काठमाडौं– नेपाली कांग्रेसका पूर्वसभापति तथा पूर्वप्रधानमन्त्री शेरबहादुर देउवाले विद्यार्थी जीवनदेखि नै आफूले अदालतबाट न्याय पाएको उल्लेख गर्दै देउवाले अहिले पनि न्यायालयप्रति विश्वास रहेको बताए।
विद्रोही कांग्रेसको राष्ट्रिय भेलालाई सम्बोधन गर्दै देउवाले सर्वोच्च अदालतमा कांग्रेसको आन्तरिक विवादसम्बन्धी विषय विचाराधीन रहेको अवस्थामा अदालतबाट न्याय हुने विश्वास व्यक्त गरेका हुन्।
पार्टीभित्र देखिएको विवादलाई संवाद र छलफलमार्फत समाधान गर्दै एकता कायम गर्नुपर्ने बताएका छन्।
लामो इतिहास बोकेको पार्टीभित्र विवाद देखिनु दुःखद् भएको उल्लेख गर्दै सर्वोच्च अदालतमा विषय विचाराधीन रहेकाले आफूले थप टिप्पणी नगर्ने बताए। उनले अदालतबाट न्याय हुनेमा आफू विश्वस्त रहेको पनि बताए।
‘पार्टीमा भावनात्मक रूपमै एकता हुनुपर्छ। पार्टीभित्र देखिएका असहमतिलाई सबैलाई न्याय हुने गरी छलफल गर्नुपर्छ। पार्टी एकताको पक्षमा दृढ हुन आह्वान गर्दछु,’ देउवाले भने।
उनले उपचारका लागि लामो समय विदेशमा बसेर स्वदेश फर्किएको उल्लेख गर्दै आफ्नो स्वागतमा सहभागी सबैलाई धन्यवाद दिए। मुलुकको वर्तमान राजनीतिक परिस्थितिप्रति कांग्रेसका सबै सचेत हुनुपर्ने उनको भनाइ थियो।
देउवाले अहिले समाजमा निराशा देखिएको भन्दै त्यसलाई हटाउने दायित्व पुरानो लोकतान्त्रिक पार्टीका रूपमा कांग्रेसको रहेको बताए। विगतमा कांग्रेसले पुर्याएको योगदानलाई बिर्सेर केवल कमजोरीको चर्चा गर्दा मुलुक थप निराशातर्फ जाने उनको भनाइ थियो।
‘विगतमा के गर्यो भन्ने खोज्नुअघि राणा शासन, पञ्चायत, निर्दलीय व्यवस्था फाल्न दिएको योगदानको चर्चा हुनुपर्छ,’ उनले भने।
उनले नेपालको राजनीतिक परिवर्तनमा कांग्रेसले नेतृत्वदायी भूमिका निर्वाह गरेको दाबी गर्दै संविधान पनि कांग्रेसकै नेतृत्वमा जारी भएको बताए। विगतमा भएका राजनीतिक परिवर्तनलाई कांग्रेसको इतिहासका रूपमा गर्वका साथ स्मरण गर्दै त्यसबाट पाठ सिकेर अघि बढ्नुपर्ने उनको भनाइ थियो।
देउवाले मुलुक अहिले कठिन परिस्थितिबाट गुज्रिरहेको उल्लेख गर्दै नेपालको सहिष्णुताको पहिचान कमजोर हुँदै गएको बताए। यसको समाधानका लागि आफूले पहल गर्ने प्रतिबद्धता जनाउँदै जनताका लागि जुनसुकै भूमिका निर्वाह गर्न आफू तयार रहेको बताए।
उनले संकटका समयमा संवाद र सहमतिबाट समाधान खोज्नुपर्नेमा जोड दिए। ‘पार्टीको एकतालाई प्राथमिकतामा राखेको छु,’ उनले भने।
सम्बोधनका क्रममा देउवाले पूर्वराजा ज्ञानेन्द्रसँग आफूले विगतमा राखेको अडान पनि स्मरण गरे। उनले सरकारको आदेश मान्न तयार भए पनि प्रजातन्त्रविरुद्ध कुनै सम्झौता नगर्ने धारणा आफूले स्पष्ट रूपमा राखेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
