काठमाडौं – जनआस्था साप्ताहिकका सम्पादक तथा आस्था मिडियाका अध्यक्ष किशोर श्रेष्ठलाई समाचार प्रकाशनको विषयलाई लिएर पक्राउ परेको घटनाप्रति नेपाल पत्रकार महासंघले आपत्ति जनाएको छ ।
महासंघले बिहीबार विज्ञप्ति जारी गर्दै श्रेष्ठलाई समाचारको विषयलाई लिएर पक्राउ गरिएको घटनाप्रति गम्भीर ध्यानाकर्षण भएको जनाएको हो ।
जनआस्था साप्ताहिकका प्रधान सम्पादक तथा प्रेस काउन्सिल नेपालका पूर्वकार्यवाहक अध्यक्ष श्रेष्ठलाई बुधबार राति ९ बजेको समयमा काठमाडौं प्रहरी परिसरको टोलीले ललितपुरस्थित निवासबाट पक्राउ गरेको थियो ।
पक्राउलगत्तै समाचारको स्रोत खोज्न प्रहरीले राति करिब १ बजे श्रेष्ठको घरमा र बुधबार बिहान कार्यालयमा समेत खानतलासी गरेको जानकारी प्राप्त भएको महासंघले जनाएको छ ।
महासंघका अनुसार समाचारमा चित्त नबुझेका विषय हेर्ने क्षेत्राधिकार प्रेस काउन्सिल नेपालसँग रहेको छ । उक्त क्षेत्राधिकारको बेवास्ता गर्दै सरकारी संयन्त्र प्रयोग गरेर पत्रकार श्रेष्ठमाथि गरिएको व्यवहार प्रेस तथा अभिव्यक्ति स्वतन्त्रता, पत्रकार आचारसंहिता र संविधानविरुद्ध रहेको महासंघको ठम्याइ छ ।
यस्तो घटनाले लोकतान्त्रिक मूल्य–मान्यता र स्वतन्त्र प्रेसको विश्वव्यापी मान्यतामाथि प्रहार गरेको महासंघले जनाएको छ । महासंघले सरकारको यस्तो शैलीप्रति खेद प्रकट गर्दै घटनाको कडा भर्त्सना गरेको छ ।
महासंघले प्रेसविरोधी व्यवहार सच्याउन तथा पत्रकार श्रेष्ठलाई तत्काल बिनाशर्त रिहा गरी प्रेस स्वतन्त्रताको सम्मान गर्न माग गरेको छ । समाचारको विषयमा विवाद भए प्रेस काउन्सिल नेपालमार्फत आवश्यक प्रक्रिया अवलम्बन गरी समाधान खोज्न सम्बन्धित निकायलाई महासंघले आग्रह गरेको छ ।
साथै, आफ्नो क्षेत्राधिकारको स्वामित्वको विषयमा प्रभावकारी भूमिका निर्वाह गर्न प्रेस काउन्सिल नेपाललाई समेत महासंघले आग्रह गरेको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
