फाइल तस्बिर
काठमाडौं– लगातारको वर्षाका कारण देशका विभिन्न स्थानमा सडक अवरुद्ध भएको नेपाल प्रहरीले जनाएको छ।
शुक्रबार बिहान ५ बजेसम्मको विवरणअनुसार काभ्रे, सिन्धुली, मकवानपुर, इलाम, सिन्धुपाल्चोक, रसुवा, रुकुम पश्चिम, रुकुम पूर्व र लमजुङका विभिन्न सडकखण्ड प्रभावित भएका छन्।
काभ्रेको खुर्कोट–नेपालथोक–कटुन्जेबेँसी–सिन्धुली जोड्ने बीपी राजमार्गमा सम्भावित बाढीलाई मध्यनजर गर्दै राति ६ बजेदेखि बिहान ४ बजेसम्म सबै प्रकारका सवारीसाधनको आवागमन रोक लगाइएको छ। बिहान ४ बजेदेखि बेलुका ६ बजेसम्म भने सवारीसाधन सञ्चालन हुने प्रहरीले जनाएको छ।
त्यस्तै, मकवानपुरको कान्ति लोकपथमा वर्षाका कारण रातिको समयमा सबै प्रकारका सवारीसाधनको आवागमन रोकिएको छ। उक्त सडकमा बेलुका ५ बजेदेखि बिहान ५ बजेसम्म आवागमनमा रोक लगाइएको हो।
इलाम नगरपालिका–९ राजदुवालीस्थित मेची राजमार्ग वर्षाका कारण सडक हिलाम्मे भएपछि पूर्ण रूपमा अवरुद्ध भएको छ। उक्त स्थानमा सवारीसाधन सञ्चालनका लागि वैकल्पिक बाटो भने रहेको प्रहरीले जनाएको छ।
अरनिको राजमार्गका तीन स्थानमा अवरोध
सिन्धुपाल्चोकको भोटेकोशी गाउँपालिकाका विभिन्न स्थानमा अरनिको राजमार्ग पूर्ण रूपमा अवरुद्ध छ। भोटेकोशी–४ चारकिलोमा सडकमाथिबाट पहिरो खसेको छ भने भोटेकोशी–२ कोदारीस्थित ईकु पहिरोमा ढुङ्गा, माटो र लेदोसहितको पहिरो खसेर सडक बन्द भएको छ। त्यस्तै, भोटेकोशी–२ लिपिङमा सडक भासिएपछि राजमार्ग अवरुद्ध भएको प्रहरीले जनाएको छ।
रसुवाको उत्तरगया गाउँपालिका–५ खाल्टेस्थित त्रिशूली–मैलुङ–स्याफ्रुबेंसी कच्ची सडकखण्ड पनि त्रिशूली नदीले सडकमुनिबाट कटान गरेपछि पूर्ण रूपमा अवरुद्ध भएको छ।
कर्णाली र गण्डकीका सडक पनि प्रभावित
रुकुम पश्चिमको आठबिसकोट नगरपालिका–६ रिजेगार्ड खोलास्थित भेरी करिडोरको जाजरकोट–डोल्पा सडकखण्डमा सडक माथिबाट ढुङ्गा, माटो र लेदोसहितको पहिरो खसेपछि सडक पूर्ण रूपमा अवरुद्ध भएको छ।
रुकुम पूर्वको भूमे गाउँपालिका–४ काडाबगर र भूमे–५ धौलापहिरास्थित मध्यपहाडी लोकमार्गमा पहिरो खसेपछि सडक अवरुद्ध भएको छ।
लमजुङमा पनि मध्यपहाडी लोकमार्ग र बेँसीसहर–मनाङ सडकखण्ड पूर्ण रूपमा बन्द भएका छन्। मध्यनेपाल नगरपालिका–१० बिमिरेभञ्ज्याङमा पहिरो खसेपछि मध्यपहाडी लोकमार्ग अवरुद्ध भएको छ भने बेँसीसहर नगरपालिका–६ खरखरेभीरमा पहिरो खस्दा बेँसीसहर–मनाङ सडकखण्ड बन्द भएको प्रहरीले जनाएको छ।
वर्षाका कारण पहिरो तथा बाढीको जोखिम बढेकाले सडकमा यात्रा गर्दा आवश्यक सतर्कता अपनाउन र सम्बन्धित निकायको सूचना लिएर मात्र यात्रा गर्न प्रहरीले आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1764146706.png)
-1786513116.png)
