काठमाडौं– अविरल वर्षाका कारण रोल्पाको थवाङ गाउँपालिका–५, कोतलाबाङमा गएको भीषण पहिरोमा परी ७ जनाको मृत्यु र ५ जना बेपत्ता भएको घटनाप्रति राष्ट्रिय स्वतन्त्र पार्टी (रास्वपा)ले गहिरो दुःख व्यक्त गरेको छ।
रास्वपाका महामन्त्री विपिन कुमार आचार्यले बिहीबार जारी गरेको विज्ञप्तिमार्फत पहिरोमा ज्यान गुमाउनेहरूप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनमा समवेदना व्यक्त गरेका छन्। उनले घाइतेहरूको शीघ्र स्वास्थ्यलाभको कामना गर्दै बेपत्ताहरूको प्रभावकारी खोजी तथा उद्धारका लागि सरकारको गम्भीर ध्यानाकर्षण गराएका छन्।
रास्वपाले पछिल्लो २४ घण्टामा रोल्पालगायत देशका विभिन्न क्षेत्रमा बाढी तथा पहिरोका कारण ठूलो क्षति भएको र जनजीवन कष्टकर बनेको जनाएको छ। सीमित स्रोतसाधनका बाबजुद उद्धारमा खटिएका सुरक्षाकर्मी तथा स्थानीय नागरिकको प्रयास प्रशंसनीय रहेको उल्लेख गर्दै राज्यको दायित्व उद्धारमा मात्र सीमित हुन नहुने पार्टीको भनाइ छ।
विज्ञप्तिमा विपद् आइसकेपछि मात्रै राज्य संयन्त्र सक्रिय हुने र पूर्वतयारीमा कमजोरी रहने परम्परागत कार्यशैलीबाट पाठ सिक्नुपर्नेमा जोड दिइएको छ। विपद् जोखिम न्यूनीकरणका लागि सरकारलाई थप जिम्मेवार र जवाफदेही बन्न रास्वपाले आग्रह गरेको छ।
तीनै तहका सरकारलाई समन्वय गर्न आग्रह
रास्वपाले संघ, प्रदेश र स्थानीय तहका सरकारलाई विपद् पूर्वसूचना प्रणाली प्रभावकारी बनाउन, जोखिमयुक्त बस्ती पहिचान गरी सुरक्षित स्थानमा स्थानान्तरण गर्न तथा प्रभावित क्षेत्रमा तत्काल उद्धार, राहत र निःशुल्क उपचारको व्यवस्था गर्न आग्रह गरेको छ।
निरन्तरको वर्षाका कारण देशभर जनजीवन, सडक सञ्जाल तथा बस्तीहरू जोखिममा परेको भन्दै पार्टीले सम्भावित विपद्बाट जोगिन उच्च सतर्कता अपनाउन नागरिकलाई अपिलसमेत गरेको छ।
अत्यावश्यक कामबाहेक यात्रा नगर्न, नदी किनार तथा पहिरोको जोखिम रहेका क्षेत्रमा विशेष सावधानी अपनाउन र सम्भावित जोखिमप्रति सचेत रहन रास्वपाले आग्रह गरेको छ।
“विपद्को यस घडीमा राज्य आफ्ना नागरिकको अभिभावक बनेर उभियोस्,” विज्ञप्तिमा भनिएको छ। रास्वपाले प्रभावित क्षेत्रका नागरिकको साथमा आफूहरू सदैव रहने जनाएको छ।
साथै, पार्टीले देशभरका आफ्ना संयन्त्रलाई विपद्पूर्व तयारी तथा विपद्पछिको उद्धार र राहतका काममा राज्यका संयन्त्रलाई सहयोग गर्न चौबीसै घण्टा तयार रहन अनुरोध गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
