काठमाडौं– शिक्षा मन्त्री सस्मित पोखरेलले नेपाल शिक्षक महासंघले आन्दोलन नगर्ने दाबी गरेका छन्।
महासंघको तेस्रो राष्ट्रिय परिषद् बैठकले भदौबाट आन्दोलन गर्ने निर्णय भएको जानकारी महासंघले यही साउन २२ गते आयोजित पत्रकार सम्मेलनमार्फत गराएको थियो।
सरकारका प्रवक्ता समेत रहेका मन्त्री पोखरेलले शुक्रबार केही सञ्चारमाध्यमका सम्पादक तथा प्रतिनिधिसँगको छलफलमा आन्दोलनको सम्भावना नरहेको बताए।
उनले महासंघले उठाएका मागका सम्बन्धमा विगतको सरकारले सहमति गरिसकेको र नयाँ शिक्षा ऐन तर्जुमाको क्रममा रहेकाले महासंघले आन्दोलन नगर्ने बताए। यसका लागि महासंघसँग संस्थागत रूपमा नभए पनि सरोकारवालाहरूसँग छलफल भइरहेको जानकारी उनले दिए।
उनले महासंघकै संरचनागत सुधार आवश्यक रहेको पनि बताए।
पोखरेलले आम शिक्षकहरूको सहभागिता र विद्यार्थीहरूको समेत चासो सम्बोधन हुने गरी महासंघको विधान नै संशोधन गरिने बताए।
‘अब सबै शिक्षकले प्रत्यक्ष रूपमा नेतृत्व चुन्ने व्यवस्था गर्न लागेका छौं,’ उनले भने। यसअघि महासंघमा संघको प्रतिनिधित्व हुने व्यवस्था रहेको थियो।
मन्त्री पोखरेलले शिक्षक महासंघका अध्यक्ष लक्ष्मीकिशोर न्यौपानेको कार्यकाल सकिन लागेको पनि जानकारी दिए।
विश्वविद्यालयहरूमा पदाधिकारी नियुक्तिबारे पनि उनले जानकारी गराए। काठमाडौं विश्वविद्यालयबाहेक सबै विश्वविद्यालयमा उपकुलपति नियुक्ति भइसकेको जानकारी दिँदै अब रेक्टर र रजिस्ट्रार पनि १–२ दिनभित्र नियुक्त गरिने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786875773.jpg)
-1786602170.png)
-1786513116.png)
-1788425345.png)
