काठमाडौं– अविरल वर्षासँगै आएको बाढी, पहिरो तथा सडक भासिने क्रम बढेपछि देशका विभिन्न जिल्लाका मुख्य सडकखण्डमा यातायात प्रभावित भएको छ।
प्रहरीका अनुसार देशभरका १४ वटा सडकखण्ड पूर्ण रूपमा अवरुद्ध भएका छन् भने केही सडकमा रातिको समयमा सवारीसाधन सञ्चालनमा रोक लगाइएको छ।
वर्षाका कारण मेची राजमार्ग, अरनिको राजमार्ग, पासाङ ल्हामु सडकखण्ड, भेरी करिडोर, कोशी राजमार्ग, बेँसीसहर–मनाङ, बेनी–जोमसोम, भालुवाङ–लिवाङ, राप्ती राजमार्ग, टोखा–छहरे तथा साँफे–मार्तडी सडकखण्ड अवरुद्ध भएका छन्।
इलामको इलाम नगरपालिका–९ राजदुवालीमा वर्षाका कारण सडक हिलो भएपछि मेची राजमार्ग पूर्ण रूपमा अवरुद्ध भएको छ। यस्तै, सिन्धुपाल्चोकको भोटेकोशी गाउँपालिका–२ कोदारीमा इर्कु पहिरोका कारण तथा लिपिङमा सडक भासिएपछि अरनिको राजमार्ग अवरुद्ध भएको छ।
रसुवाको उत्तरगया गाउँपालिका–५ खाल्टेमा त्रिशूली नदीले सडक मुनिबाट कटान गरेपछि त्रिशूली–मैलुङ–स्याफ्रुबेँसी सडकखण्ड पूर्ण रूपमा बन्द भएको छ। रुकुम पश्चिमको आठबिसकोट नगरपालिका–६ रिजेगार्ड खोलामा पहिरो खसेपछि भेरी करिडोरअन्तर्गत जाजरकोट–डोल्पा सडकखण्ड पनि अवरुद्ध भएको छ।
संखुवासभाको भोटखोला गाउँपालिका–३ सिरेकडाँडामा वर्षाका कारण करिब १० मिटर सडक भासिएपछि खाँदबारी–किमाथांका सडकखण्ड पूर्ण रूपमा अवरुद्ध भएको छ। लमजुङको मर्स्याङ्दी गाउँपालिका–४ रामबजारमा पहिरो खसेपछि बेँसीसहर–मनाङ सडकखण्ड पनि बन्द भएको छ।
मुस्ताङको थासाङ गाउँपालिका–४ कैकुखोलामा ढुंगासहितको लेदो पहिरो खसेपछि बेनी–जोमसोम सडकखण्ड अवरुद्ध भएको छ। म्याग्दीको अन्नपूर्ण गाउँपालिका–३ सुकेबगर र रघुगंगा गाउँपालिका–२ बैसरीमा पनि पहिरो खसेपछि सोही सडकखण्ड अवरुद्ध भएको प्रहरीले जनाएको छ।
रोल्पाको सुनिलस्मृति गाउँपालिका–४ कागडाँडामा पहिरो खसेपछि भालुवाङ–लिवाङ सडकखण्ड, सल्यानको कपुरकोट गाउँपालिका–४ अरिङ्गालेमा पहिरोपछि राप्ती राजमार्ग, नुवाकोटको शिवपुरी गाउँपालिका–८ घट्टेखोलामा लेदोसहितको पहिरोपछि टोखा–छहरे सडकखण्ड तथा बाजुराको बूढीगंगा नगरपालिका–२ बकदेपहिरोमा ढुंगा–माटो खसेपछि साँफे–मार्तडी सडकखण्ड अवरुद्ध भएको छ।
यसैगरी, काभ्रेपलाञ्चोक–सिन्धुली जोड्ने वि.पि. राजमार्गमा सम्भावित बाढीको जोखिमलाई मध्यनजर गर्दै राति ६ बजेदेखि बिहान ४ बजेसम्म सम्पूर्ण सवारीसाधनको आवागमनमा रोक लगाइएको छ। बिहान ४ बजेदेखि बेलुका ६ बजेसम्म भने सवारी सञ्चालन गर्न दिइने जनाइएको छ।
मकवानपुरको कान्ति लोकपथमा पनि वर्षाका कारण बेलुका ५ बजेदेखि बिहान ५ बजेसम्म सबै प्रकारका सवारीसाधन सञ्चालनमा रोक लगाइएको छ।
लगातार वर्षा भइरहेकाले थप स्थानमा पहिरो तथा सडक अवरुद्ध हुन सक्ने जोखिम रहेको प्रहरीले जनाएको छ। प्रहरीले यात्रु तथा चालकलाई सडकको अवस्था बुझेर मात्र यात्रा गर्न र जोखिमयुक्त सडकखण्डमा विशेष सावधानी अपनाउन आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791358722.jpg)
-1786602170.png)
