काठमाडौं। जाजरकोटको भेरी नगरपालिका–२ रिसाङमा अविरल वर्षापछि आएको पहिरोले घर तथा टहरा भत्किँदा ११ जना घाइते भएका छन्। घटानमा चार जना सम्पर्कविहीन भएका छन्।
शनिबार दिउँसो करिब ४ बजेदेखि परेको अविरल वर्षाका कारण रिसाङका विभिन्न स्थानमा पहिरो गएको हो। पहिरोका कारण घर तथा टहरा भत्किएको र थप जोखिम रहेको जानकारीपछि उद्धार तथा खोजीका लागि नेपाली सेना, नेपाल प्रहरी र सशस्त्र प्रहरीसहित ५० जनाको टोली परिचालन गरिएको छ।
पहिरोले भेरी नगरपालिका–३ स्यालाका पूर्णबहादुर विकको ६ कोठे दुईतले ढुंगा–माटोले बनेको कच्ची घर पूर्णरूपमा क्षति भएको प्रहरीले जनाएको छ। घरमा रहेका पाँच जना परिवारका सदस्य भने आफन्तको घरमा बसेका छन्। यस्तै, भेरी–२ रिसाङकी भैरवी केसीका दुईवटा टिनका अस्थायी टहरा पनि पूर्णरूपमा क्षति भएका छन्। ती टहरामा हाल मानिस बसोबास नगर्ने जनाइएको छ।
पहिरोमा परी घाइते हुनेमा भेरी–२ रिसाङका ६० वर्षीय रामबहादुर शाही, ४५ वर्षीय सिद्धिबहादुर कामी, भेरी–२ चिसापानीकी ५७ वर्षीया भद्राकली कार्की, भेरी–१ डौरीकाँडाका ४५ वर्षीय मनवीर चदरा, १६ वर्षीया मनिषा विक, ४७ वर्षीया मोतीकला विक, भेरी–२ का करिब ५२ वर्षीय केदार कार्की, करिब २३ वर्षीया अनिता कार्की, १० वर्षीय युनिश शाही र ४५ वर्षीया सुन्तली चदरा रहेका छन्।
घाइतेमध्ये रामबहादुर शाही र भद्राकली कार्कीको अवस्था गम्भीर रहेको जनाइएको छ। शाहीलाई जिल्ला अस्पताल जाजरकोटमा प्रारम्भिक उपचारपछि थप उपचारका लागि नेपालगञ्ज र कार्कीलाई सुर्खेत रिफर गरिएको छ। केदार कार्कीलाई पनि प्रारम्भिक उपचारपछि नेपालगञ्ज पठाइएको छ। अन्य घाइतेहरूको जिल्ला अस्पताल जाजरकोट तथा स्थानीय स्वास्थ्य संस्थामा उपचार भइरहेको प्रहरीले जनाएको छ।
यसैबीच, पहिरो आएपछि भाग्ने क्रममा भेरी नगरपालिका–२ फारुलाका करिब ५४ वर्षीय उमासिंह खत्री, चिसापानीका करिब ७० वर्षीय भीमबहादुर कार्की र भेरी–२ का करिब ८७ वर्षीया रती खत्री सम्पर्कविहीन भएका छन्।
सम्पर्कविहीन तीनै जनाको खोजी तथा घाइतेको उद्धारका लागि सुरक्षाकर्मीको टोली घटनास्थलमा परिचालन गरिएको छ। घटनास्थलको अवस्था तथा क्षतिको थप विवरण संकलन भइरहेको प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786800305.jpg)
-1786602170.png)
-1786513116.png)
