशी राजमार्गअन्तर्गत खाँदबारी–किमाथांका सडकखण्डमा वर्षाका कारण करिब १० मिटर सडक भासिएपछि सडक पूर्ण रूपमा अवरुद्ध भएको छ।
लमजुङको मर्स्याङ्दी गाउँपालिका–४ रामबजारस्थित बेँसीसहर–मनाङ सडकखण्डमा अविरल वर्षाका कारण सडक माथिबाट पहिरो खसेपछि यातायात पूर्ण रूपमा रोकिएको छ। त्यस्तै, म्याग्दीको अन्नपूर्ण गाउँपालिका–३ रुक्सेस्थित बेनी–जोमसोम सडकखण्डमा आज बिहान करिब ५:३३ बजे ढुंगा, माटो र लेदोसहितको पहिरो खसेपछि सडक पूर्ण रूपमा अवरुद्ध भएको छ।
वर्षाका कारण देशका विभिन्न सडकखण्डमा बाढी, पहिरो र सडक भासिने क्रम बढेकाले यात्रु तथा सवारी चालकलाई सडकको अवस्था बुझेर मात्र यात्रा गर्न प्रहरीले आग्रह गरेको छ। अवरुद्ध सडकखण्ड खुलाउने तथा यातायात सञ्चालनमा ल्याउने प्रयास भइरहेको जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786940152.webp)
-1786602170.png)
-1786513116.png)
