काठमाडौं– आस्था मिडियाका अध्यक्ष तथा जनआस्था साप्ताहिकका सम्पादक किशोर श्रेष्ठलाई पक्राउ गरिएको तथा जनआस्था साप्ताहिकको कार्यालयमा हातहतियारसहित प्रवेश गरी कम्प्युटरलगायत सामग्री जफत गरिएको घटनाप्रति प्रेस काउन्सिल नेपालले ध्यानाकर्षण भएको जनाएको छ।
श्रेष्ठलाई २०८३ साउन २७ गते बुधबार राति पक्राउ गरिएको थियो।
त्यस क्रममा उनको निजी निवासमा खानतलासी भएको र त्यसपछि बिहीबार बिहान उक्त सञ्चारमाध्यमको कार्यालयमा हातहतियारसहित प्रवेश गरी कम्प्युटरलगायत सामग्री जफत गरिएको थियो।
काउन्सिलले जारी गरेको विज्ञप्तिमा पत्रकार तथा सञ्चारमाध्यममाथि हुने यस्ता घटनाप्रति काउन्सिलको गम्भीर ध्यानाकर्षण भएको उल्लेख छ। काउन्सिलले पत्रकार र सञ्चारमाध्यमको अनुगमन आफ्नो क्षेत्राधिकारभित्र रहेर दुवै दृष्टिकोणबाट हुँदै आएको उल्लेख गर्दै कुनै समाचारको विषयमा चित्त नबुझेमा वा पत्रकार तथा सञ्चारमाध्यमबाट आचारसंहिता उल्लंघन भएको लागेमा कानुनी तथा संस्थागत प्रक्रियामार्फत काउन्सिलमा उजुरी दिन सरोकारवाला सबै पक्षलाई आग्रह गरेको छ।
नागरिकको सूचनाको हकको प्रत्याभूति प्रेस स्वतन्त्रताबाट हुने भएकाले प्रेसको मर्यादा कायम राख्नु सबैको कर्तव्य भएको उल्लेख गर्दै काउन्सिलले प्रेस स्वतन्त्रताको सदुपयोग र सम्मान हुनुपर्ने बताएको छ।
काउन्सिलले सञ्चारकर्मीको काममा पत्रकार आचारसंहिता, व्यवहार तथा पेशागत मर्यादा पालना गर्नुपर्नेमा पनि जोड दिएको छ। काउन्सिलले पत्रकार आचारसंहिता उल्लंघनका विषयमा उजुरी प्राप्त भएमा नियमानुसार कारबाही गर्दै आएको जनाएको छ।
काउन्सिलले सम्बन्धित पत्रकार वा सञ्चारमाध्यमलाई स्पष्टीकरण सोध्ने, सचेत गराउने, खण्डन प्रकाशन तथा प्रसारण गर्न निर्देशन दिने, ध्यानाकर्षण गराउने, पत्रपत्रिकाको मूल्यांकन तथा वर्गीकरण प्रक्रियाबाट अलग गर्ने, लोककल्याणकारी विज्ञापनलगायत सुविधाबाट वञ्चित गर्ने तथा प्रेस प्रतिनिधि प्रमाणपत्र वा प्रेस पास निलम्बन गर्न सम्बन्धित निकायलाई निर्देशन दिने व्यवस्था रहेको विज्ञप्तिमा उल्लेख छ।
त्यस्तै, सरकारी वा अन्य कुनै प्रकारका विज्ञापन तथा सुविधा निश्चित अवधिका लागि उपलब्ध नगराउन सम्बन्धित निकायलाई सिफारिस गर्ने, सरकारी भ्रमणमा सहभागी नगराउन सिफारिस गर्ने तथा पत्रकार वा सञ्चारमाध्यमप्रति काउन्सिलको निर्णय वा निर्देशन अवज्ञा भएमा कारबाही गर्नेलगायतका अधिकार काउन्सिलसँग रहेको जनाइएको छ।
काउन्सिलले प्रेस स्वतन्त्रताको दुरुपयोग हुन नदिन पत्रकार तथा सञ्चारमाध्यमलाई सत्य, तथ्य, सन्तुलित एवं विश्वसनीय पत्रकारिताको माध्यमबाट आफ्नो व्यावसायिक अभ्यासलाई उच्च, मर्यादित, जवाफदेही र उत्तरदायी बनाउन सजग हुन आग्रह गरेको छ।
-1786612643.jpg)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1764146706.png)
-1786513116.png)
