काठमाडौं– मंगलबार अपराह्न नेपाली कांग्रेसका नेता डा. शेखर कोइरालाको सचिवालयले जानकारीका लागि भन्दै एउटा सूचना पठायो। जसमा लेखिएको छ– ‘नेपाली कांग्रेसका नेता शेखर कोइराला २०८३ साउन २९ गते आयोजना गरिएको भेलाको उद्घाटन समारोहमा सहभागी हुनुहुनेछ।’
सूचनामा भनिएको छ– ‘त्यो कुनै पार्टी विभाजन गर्ने भेला नभएकाले उक्त भेलामा सहभागी भएर डा. कोइरालाले पार्टी एकताकै लागि आह्वान गर्नुहुनेछ।’
शेखरका भाइ डा. शशांक कोइरालाको नेतृत्वमा विद्रोही कांग्रेसको राष्ट्रिय भेला यही साउन २९ देखि ३१ गतेसम्म काठमाडौंमा हुँदैछ। भेलामा को आउने, को नआउने भन्ने बहस चलिरहेको बेला शेखरको सचिवालयले रणनीतिक सन्देश प्रवाह गरेको छ।
शेखर–शशांक पार्टीको १४औँ महाधिवेशनदेखि राजनीतिक रूपमा टाढा थिए। त्यतिबेला शशांकले शेखरलाई पार्टी सभापतिमा सहयोग गरेनन्। बरु, शेरबहादुर देउवाको पक्षमा खुलेर देखिए। यही कारण देउवा सभापति बनेका थिए।
कांग्रेसभित्र देउवाले नै कोइराला परिवारमा ‘खेलेर’ बेमेल गराएको चर्चा चलेको थियो। समय बदलिएको छ। अब देउवाकै कारण दुई कोइराला मिल्ने सम्भावना बढेको छ।
दाजुभाइबीच राजनीतिमा ‘मिलेर’ जाने ‘गोप्य’ समझदारी बनिसकेको कोइराला निकटस्थहरू बताउँछन्। शशांकका स्वकीय सचिव भरत तिवारी दुई कोइरालाबीच ‘मेलमिलाप’ रहेको बताउँछन्।
जानकारहरूका अनुसार यही साउन २९ गतेबाट हुने विद्रोही कांग्रेसको भेलाले पार्टी नै विभाजनसम्मको रणनीति बनाएको थियो। विद्रोही पक्ष नै ‘न्याय’ का लागि सर्वोच्च अदालत गुहारेकाले भेलाबाटै पार्टी विभाजनको सम्भावना अन्त्य भएको छ।
‘विभाजनमा जान परेको स्थितिमा भेलाका संयोजक डा. शशांकले नै शेखरलाई नयाँ पार्टीको सभापतिमा प्रस्ताव गर्ने गोप्य सहमति बनेको थियो। अब त्यो सहमति तत्काल कार्यान्वयन हुने भएन,’ दुवै कोइरालासँग समन्वयमा रहेका कांग्रेसका एक नेताले नेपाललाइभसँग भने।
‘यही कारण शेखर भेलामा जान सहमत भएका हुन् र पछिल्लो सन्देश प्रवाह भएको हो,’ उनको भनाइ छ– ‘शेखरले भेलाका संयोजक शशांकलाई नेता मानेर भाग लिन तम्सिएका हुन्। किनकि सर्वोच्च अदालतले गगन थापा सभापति रहेकै पक्षलाई मान्यता दियो भने दुई कोइरालाको गोप्य सहमति कार्यान्वयन गर्ने दिन नआउला भन्न सकिन्न। त्यो अवसर नगुमोस् भन्नेमा दुवै सचेत छन्।’
उनीहरूबीचको अहिलेको समझदारी कायम रहे नयाँ पार्टी वा पुरानो पार्टी जहाँ भए पनि एकअर्कालाई नेता मानेर जान अब समस्या नहुने ती नेताको दाबी छ।
कांग्रेस राजनीतिमा कोइराला परिवारको प्रभाव गहिरो रहेको विश्वास गरिन्छ। सुशील कोइरालासम्मले धानेको कोइराला ‘लिगेसी’ उनको देहावसानसँगै कमजोर भएको थियो। कोइराला परिवार छिन्नभिन्न भएको थियो। शेखर र शशांकबीच पारिवारिक निकटतासँगै राजनीतिक प्रतिस्पर्धा र मतभिन्नता थियो।
शशांक आफ्ना पिता बीपी कोइरालाले बनाएको पार्टीको उत्तराधिकारी बन्न खोजिरहेका थिए भने बीपीका भाइ केशवप्रसाद कोइरालाका पुत्र शेखर आफू पनि कोइरालाको ‘लिगेसी’ बोक्ने मानिस हुँ भनिरहेका थिए। त्यसैले १४औँ महाधिवेशनमा दुई कोइराला फरक–फरक कित्तामा उभिए।
‘अब चाहिँ एकीकृत कांग्रेसको १५औँ महाधिवेशनमा होस् वा पार्टी विभाजन गर्नुपर्दा होस्, एकले अर्कोलाई सभापति मानेर जाने परिस्थिति निर्माण भएको छ,’ एक नेताले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786437116.jpg)
-1786513116.png)
