काठमाडौं– नेपाली कांग्रेसले पूर्व सभापति शेरबहादुर देउवाबाट अभिभावकीय भूमिकाको अपेक्षा गरेको छ । बिहीबार बसेको केन्द्रीय कार्यसमितिको बैठकले पूर्वसभापति एवं पूर्वप्रधानमन्त्री शेरबहादुर देउवालाई स्वदेश फर्किएकोमा स्वागत गर्दै पार्टीमा अब उनको भूमिका अभिभावकीय हुने अपेक्षा गरेको हो ।
सभापति गगनकुमार थापाको सभापतित्वमा ललितपुरस्थित पार्टी केन्द्रीय कार्यालय, बीपी स्मृति भवनमा बसेको बैठकमा देउवाको स्वास्थ्य लाभको कामनासमेत गरेको छ । बैठकले देउवाले नेपाली कांग्रेसको गौरवशाली इतिहास निर्माणमा पुर्याएको योगदान तथा लोकतान्त्रिक आन्दोलनमा निर्वाह गरेको नेतृत्वदायी भूमिकाको स्मरण गर्दै उनको अनुभव र मार्गदर्शन आगामी दिनमा पनि पार्टीका लागि महत्त्वपूर्ण हुने विश्वास व्यक्त गरेको छ।
बैठकले प्रेस काउन्सिल नेपालका पूर्वअध्यक्ष एवं जनआस्था साप्ताहिकका सम्पादक किशोर श्रेष्ठलाई मध्यरातमा गरिएको गिरफ्तारी तथा पत्रिकाको कार्यालयमा गरिएको खानतलासीप्रति गम्भीर ध्यानाकर्षण भएको जनाएको छ।
कांग्रेसले सञ्चारमाध्यमसम्बन्धी कानुन र आचारसंहिताको पालना हुनुपर्नेमा आफू स्पष्ट रहेको उल्लेख गर्दै कानुनविपरीत कार्य भए प्रचलित कानुनअनुसार अनुसन्धान र कारबाही हुनुपर्ने जनाएको छ। तर, संवैधानिक विधि र स्थापित प्रक्रियालाई छल्दै प्रहरी प्रशासनले सोझै पत्रकार पक्राउ गर्ने तथा कार्यालयमा खानतलासी गर्ने कार्यलाई कांग्रेसले गलत र अनुचित भनेको छ।
यस्तो घटनाले स्वतन्त्र प्रेसमाथि मनोवैज्ञानिक त्रास सिर्जना गर्दै नागरिकको सूचनाको मौलिक अधिकार कुण्ठित गर्ने राज्यको नियतका रूपमा बुझिन सक्ने कांग्रेसको ठहर छ। राज्य संयन्त्रले पूर्वाग्रह र प्रतिशोध साध्ने व्यवहार स्वीकार्य नहुने कांग्रेसले जनाएको छ।
सार्वजनिक लेखा समितिमा सत्तारूढ दलका सांसदहरूबाट प्रदर्शन गरिएको अमर्यादित तथा असंसदीय व्यवहारप्रति पनि कांग्रेसले गम्भीर असहमति जनाएको छ।
कांग्रेसले संसद तथा विषयगत समितिहरूलाई लोकतन्त्रको मन्दिरको संज्ञा दिँदै जनप्रतिनिधिले प्रयोग गर्ने भाषा, शैली र व्यवहार पूर्णतः अनुशासित, शिष्ट र मर्यादित हुनुपर्ने जनाएको छ।
आरोप वा दाबी तथ्य र विधिसम्मत हुनुपर्ने तथा राजनीतिक संरक्षणका आधारमा कसैलाई उन्मुक्ति दिने वा पूर्वाग्रहका आधारमा कसैको चरित्रहत्या गर्ने प्रवृत्ति लोकतान्त्रिक मूल्य–मान्यताविपरीत रहेको कांग्रेसको भनाइ छ। पार्टीले आफ्ना सम्पूर्ण सांसदलाई संसद र संसदीय समितिको उच्च मर्यादा जोगाउँदै जिम्मेवार भूमिका निर्वाह गर्न निर्देशनसमेत दिएको छ।
बैठकले रोल्पाको थवाङ गाउँपालिकास्थित खोलबाङमा भएको जिप दुर्घटनामा परी ज्यान गुमाएका व्यक्तिप्रति श्रद्धाञ्जली व्यक्त गरेको छ।
दुर्घटनामा मृत्यु भएका व्यक्तिका परिवारजनप्रति समवेदना प्रकट गर्दै कांग्रेसले घाइतेहरूको शीघ्र स्वास्थ्यलाभको कामना गरेको छ। साथै बेपत्ताहरूको खोजी कार्य तीव्र पार्न सरकारसँग आग्रह गरेको छ।
बैठकमा केन्द्रीय सदस्य तथा संसदीय दलका नेता–सांसदहरूले विभिन्न विषयमा पार्टीको धारणा राखेका थिए। बैठकमा केही केन्द्रीय सदस्य तथा सांसदहरूले संसद र समसामयिक राजनीतिक विषयमा आ–आफ्नो धारणा प्रस्तुत गरेका थिए।
बैठकको अर्को बैठक भोलि बिहान ११ बजे पार्टीको केन्द्रीय कार्यालयमा पुनः बस्ने कांग्रेसले जनाएको छ।
-1786633458.jpg)
-1786633458.jpg)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
